Jeremia 48 - Angami Naga CL (Re-edited) Bible (BSI)

Moab Nyie Pepikewa

¹ Moab dze pukeshü. Krodiko Jihova, Israel Kepenuopfüe puya: Nebo we ce, chülietie, puoe methuo zhüte! Kiriathaim pie thenga chüwate, süu lieliete; dahouko pie thenga chüwate mu bierhuowate;

² Moab za kemeyie tuo sa mote. Heshbon nunu uko puo petsoutuo üdi mha kesuo rhü: “Vorlie, úko puo bu seyie puo chü motatuoü puo dathewa khe!” No rei sa, he-i Madmen, n bu kemekrietatuo; zhiecha bu n whuotuo.

³ Rünyüliecie! Horonaim nunu kekra pfhe puo, “Thedzükezei mu kadikate!”

⁴ “Moab pekawate!” puo nuonuo kecüko kra bate.

⁵ Kekreilamonyü Luhit kekho chau nu kra kemerie chü khotuo, kekreilamonyü Horonaim ketsu nunu keker chau nu uko kemezhie di krakecü pfhe sishü.

⁶ Talie! Nie thuo nie kelaliecie! Kijükesia nu nha gada tuoiliecie!

⁷ Ketho zo, nieko nie dahou kemetei mu nie kinyi pelecü la, nie rei sa lielietatuo; Kemosh-e puo zievoko, mu puo zetuoko sa di miadie chü votatuo.

⁸ Mha kepekamia rüna pete nu votuo, mu rüna puorei talie lho; razhako katatuo, mu kijü thezhau pekawatuo, Jihova pukeshü tuoi zotuo.

⁹ Moab la metsie kha kreipie bacie, kekreilamonyü puoe tetsu tou zotuo, puo rünako thedzükezei chütatuo, miapuorei sünu lhou lho.

¹⁰ Jihova lie kechü nu kemecüu bu rüsepfücie; siro thezie nunu puo zhiecha shükhrekewau bu rüsepfücie.

¹¹ Moab-e puo khriesa nu rüü di lhou, zu rüleketa tuoi puokhie gei lhou, puoe mhabou puo nunu lapie kekrei puo nu shü mo, morei kita chüta mo, süla puo kelheu ba mu puo reu suota mo zo.

¹² Süla puoteiu vor touzhie, Jihovae siya, süki ae la kedishüyakezhamia ketsepie puo ki shü di puo bu la kedishütuo, mu puo mhabouko chü kemethuowatuo, tsiu puo hiepouko biephrowatuo.

¹³ Sitse Moab-e Kemosh la mengalietuo, Israel kinukoe Bethel, ukoe peleketuou la mengakelie tuoituo.

¹⁴ Niekoe kedipuo mhie di, “Hie kekuomia we mu terhümiavimia” iya ga?

¹⁵ Moab mu puo rünako pekakewau parte, mu puo khriesa kevithoko kedukhri nu tsute, kediue siya, puo zae krodiko Jihova.

¹⁶ Moab kepeka vor penuo bate siro puo pechüketuo penuotei bate.

¹⁷ Nie puo zanuomia pete, puo krükraliecie, tsiu puo za kesi peteko sie di, “Kimhie di kethe kemeteiu mu seiro keziviu bietsheliete shi” sikecü putuo.

¹⁸ Dibon nuopfü zapuzayieu nunu kerliecie, sidi kijü sotoikecü nu balie! Kekreilamonyü Moab kepekau n perhietuoü parte; puoe n badiko pekawatuo.

¹⁹ Cha khieki tha di pfhe balie, nie Aroermiako! Sidi takezhüu mu tazhükecüpfü ketsocie; sidi, “Kedipuo chüta ga?” isicie.

²⁰ Moab pie thenga nu shüwate, puo bierhuowaketa la; ruorüi di kraliecie! Moab methuo zhüketa, pie Arnon nu pushülie.

²¹ Kijü thezhau gei, Holon gei, mu Jahza mu Mefat gei,

²² Dibon gei, siro Bet-diblathaim,

²³ mu Kiriathaim, mu Bet-gamul, tsiu Bet-meon,

²⁴ siro Keriot mu Bozra, tsiu Moab kijü nu rüna pete kepetse nu mu kepenuo pete gei dienya kecüketuo vorte.

²⁵ Moab kiau bietshewa, mu puo bou bietshewate, Jihovae siya.

²⁶ Puo bu meze batalie, puoe puo thuo puo chü pezhapie Jihova petsoukecü la; Moab bu puo merü nu rüphrepfü zhülie; puo rei mia krenyü chü batatuo.

²⁷ Israel pie nie krenyü chüte; kerüguko donunu puo telie mo zo ürei, derei kehoukipuorei puo dze pushü ro n tsü tsügetatuo!

²⁸ Rünako khawalie, sidi vo tsiekrie gei lhoulie, he-i Moab nu kelhouko! Mekhru tsiekrie kecieki he nunu puo kru chüyakezha tuoitalie.

²⁹ Hiekoe Moab kemiako ketuo si, puoe kemiakothor zo, puo rükriekecü, puo kelhiekecü, mu mia rünyü kemo, tsiu puo nou kerüzhakecü.

³⁰ A a thuo puo nou kerüzhakecü si, Jihovae siya; puo kemelha ketuoko, puo mhathoko kemeda zo.

³¹ Süla ae Moab krü kra; ae Moab pete la kra; Kir-heres themiako la a thekrü chüya.

³² Jazer ki rei a n la krakuo, he-i Sibma khubebo-u! N cokoe dzükezha mho kra vote, Jazer ketso vote; mha kepekamia n teile nhasiko mu khube vi kreikecüko gei tsurte.

³³ Moab kijü kruokezhüu nunu kenei mu thenou kemvü chüsete; ae khubedzü kethe nunu khubedzü bu par sa mote; miapuorei kenei nu shie di khubedzü the sa mote; shie kebau u nei di shie ba mote.

³⁴ Heshbon mu Eliale shiekhouite; uko pfhe Jahaz ketso rei vote, Zoar nunu Horonaim nu ketso mu Eglat-shelishiya ketso si vote, Nimrim dzüko soketa la.

³⁵ Sidi ae Moab pie puo thela chüwatuo, Jihovae siya, thechü kerükrie geinu ruosuo kechümia siro mha pie uko rhuoko tsüyakezhako.

³⁶ Süla a meloue Moab la luoü kekhou pfhe tuoitatuo, siro a meloue Kir-heres themiako la luoü kekhou pfhe tuoitatuo; kekreilamonyü uko ngukelie kinyiko kaüjütatuo.

³⁷ Themiako tsü pete thiewa mu themia pete tiemie thiewate; themia pete dzie gei geikewa batatuo, mu u chieca gei gakhropfhe se tuo.

³⁸ Moab nu ki tsü gei mu chaüko nu thekrü sie mhapuorei ba sa mote, kekreilamonyü mhabou u nei kemo puo tuoi ae Moab biephrowate, Jihovae siya.

³⁹ Kimhie di süu biephrowate shi! Kiüdi uko kra ba shi, kimhie di Moab-e menga di puo chie kereiliete shi! Süla Moab-e puo zanuomia pete krenyü mu meriekecü puo chüte.

⁴⁰ Jihovae puya: Mehoshücie, puoe tsüürapfü tuoi thu tsur, sidi puoshü kelhapie Moab petsou bate;

⁴¹ rünako lielietuo mu dahou kemeteiko telietuo. Sünhie Moab terhümiaviko meloue thenumia nuonuovachü melou tuoitatuo.

⁴² Moab-e seyie puo ükecü nunu puo pekawa, kekreilamonyü puoe puo thuo puo chü pezhapie Jihova petsoute.

⁴³ Kemichie, thekhe, mu kebie n mhodzünu zhüte, he-i Moab nu kelhouko, Jihovae siya.

⁴⁴ Kemichie prei di taketuou tese thekhe nu tsutuo, mu kehoupuorei thekheu nu partuoükezhüu kebie nunu puo malietuo. Kekreilamonyü ae siazha pie uko tsüketuo teicieu nu mha hako se Moab gei vortuo, Jihovae siya.

⁴⁵ Ta ketuoko mezie di Heshbon khrü rüzhü thata; kekreilamonyü Heshbon nunu mi tu parte, Sihon kiu nunu miü par; sidi Moab teikhie bie pesuowa, rübvürübie ketuo themia tsüleu thewa.

⁴⁶ He-i Moab, no we ce, chülietie! Kemosh themiako kate, n nuonuo thepfuko teze kedie chü voketa la, mu n nuopfüko miadie chü vote.

⁴⁷ Sirei ae teisozha thelatsa Moab miadie chü ketuo nu ze la vorshütuo, Jihovae siya. Moab dienyakecükecü haha ketso.