Jeremia 51 - Angami Naga CL (Re-edited) Bible (BSI)

¹ Jihovae puya: Ae Babilon mu Leb-kamai nu kelhouko perhieketuo la mha kepeka teikhrie puo piesieshütuo;

² siro ae mha heyakezhamia ketsepie Babilon nu shütuo, sidi ukoe puo hepetawatuo. Ukoe puo kijü chü kemethuowatuo, kemezhiekecü nhie ukoe lutsahatsa nu puo perhie phirtuo.

³ Theükepieu bu puo theü ga hiecie, tsiu puo bu terhü boulie se di dojüpfü thata hie. Puo khriesako peshashü hie; puo rüpfhünuoko peka lotsowalie.

⁴ Chaldiamia kijü nunu uko dukhri pie zhüwatuo, mu puo chaü nunu rüzapfü zhütatuo.

⁵ Israel mu Juda rükra mota lho uko Kepenuopfü, krodiko Jihovae uko khawa mo zo, uko kijüe Israel Kemesau mhodzünu kephouma thuo tshupfü zhüta zorei.

⁶ Babilon donunu latalie, sidi nie kerheiro kelalie, nie kehoupuorei! Puo kejo la kaüjüta hiecie, kekreilamonyü haue Jihova khepu teiute, puoe puo zha chüpie puo tsüzhie.

⁷ Babilon-e Jihova dzie nu suna hie chü, kijü pete die kemezewa; seyiekoe puo zu krie mezelie, süla seyiekoe nyate.

⁸ Babilon-e te mhai tsu zhüte mu biephro phawate; puo la thekrü chücie! Puo rüzapfü la daru se vorlie; puo chü kemenelie rei si lhomu.

⁹ Hie we Babilon chü kemeneshütuoü sie zo, derei puo chü kemenelie kenjüte. Puo khawataliecie, sidi kehoupuorei u thuo u ra vota khe; kekreilamonyü puo kepejo kho tei tso bate mu sie teigei tuote.

¹⁰ Jihovae hie la chüshütuoü ketuou chüshüte; vorlie, úko Zion nunu Jihova úko Kepenuopfü mhatho-u pesishü khe.

¹¹ Theütsieko chü kemethelie! Theütsie bouko nu pelilie! Jihovae Medes kediko nou chüshüte, puoe Babilon la lekecüu sü puo pekawaketuou zo, süue Jihova khepuu, rüsuokiu khepu zokecü la.

¹² Babilon dahouko perhietuoü puo pfhelha pesieshülie; rükhouko chü kemeteishülie; rükhoumia bu rüshü uko perhietuoü dojülie; kekreilamonyü Jihovae Babilon nu kelhouko gei chüshüketuo rhülie mu chü phreshüte.

¹³ Nie dzükezhatho gei lhou ketuoko, nie kinyi kekra nyikecüko, nie thelau sü vorte, nie kelhou kemejüro-u sü dawate.

¹⁴ Krodiko Jihovae puo thuo rüseshü: Ae kuprie kro mhie chüpahi kekra se nie ketshu chü tou zotuo, sitse ukoe nie mho kuokelie shieshütuo.

¹⁵ Puoe puo kekuo üse kijü chüshü, puo mhasi üse chüshü, tsiu puo kesikele pie teiko mho shülie.

¹⁶ Puoe puo pfhephrakeshü ki teiko gei dzükru pfhe partaya, tsiu puoe kijü valatsa nu mhoutsa pesieshü. Puo teirüu la teikemela chüshü, tsiu puo mhaboukiko nunu teikhrie se par.

¹⁷ Themia pete mecie mo mu kesikele jü; rükreimia pete rei uko terhuorhiko la mengata; kekreilamonyü uko miarhikoe ketho mo, tsiu uko gei kerhei thesü ba mo.

¹⁸ Süko kemethuo zo, u sekecü vie zo; puo siazha khakeshü ki uko kaüjütatuo.

¹⁹ Jihova we sümhie mo, Jakob yau we si mo, kekreilamonyü puoe mha pete chükeshüu zo, tsiu Israel-e puo kayie seyieu zo, puo zae krodiko Jihova.

Israel-e Kepenuopfü Nyaüra

²⁰ Noe rüyachü nu a seitau zo, terhü nu a rünyieu; a n ze di seyieko vütshiewaya; a n ze di kedirüvie pekawaya;

²¹ a n ze di kier mu puo gei ketuou vüdawaya; a n ze di kierbagei mu kierbagei gei ketuou vüdawaya;

²² a n ze di thepfumia mu thenumia vüdawaya; a n ze di phichümia mu nhicunuomia vüdawaya, a n ze di khriesamia mu thenunuomia vüdawaya;

²³ a n ze di kuopfhemia mu uko kuoko vüdawaya, a n ze di lieciemia mu uko kezeko vüdawaya, a n ze di ahngko mu mha kekhayakezhako vüdawaya.

Babilon Kemezhieketuo

²⁴ Siro ae Babilon mu Chaldia nu kelhou themia pete gei zhadavüshütuo ukoe nieko mhinguki nu Zion nu mha kesuo chükeshü pete la, Jihovae siya.

²⁵ A n petsouya, he-i mia pekayakezha kijüthouu, Jihovae siya, puoe kijü pete pekawaya; a dzie yhapie n perhietuo, sidi tsiekrie geinu n phou ketoushütuo, tsiu n chüpie thekewa kijüthou puo chüwatuo.

²⁶ N geinu puo ke nu la ketsie yopuorei mu puo mvüdze tsie yopuorei chülie lho, derei noe kechachie ruozhütatuo, Jihovae siya.

²⁷ Kijü nu pfhelha piesieshülie, seyieko donu ketsüu khoushülie; puo ze terhü chüketuo la seyieko kezulie, puo perhieketuo la kedirüvieko kekielie, Ararat, Mini, mu Ashkenaz kie kengulie; puo perhieketuo la kezhamia kedalie, pekrie kuprie tuoi kier ze vorlie.

²⁸ Puo perhieketuo la seyieko kezulie, Medemia kediko, uko ahngko mu mha kekhayakezhako sa di, tsiu uko khrükhro keba kijü kehoupuorei.

²⁹ Kijüu rüsü khrokhro bate, mu kijüu rüperüle bate, Jihovae Babilon petsouketuo rhü baketa la, sidi Babilon kijü chüpie ruotatuo mu mia puo bu rei lhou motaketuo la .

³⁰ Babilon terhümiavimiako kegeikecü khawate, ukoe uko dahou kemetei nu bate, uko kekuo jüte, ukoe thenumia chüte; uko kebachüko mi pie thewate, uko cakhako bierhuowate.

³¹ Dieliemia ta vo kekrei puo ze kesetuoü, mu dieliemia puoe kekreimia puo ze kesetuoü vo, Babilon kediu ki puo nadi tietsapuo nu vo kekreitsa ketso lielieketa thashütuo üdi.

³² Dzü pfükecü chüko teliete, mi pie guodzüko thewate, mu puo rüpfhünuoko michie bate.

³³ Kekreilamonyü krodiko Jihova, Israel Kepenuopfüe puya: Babilon nuopfüe sieu tuoi zo, lie nyükecü teiki; sirei puotei huoyo sie nu lieyie teiu vortuo.

³⁴ “Babilon kediu Nebukadnezar-e a mezuliete, puoe a gedawate; puo a chüpie mhabou kemethuo puo chüwa, puoe khunuo zha kemeriekecü puo tuoi a mezuliete; puoe a vie keviko pie puo vadi ketshu chülie, puoe a whuowate.

³⁵ A ciechücierhakewau Babilon gei khepuliecie,” idi Zion nu kelhoukoe putuo. “A zie khepu bu Chaldia nu kelhouko gei batacie,” idi Jerusalem-e putuo.

³⁶ Süla Jihovae puya: Ae n yalietuo mu n la khepu lieshütuo, ae puo dzükezha bie pesowatuo, mu puo dzüluoko chü pesowatuo.

³⁷ Siro Babilon pekapie kepupfü zhütatuo, meseruko kebachü, mia bu meriekecü mu rütsekecü chütuo, miapuorei lhou ba moketa chü chüwatuo.

³⁸ Losha tuoi ukoe keze mehotuo; ukoe losha nuonuo tuoi ruotuo.

³⁹ Ukoe kedzüle keba ki, ae zuko keseshütuo, sidi uko die kemezetuo, uko bu mevükhouilie kemochie, süsie uko bu kechachie ze zhütatuo, mu co la sielie lho, Jihovae siya.

⁴⁰ Ae tekuonuo ze kedukhri nu kevo tuoi tsiu tekuochü mu temvüko tuoi, uko teshü kershütuo.

⁴¹ Kimhie di Sheshak lieliete shi, kijü pete mhokuou jüte! Kimhie di Babilon-e seyieko mhodzü kemeriecü puo chüte shi!

⁴² Dzükezhau Babilon mho siete, dzü rüpfhü puo zepfülie.

⁴³ Puo nadiko meriekecü chüte, sotoi mu kijükesia chüte, miapuorei lhou kemo kijü, mu miapuorei süu pfüthe voya mote.

⁴⁴ Ae Babilon nunu Bel pechütuo, sidi puo bu mezukelieko melou se la parshütuo. Seyieko kru puo ki tsu salie lho, Babilon sozhau mete.

⁴⁵ A themiako, puo ki nunu partaliecie! Sidi kehoupuorei, Jihova nouyie kemeriekecüu nunu puo kerheiro kelaliecie!

⁴⁶ Kijü nu diekrieko sikecü la n melou thachüta morei michieta hie, teicie puo nu diekrie puo vortuo, mu teicie kekrei puo nu kekrei puo vortuo, kijüu gei kepeka vortuo, mha kekhayakezhamia thuo mha kekhayakezhamia petsoutuo.

⁴⁷ Ketho zo, teisozhako vor touzhie a Babilon nu miarhiko gei siazha khakeshü ki; puo kijü pete bu thenga chütatuo, tsiu puo dukhrikewako pete te puo donu tsutuo.

⁴⁸ Sitse teiko mu kijüu, siro sünu keba pete, u nei di Babilon la chielituo; kekreilamonyü kepekamia pesotsa nu uko petsou vortuo, Jihovae siya.

⁴⁹ Babilon-e Israel dukhrikewa la tetsu zotuo, kijü pete Babilon la nu siaketa tuoi di.

⁵⁰ Nieko zhiecha nunu takelieko, tuoshülie, rüge thata hie! Kijü kepetsera rei Jihova rükra balie, tsiu Jerusalem bu n nou vorlie:

⁵¹ Hieko pie thenga nu shüwate, hie kengakeshü pfhe sishüte; thengae hieko zie zepfü bate, Jihova ki kemesa chüko nu solhimia lerketa la.

⁵² Süla puoteiu vor touzhü zo, Jihovae siya, süki ae puo thedzie pie rhikelie miarhiko gei siazha khashütuo, sidi puo kijü pete nu rüzapfükelieko meheimelo zhütatuo.

⁵³ Babilon thuo tei meli kho shierei mu puoe puo chü kerükrieko chü kemeteilie zorei, a kinu kepekamia puo gei vortuo, Jihovae siya.

⁵⁴ Rünyüshücie! Babilon nunu kekra pfhe! Chaldia kijü nunu tetsu kemeriekecüu!

⁵⁵ Kekreilamonyü Jihovae Babilon pekapie methuo zhütuo üzhie, puo pfhe chü toutou bebe chü kezhüu bu zeite. Uko pfhephrakoe dzü rüpfhü kesier tuoi zo, sidi uko pfhephra pfü keza vo.

⁵⁶ Kekreilamonyü kepekau puo gei vorte, Babilon petsou di; puo terhümiaviko teliete, uko theüko bietshewate; kekreilamonyü Jihovae u zhakhra chüshüyakezha Kepenuopfü zo, puoe süu zha chü tseishütuo.

⁵⁷ Ae puo kezhako mu puo themia mhakesiko bie kemezewatuo, puo ahngko, mha kekhayakezhako mu terhümiaviko rei sa; ukoe kechachie zezhütatuo mu co la sierlie lho, Kediue siya, puo zae krodiko Jihova.

⁵⁸ Krodiko Jihovae puya: Babilon dahou kemeyako biepie kijüu ze kemethawatuo, tsiu puo kharu kerükrieko mi pie thewatuo. Themiako mhachü kemezhie thedochü, tsiu seyiekoe mi pie thewaketuo puo pie u pelho ketuo zo.

Jeremia Seraia ki Diekhakeshü

⁵⁹ Juda kediu Zedekia puo kedi chükelie cie dia cie, Jeremia siedzekesiu, Babilon nu kele ki, die khapie Seraia, Neria nuou, Mahseia tsuu ki shü. Seraiae mhakepfhe kezhau.

⁶⁰ Siro Jeremiae mha kesuo Babilon nu vorketuo pete, Babilon kepetsou die hako pete thupie leshütshü puo nu shülie.

⁶¹ Süsie Jeremiae Seraia ki: “No Babilon nu kevor ki, die hako pete phrüketuo meholieluo,

⁶² di sie, ‘He-i Jihova, noe thechü hau pekawaketuo sidi mhapuo bu rei sünu lhoulie kelho, themia rei morei khunuo rei, sidi kechachie methuo zhütaketuo dze pu,’ sishülie.

⁶³ Sidi no leshütshü hau phrü tseiwa tse, ketsie puo pie süu sa phalie, di kelhoupie Eufrat metsuou nu shüwalie,

⁶⁴ di sie, ‘Hakemhie di Babilon rületatuo, mu sie lalie lho, ae kepeka puo gei se kevorko la,’ sishülie.” Jeremia dieko ha ketso zo.