Jeremia 50 - Angami Naga CL (Re-edited) Bible (BSI)

Babilon Nyie Pepikewa

¹ Jihova die Jeremia siedzekesiu geinu Babilon, mu Chaldiamia kijü dze pukeshü:

² Seyieko donu pesishü mu pushülie, pfhelhau lhashülie di pesishülie, süu keviewa hie, pushülie: Babilon lieliete, Bel pie thenga nu shüwate, Merodak puo ziejü thenousuo bate. Puo miarhiko pie thenga chüwate, puo miarhiko u ziejü bate.

³ Kekreilamonyü pesotsa seyie puoe puo petsou siertuo; süu puo kijü chü kemethuowatuo, mu miapuorei sünu lhou motatuo; themia mu khunuo rei sünunu tatatuo.

⁴ Teisozha süko nu mu süteiki, Jihovae puya; Israelmiako vorlietuo uko mu Juda themiako keze vortuo; ukoe kra di uko Kepenuopfü Jihova pfhü vortuo.

⁵ Ukoe uko zie bu sütsa va di, Zion nu kevo chau ketsotuo, sidi uko keze vor kechachie rükra motalie kelho dietseidiekho-u nu Jihova ze puo chülietatuo.

⁶ A themiakoe tekuo jüketamia chü tuote; uko kepfhekoe uko cha tha kekrüwate, uko ze rürei kijüthouko gei vowa; kijüthou geinu kijükhru gei vorte, ukoe uko kebachüu rükra mote.

⁷ Uko kengu pete uko mezuliete, mu uko ngumvümiae sie, “Hiekoe jo mo, kekreilamonyü ukoe Jihova kemiatho sekebau, Jihova, uko puonuoko kemerüu gei phoumawaketa la zo,” siya.

⁸ Babilon nunu tatalie, mu Chaldia kijü nunu tuotalie, sidi puo kro taze ketuo mvüdo tuoiliecie.

⁹ Kekreilamonyü ae kijü pesotsa nu seyie kezhazhakecü bu sier Babilon perhieketuo hüshütuo, sidi ukoe puo perhietuoü dojüse thalietuo; sidi sünunu puo tezetatuo, uko theütsie-e terhümiavimia theütsie ciekesimia miapuorei puo dziethuo di la vorya kemomia mhie zotuo.

¹⁰ Chaldia pekawatuo; puo pekakecümia pete rei u kelhuo chülietuo, Jihovae siya.

¹¹ N thuo n nei ba rei, n thuo n noumvü ba rei, he-i a kayie pekakewako, nie thuo thuünuo nha cü di luokelie mhiei, mu kier tuoi ruo tha rei,

¹² N zuo bie kethenga tseishütuo, mu n penuokeshüpfü bie ketheseshütuo. Harie, puoe seyieko donu thelatho-u chütatuo, rayha, kijü keso, mu kijükesia chütatuo.

¹³ Kekreilamonyü Jihova nouyie la puo gei themia lhou lho, derei süu methuoto zotuo; Babilon khieki kevo kheko u mekeso chütuo mu puo rüzako la tiema di u keropfhe chütuo.

¹⁴ Babilon houlie di dojüse thalie, nie theü gayakezha kheko; ciepie puo peshülie, theütsie yopuorei peshashü hie, kekreilamonyü puo Jihova gei jowate.

¹⁵ Lutsahatsa nu puo perhie di shieshülie, “Puoe mia khro lete; puo mvüdzeko tetsute, puo dahouko mete.” Hau Jihova khepuukecü la, puo gei khepu lielie, puo chükeshü mhiei chüpie puo gei lashülie.

¹⁶ Babilon geinu tsiapruyakezhau dathewalie, mu lieyie teiki zhiepfhinuo rükreikezhau rei, kekreilamonyü mia pekakezha zhiechau pete la u thuo u themiamia ki votatuo, mu uko pete rei ta u kijü nu la votatuo.

¹⁷ Israel-e losha bu puo whuokewa tekuo puo chüte. Therieu Asiria kediu puo mezulie, mu tsie thela nu ro Babilon kediu Nebukadnezar bu puo ruko mehiewate.

¹⁸ Süla, krodiko Jihova, Israel Kepenuopfüe puya: Ae Babilon kediu mu puo kijüu siazha pie tsütuo, ae Asiria kediu siazha pie tsükeshü mhieshütuo.

¹⁹ Ae Israel ze la vor puo tuo kijü nu lashütuo, sidi puoe Karmel mu Bashan nunu puo vapfhülietuo, tsiu Efraim kijükhruko gei siro Gilid nunu puo valuo chülietuo.

²⁰ Teisozha süko nu mu süteiki, Israel kejo pfhü sietuo, derei puo rei ngulie lho, Jihovae siya, siro Juda kephoumako pfhü sietuo, mu puorei ngulie lho; kekreilamonyü ae lhiepie kebako kejokemou vashü tsüwatuo.

²¹ Merathaim kijü nu kholie; kho di puo perhielie, tsiu Pekod nu kelhouko perhielie sidi thelathoko rei peka tseiwatuo, Jihovae siya; a nieko ki diekhakeshü pete chülie.

²² Kijü nu terhü kechü pfhe, mu mha peka kemeriekecü pfhe si bate!

²³ Kimhie di kijü pete metevüu dathewa mu bie pesuoshü shi! Kimhie di Babilon-e seyieko donu kemeriekecü puo chüte shi!

²⁴ N thuo kebie pethoupie zhü sidi n maliete, he-i Babilon, derei noe süu si mo; n ngulie sidi n telie, no Jihova chieketa la.

²⁵ Jihova puo rünyiebou hieshüte, sidi puo noupfhünouyie rünyieko se parte, Chaldiamia kijü nu krodiko Niepuu Ukepenuopfüe mhatho chüshü morosuo keba la.

²⁶ Kijü ke diako nunu vor puo perhiecie; puo lhakiko khrüshülie; süko pfhepie puo bu kepupfü zhütalie, sidi peka lotsowalie; puo vie puorei peshashü hie.

²⁷ Puo thudoko pete dukhriwalie, süko bu kedukhri nu votalie. He-i uko la, uko teisozhau vorte, uko siazha nguketuo teisozhau!

²⁸ Rünyüliecie! Babilon kijü nunu tatuoketako mu kitamiako Zion nu vor di Jihova úko Kepenuopfü khepuu, puo rüsuoki khepuu pesishütuoüzhie.

²⁹ Theü kepieko kie kengupie Babilon perhiecie, theü gayakezha pete. Puo khieümhoura houpfü balie; miapuorei bu taprata hie. Puo mhatho kheki sü chü puo tsücie; puo chükeshü kemhie tou di sükemhie chüpie puo gei shülie, puoe kemiako di Jihova Israel Kemesau perhukecü la.

³⁰ Süla puo khriesako chaüko nu tetsutatuo, siro teisozha sünhie puo chüpahiko pete dathewatuo, Jihovae siya.

³¹ Ae n perhieya, he-i, kemiakokecüu, krodiko Niepuu Jihovae siya; kekreilamonyü n teisozha vorte, a n siazha khashüketuo teiu.

³² Kemiakokezhau puo phi mesülie di tetsutatuo, miapuorei puo phoushülie lho, siro a puo nadiko nu mi petushütuo, sidi puo houpfü keba pete thewatuo.

³³ Krodiko Jihovae puya: Israelmiako mu Judamiako rei sa pechüwate, uko tepie kedie chükecüko pete uko thezetsalie di uko bu tuotalie kenjüte.

³⁴ Uko Rhakelieue kuo; puo za sü krodiko Jihova zo. Puoe uko la pu menuo zotuo, mu puoe kerülei khapie kijü gei shütuo, derei Babilon nu kelhouko we kerülei balie lho.

³⁵ Jihovae puya, Chaldia petsoukecü zhiecha puo, mu Babilon nu kelhouko petsoukecü zhiecha puo, tsiu puo kezhako mu puo themia mhakesiko petsoukecü zhiecha puo!

³⁶ Themoumia petsoukecü zhiecha puo, uko pie kenyamia chütaketuo la! Terhümiaviko petsoukecü zhiecha puo, uko pekawaketuo la!

³⁷ Puo kierko mu kierbageiko petsoukecü zhiecha puo, tsiu puo donu sikemomia petsoukecü zhiecha puo, uko pie thenumia mhiewaketuo la! Puo kinyi pete petsoukecü zhiecha puo, süko valieketuo la!

³⁸ Puo dzüko petsoukecü teikuo puo, sidi süko pesowaketuo la! Terhuorhiko kijü zokecü la, mu ukoe terhuorhiko se nya bate.

³⁹ Süla Babilon nu nhachüko haina khunuoko ze lhou batatuo, mu ostrik sünu lhoutatuo; sünu kechachie themia lhou salie lho, morei themia phou pete rei sünu lhoulie lho.

⁴⁰ Ukepenuopfüe Sodom mu Gomora siro unie zanuoko pekakewa tuoiwatuo, Jihovae siya, süla themia puorei sünu lhoulie lho, morei miapuorei sünu phetshe sa lho.

⁴¹ Mehoshücie, pesotsa nu themia vorzhie; kijü valatsa nu seyie kuo se mu kedi kekra mele sierzhie.

⁴² Ukoe theü mu rüngou thezese tuo, uko zhosuo mu mia ngumezhieya mo. Uko pfhe-e dzükezha mehokecü pfhe tuoi; uko kier gei tuo, terhü nu votuoü dojü seketuo tuoi dojüse tuo, n perhietuo üdi, he-i Babilon nuopfü!

⁴³ Babilon kediu uko dze sishü, sidi puo dzie pie mhapuorei chülie kenjü parta; thenou chükecü puo gei vorta, thenumia nuonuovachü tuoi di.

⁴⁴ Jordan ronyho-u nunu loshae sier di perinuoko tuo puo petsoukecü tuoi, ae puo kinu süko whuo mhaiwatuo, sidi ae kedakeliemia pie puo mho gei bawatuo. Kekreilamonyü supuo a mhie mu? Supuo a kielie ta? Tekuokepfhe supuonie a mhodzünu thalie ta?

⁴⁵ Süla Jihovae Babilon kijü la mharhüu, mu Chaldiamia kijü perhietuoü rhükelieu nie rünyüshücie: Tekuokro-u nunu kecüko teshü seta tou zotuo; ketho zo puo kro süu la puo mekeso chütuo.

⁴⁶ Babilon lielieketa pfhe sikeshü ki kijüu petatuo, tsiu seyieko donu puo kekra pfhe si votuo.