Jeremia 47 - Angami Naga CL (Re-edited) Bible (BSI)

Filistinmia Pechüketuo

¹ Faroe Gaza pekakewa mhodzü, Jeremia siedzekesiu geinu Jihova die Filistinmia dze pukeshü:

² Jihovae puya: Harie, pesotsa nu dzü kru kra sierzhie mu süu dzüdi tsu rüyo votatuo; ukoe kijüu mu sünu keba pete, nadiu mu sünu lhouketuo pete tshurüyo votatuo. Themiako kratuo, mu kijüu gei lhouketuo pete kra kemerietatuo.

³ Puo kier phiko phitakecü pfhe sikeshü ki, kierbagei pfhe sikeshü ki, puo thuoko rütoukecü pfhe sikeshü ki, miapuonuoko rürei vo unuonuo meho lho, uko thachü phiketa la.

⁴ Kekreilamonyü Filistinmia kepeka teisozha vorkezhü la, Tur mu Sidon nu kekhruohi khapie keba pete dathewaketuo la. Kekreilamonyü Jihovae Filistinmia Kaftor dzü khie kijüko khapie kebako pekawatuo.

⁵ Gaza nu kebako tsü thiewate, Ashkelon kemekrie bate. He-i uko kekuo lhiepie kebako! No kedithechiepuo n thuo n rha batieya ga?

⁶ He-i, Jihova zhiechau! No kemekrie bakelie mhodzü kichiepuo ba ta? N thuo n chüpie zhiesha nu shüwalie, sidi rülei mu kemekrie batalie!

⁷ Jihova diekhashüwata ro, kichiepuo kemekrie balietuo ga? Ashkelon mu dzükezha khie perhieketuo la puotei chieshüwate.