Jeremia 5 - Angami Naga CL (Re-edited) Bible (BSI)

Jerusalem mu Juda Kephoumako

¹ Nie ta Jerusalem chako nu lukihaki vocie, sidi mha meho whishü di siliecie! Puo kitiezhako nu pfhücie di nie-e themia puotou chüyakezhamia, ketho-u pfhüyakezhamia puo ngulie di, a bu Jerusalem kejo vashülieketuo la.

² Uko thuo sie, “Jihova rhei ketuo tuoi,” isikecü pu rei, uko tijü di rüse.

³ He-i Jihova, n mhi-e ketho-u pfhüya mo üme? Noe uko vüshü, derei uko kemezhiekecü rei silie mo; noe uko pekawa, derei ukoe pethapfülie mvüte. Ukoe uko zie chü perepie tsiekhrü ki rei khrükuowate; sidi ukoe la vor mvüte.

⁴ Süla ae sie, “Hako mhakejümia zo, ukoe u kele jü; kekreilamonyü ukoe Jihova chau, uko Kepenuopfü zho-u silie mote.

⁵ A bu kenyiko ki vo di uko ki mha pucie; ukoe Jihova chau, uko Kepenuopfü zho-u silieta tou zo,” sishü. Derei uko pete rei vocieu bietshewate, ukoe keroko biethewate.

⁶ Süla ketsa nunu losha puoe uko tewatuo, tsiu kijükesiara socie bu uko pekawatuo. Khurhü bu uko petsou di uko sünunu kepra kheko ciechücierha phawatuo, kekreilamonyü uko kephoumako krathorta ze ru, uko tsiesiethor vote.

⁷ Kimhie di a n kejo valietuo mu? N nuonuoko a khakegewate, tsiu uko terhuo kemo kro puo ki rüse. Ae uko vachü pevüshü tse, uko pieü chü tsiu thethenuko ko vo kengupfü bate.

⁸ Ukoe u mengu bu u ketshu chükecü kro puo, mia puopuokecü puo zanuou kimia penuo vo.

⁹ Mha hako la a siazha pie uko tsü zhü mo üme? Jihovae siya, tsiu seyie haikecü gei a a khepukecü mese mo üme?

¹⁰ Puo khubelie chau gei pfüthe vocie di pekawacie, derei puo thela chü tseiwa hie; puo coko zawalie, kekreilamonyü ukoe Jihova mia mote.

¹¹ Kekreilamonyü Israel kinuko mu Juda kinuko a pele mo tseite, Jihovae siya.

¹² Ukoe Jihova pu kecürüwate, sidi sie, “Puoe mhapuorei chüshü lho. Mha kesuo u gei vorlie lho, morei we zhiecha morei pekriekecü ngulie lho,” siya.

¹³ Siedzekesiko kemethuo teikhrie puo zo, dieu uko gei tuo mokecü la. Hamhiekecü pie uko gei chüshütuo!

¹⁴ Süla krodiko Kepenuopfü Jihovae puya: Ukoe die hako pucü la, a a die bu n me nu mi chütuo, sidi themia hako pie sei chütuo, sidi mi bu uko thewatuo.

¹⁵ Ae kepetsera nu seyie puo bu nieko gei vortuo ho, he-i Israel kinuko, Jihovae siya. Süu seyie kemetei puo, süu seyie kewe puo, seyie süu die no si mo, morei uko kedipuo pu ba shiü no silie lho.

¹⁶ Uko theüboue mekhru thiepie kezhü tuoi; uko pete rei terhümiavi kekuomia phre.

¹⁷ Uko n lha mu n kecüca cü phrelietuo; ukoe n nuonuo thepfumia mu thenunuoko cü phrelietuo; ukoe n kuokro tsiu n kicükiriko cülietuo; ukoe n khube tsiu n chiede cülietuo; nie dahou nadiko nie-e pele bayakezhako ukoe zhiecha pie pekawatuo.

¹⁸ Derei teisozha süko nu, a nieko peka tseiwa lho, Jihovae siya.

¹⁹ Siro n themiako sie, “Kiüdi úko Kepenuopfü Jihova mha hako pete pie u gei shü shi?” Sitse noe uko ki, “Nieko a khawata di nieko kijü nu terhuo kekrei rüsuoketa tuoi, nieko bu nie kijü kemora nu kekreimia lie chütuo,” situo.

²⁰ Mha hau pie Jakob kinuko ki pushülie, tsiu süu pie Juda nu pesishülie:

²¹ Hau rünyüliecie, he-i kenya mu mhalekemo themiako, u mhi ba, derei nguya kemoko, u nyie ba, derei mhapfhe siya kemoko.

²² Nieko a prei mo me? Jihovae siya; Nieko a mhodzünu peta mo üme? A huocanyo pie dzükezha nu therie chüshü, kechachie nie süu pfüphalie kenjü; dzü thuo rüpfhü sie zorei, ukoe süu pfüphalie lho, uko pfhe kemerie chü zorei, ukoe süu tsepalie lho.

²³ Derei themia hako u nou khrüthor mu mia perhie tuoya; uko rüreite sidi tuote.

²⁴ Uko nou nu, “Úko Kepenuopfü Jihova preilie khe, puoe puotei nu teirü khashü, therü teirü mu bayie teirü khashüya, tsiu úko la lieyie tei zhadoudo rei khashü,” idi leya mo.

²⁵ Nieko kesuokoe mha hako kelawate, tsiu nieko kephoumae nieko lanu mha keviko khase bate.

²⁶ Kekreilamonyü a themiako donu themia kesuomia bacü nguliete; uko mia kekreimia vie pielieya. Ukoe kebie pethoupie kebamia tuoi; uko themia malieya.

²⁷ Pera ra puo nu pera thuo tshupfü keba tuoi, Uko kiko nu mha sekedokecü bu tshupfü ba; süla ukoe zha miemielie mu mhanyilie,

²⁸ Ukoe luo mu meju ba. Ukoe mha kesuo kechütsa we puo kela si mo; ukoe merünuomia bu kuolietuo üdi kethoca nu capi chüya mo, tsiu ukoe ketsopfhümia mezhüu rüguoya mo.

²⁹ Mha hako la a uko pechü zhü mo üme? Siro seyie haikecümia gei a khepukecü mese mo üme? Jihovae siya.

³⁰ Kijü nu mha u ngo zokecü tsiu kemeriekecü puo chüwate:

³¹ Siedzekesiko ketijü siedzedie pu, mu zievokoe siedzekesiko pukeshü medzi di mha kekha; a themiakoe sikecü u neite, derei nieko puo thela kevor nhie kedipuo chütuo ga?