Jeremia 49 - Angami Naga CL (Re-edited) Bible (BSI)

Ammonmia Nyie Pepikewa

¹ Ammonmia dze pukeshü. Jihovae puya: Israel-e puo nuo thepfumia jü me? Puoe puo kayiemia jü me? Kiüdi Milkom-e Gad penyü se bata ga? mu puo themiako puo rünako nu lhou bata ga?

² Süla teisozhau vor touzhü zo, Jihovae siya, ae Ammonmia Raba petsoukecü terhü pfheu pesishütuo; süue methuokezhü thou chü, mu puo rünako mi pie thewatuo; sitse Israel-e puo penyükeliemia penyüwatuo, Jihovae siya.

³ Krakhouilie, he-i Heshbon, Ai-e ruozhüketa la! Kraliecie, he-i Raba nuopfüko! Gakhropfhe dzielie, thekrü chülie, sidi seiro pie n thuo n vülie! Kekreilamonyü Milkom-e puo zievoko, mu puo kezeko sa di miadie chü votatuo.

⁴ Kiüdi no n thuo n kekuo la kemelhaya ga? N kekuo rükretatuo, he-i tsiesieketa nuopfü. N kinyiko pele di sie, “Supuo a penyülie ta?” iya.

⁵ N zanuomia kinu ae kemichie se vor n gei shütuo, krodiko Niepuu Jihovae siya, sidi niekoe mia puopuokecü rükri ta cüretatuo, miapuorei rüshü ketuoko pfhü kengulie lho.

⁶ Derei süsie ae Ammonmia ruo chü pevi lashütuo, Jihovae siya.

Edom Nyie Pepikewa

⁷ Edom dze kepu. Krodiko Jihovae puya: Teman nu mhasi ba sa mote me? Mhakelemia gei kepetha jüte me? Uko mhasi jüte me?

⁸ Talie, rüreilie, kerünuo nu kelie, Dedan nu kelhoumiako! Kekreilamonyü a Esau kemezhiekecü se puo gei vorshütuo, kepechü kha puo ketsü tei nhie.

⁹ Khubesi pfhü kengukezhamia n ki vor ro, uko huo khapie ba lho üme? Kerügumia theva ze vor ro, ukoe liekenyüu rübei chüsetatuo.

¹⁰ Derei ae Esau pfhenei rhuo tseiwate, ae puo kepekhre chüko hielashüte, mu puoe puo thuo puo kevielie kenjütatuo. Puo tsunuonuo pekawate, puo siezedzüriemia mu puo zanuomia rei; mu puoe ba sa mote.

¹¹ Nie merünuoko khapie bawalie, ae uko perheise balietuo; mu nie samipfüko bu a pele balie.

¹² Kekreilamonyü Jihovae puya: Mhanuü nieko mia huo tehie hau kriekecü mese moü ba rei süu krie zotuo, no siazhau ngulie lhoü ba me? No siazha ngu motalie lho; no süu krie bei zotuo.

¹³ Kekreilamonyü a a thuo rüseshüte, Jihovae siya, süusü Bozramia pie merie mu krenyü viepuo, kemethuo, mu rüsekecü vie puo chütatuo; mu puo rünako pete kechachie ra zhütatuo.

¹⁴ Ae Jihova kinu dielie puo sishüte, mu dieliemia puo ketsepie seyieko donu shü di sie: “Nie thuo nie kezulie di vor puo perhiecie, tsiu terhü la sieliecie!” isi.

¹⁵ Kekreilamonyü ae nieko chüpie seyieko donu kecütho chüwatuo, tsiu themia bu u thikecü chüwatuo.

¹⁶ N ngu merieketuou mu n melou kemiako ketuou n sewate, no tsiekrie zü gei lhou tuoyakezhau, kijükhru mezü teshüse tuoyakezhau. No n kru chü kerükriepie tsüüra tuoilie zorei, a sünunu n teshü kerwatuo, Jihovae siya.

¹⁷ Edom-e mia bu meriekecü puo chütatuo; sidi kehoupuorei süu pfüthe kevo pete u ngo mu rütsetatuo süu pekaperuowaketa la.

¹⁸ Sodom mu Gomora siro uko zanuomiako penyükewa mhiei, Jihovae puya, sütuoi miapuorei sünu balie lho, morei themia puorei sünu lhou lho.

¹⁹ Losha puoe Jordan tsa kesoutho nunu sier nha pejo sei keba thechü perhiekecü tuoi, a sünunu Edom whuo mhaiwatuo; sidi a kedakelie pie süu mho kekhatatuo, kekreilamonyü supuo a mhie ga? Supuo a kielie ta? A mhodzüki thalieketuo kuopfheu sü supuo ga?

²⁰ Süla Jihovae Edom perhietuo üdi rhükeshü mu Teman nu kelhouko perhietuo üdi chükelie rünyüshücie: ketho zo tekuoko donu kecüthoyo zorei teshüsetatuo; ketho zo uko kro-u uko kepekau la kemerie chütatuo.

²¹ Uko tetsuketa pfhe sikecü ki kijüu meletatuo; uko krakeshü ki Kemerie Dzükezhau nu rei si vo tsotatuo.

²² Harie, puoe tsüüra tuoi thukho mu thukertuo, sidi puo shü kelhapie Bozra petsoutuo, mu teisozha sünhie Edom nu terhümiavimiako meloue thenumia nuonuovachü tuoitatuo.

Damaska Nyie Pepikewa

²³ Damaska dze pukeshü. Hamat mu Arpad u ziejü bate, kekreilamonyü ukoe thedze kesuo site; ukoe michie di zejüte, ukoe dzükezha kerüpfhü tuoi bate, süue kemekrie balie kenjüte.

²⁴ Damaska thachü miemiete, puoe tatatuoü rüreite, kemichieu puo gei vorte; thenou kemezhiekecü mu nousuo puo gei vorte, thenumia nuonuovachü tuoi di.

²⁵ Kimhie di nadi kemeyieu khawate shi, kenei nadiu lie!

²⁶ Süla teisozha sünhie khriesako ziekeko nunu tetsutatuo, mu chüpahimiako pete pekawatuo, krodiko Jihovae siya.

²⁷ Siro ae Damaska dahou nu mi petushütuo, sidi süu Ben-hadad dahouko thewatuo.

Kedar mu Hazor Nyie Pepikewa

²⁸ Kedar mu Hazor kedirüvie Babilon kediu Nebukadnezar-e pekakewako dze pukecü. Jihovae puya: Sielie, Kedar perhietuoü kholie! Niathutsa themiako pekawalie!

²⁹ Uko pfhekiko mu uko kicükiriko setalie, uko kikhapfheko mu uko nyaürako pete, nie la uko utko setalie, mu shiekhoui di sie: “Kemichie lutsahatsa bate” ishülie.

³⁰ Tatalie, kepetse nu votalie, thechü kesou nu rüshütalie, he-i Hazor nu kelhouko! Jihovae siya. Kekreilamonyü Babilon kediu Nebukadnezar-e nie perhieketuo la mharhüliete mu nie perhieketuo la mharhü puo chüliete.

³¹ Sielie, di rüü keba seyie khrukhre di lhou kebau, perhiecie, Jihovae siya, uko kharu morei uko cakha kejümiako, u rübei lhou tuoyakezhamia ki votalie.

³² Uko utko ketaliete, uko kicükiri pekawate. Ae u tsüle thiekepfümia bu teikhrie pete nu ta votatuo, siro lutsahatsa nu kepeka se uko gei shütuo, Jihovae siya.

³³ Hazor pie meseru bou chüwatuo, kechachie methuotatuo; miapuorei sünu lhou lho, morei miapuorei sünu tuo motatuo.

Elam Nyie Pepikewa

³⁴ Jihova die Juda kediu Zedekia di sedekelie ki Elam perhieketuo la Jeremia siedzekesiu ki vor.

³⁵ Krodiko Jihovae puya: Ae Elam theüu, uko kekuo kezhau bietshewatuo;

³⁶ mu ae teigei puo ke diako geinu teikhrie diako se Elam gei vortuo; mu a uko whuo kecürepie teikhrie hako nu shütuo, sidi Elam nu whuokeshü themiako vo kemo seyie puorei tuolie lho.

³⁷ Ae Elam ngumvüko mu puo kerheiro pfhü ketuoko mhodzünu puo chü kemideshütuo; ae kepeka mu a noupfhüu se uko gei vorshütuo, Jihovae siya. Ae zhiechau ketsepie uko whuotuo, a uko pekawa kemochie situo zotuo;

³⁸ tsiu a kediu pie Elam gei shülietuo, sidi uko kediko mu kezhako pekawatuo, Jihovae siya.

³⁹ Derei teisozha thelatsa ae Elam miadie chü ketuoko ze la vorshütuo, Jihovae siya.