Jeremia 46 - Angami Naga CL (Re-edited) Bible (BSI)

Ijipt Nyie Pepikewa

¹ Jihova die seyieko dze Jeremia siedzekesiu ki vor.

² Ijipt dze la, Ijipt kediu Faro Neko chüpahi dze, Karkemish nu Eufrat rü khie ba di Babilon kediu Nebukadnezar Juda kediu Josia nuou Jehoiakim kedi chükelie cie dia ki penyülie:

³ Nie keya mu pezhü keselie, sidi rüyachü nu volie!

⁴ Kierko keseshülie; süko gei sielie! Nie thegi tsüre pfü di thechüko nu thaliecie, rüngouko chü kemevalie, thegi boulie seliecie!

⁵ Kiüdi süko michie keba a ngu ga? Uko tsiesiete; uko terhümiavimiako penyüwate, sidi kenourhei tate. Uko rürei pesie la mo zo, kemeriekecü thuo lutsahatsa houpfü! Jihovae puya.

⁶ Kemerhümia rei talie lhote, morei terhümiavimia talie lhote; pesotsa Eufrat rü khie nu uko phi mesülie di tetsu zhüte.

⁷ Nail dzü rükrie siekezhü tuoikecü supuo ga, Kerü dzükru tuoikezhü hau supuo ga?

⁸ Ijipt-e Nail tuoi sie, kerü dzükru tuoi sie. Puoe sie, a bu rükrie sielie, a bu kijüu vupfü volie, a bu nadiko mu sünu lhou kebako pekawalie.

⁹ He-i kierko, pedzüshülie, thu zo volie, he-i kierbageiko! Terhümiavimia bu tuoshülie: Ethiopiamia mu Libiamia pezhü pie ketuoko, Lidiamia, theü keseko.

¹⁰ Süue krodiko Niepuu Ukepenuopfü teisozhaute, khepukelie teisozha puo, puoe puo ngumvümia gei khepu lietuo. Zhiechaue mha peka mu mezu tseilietuo, tsiu süko zie krie u kelhuo chütuo. Kekreilamonyü krodiko Niepuu Ukepenuopfüe kijü pesotsa Eufrat rü khie nu ruosuo puo khashü ba.

¹¹ Gilid nu kholie, tsiu daru seliecie, he-i Ijipt rüü phousepfü! Noe kemethuo nu daru kekra sewate; sirei n chü kemenelieketuo tuo mo.

¹² Seyieko n ngau sishüte, mu n kekra thuo kijüu tshute; kekreilamonyü terhümia thuo terhümia petsou di u phi mesülie; unie kenienie rei tetsute.

Babilon-e Ijipt Perhieketuo

¹³ Jihovae Jeremia siedzekesiu ki Babilon kediu Nebukadnezar kedipuo kemhie vor di Ijipt kijü perhietie shikecü dze kepu:

¹⁴ Ijipt nu pushülie, siro Migdol nu pesishülie; Nof nu, siro Tahpanhe nu pesishülie; sidi sie, “Nie thau nu thalie mu dojüliecie, kekreilamonyü zhiecha thuo n khie n mhou houpfü kethako pekawatuo,” sishülie.

¹⁵ Kiüdi Apis tata shi? Kiüdi n thudo-u thalie mote shi? Kekreilamonyü Jihova puo biekhrüwate.

¹⁶ Nie mia kekra u phi mesü di tetsute, mu mia puoe kekreiu ki, “Khe, úko la se u themiamia ki mu u rakhe nu vota khe, kekreilamonyü zhiecha kepekau la,” sita.

¹⁷ Theza hau pie Ijipt kediu Faro tsüshülie, “Kemelhakezhau puo teiu vajowate,” isilie.

¹⁸ Kediu sie, a rhei ketuo tuoi, puo zae krodiko Jihova, kijüthouko donu Tabor tuoi, tsiu dzükezha khie Karmel tuoi, sikecü puo vorzhie.

¹⁹ Ijipt nu lhouketuo nuopfüko, kedie chü votaketuo la dojüliecie! Kekreilamonyü Memfis-e katatuo, miapuorei lhou mo di methuotatuo.

²⁰ Ijipt-e thuünuo kezivi puo, sirei kepeka khudounuo puo pesotsa nu vor puo gei batuo.

²¹ Puo zhakhrü ze ketuoko zorei thudo puo phou keviko mhie zo, uko rei tsiesiete tsiu keze tate, ukoe thalie mo, kepeka teiu uko gei vorketa la, uko siazha teiute.

²² Puoe tinyhü rüyie vokezhü pfhe kemhie chüya; kekreilamonyü puo ngumvüko kuo phi di thatuo, sidi seidurü se sei kewi tuoi, puo petsou vortuo.

²³ Ukoe puo ketsako wiwatuo, Jihovae siya, puo thuo pfüphakelie jü shierei, kekreilamonyü ukoe kuprie ki rei krakuo, uko phrü hulie kenjü zo.

²⁴ Ijipt nuopfüko pie thenga chüwatuo; sidi puo khapie pesotsa nu kevor themiau dzie nu shüwatuo.

²⁵ Krodiko Jihova, Israel Kepenuopfüe pucü: Harie, ae siazha pie Thebes nu Amon mu Faro, siro Ijipt mu puo rhuoko, tsiu puo kediko, Faro rei mu puo peleyakezha pete tsütuo.

²⁶ Uko pie uko kerheiro pfhü ketuoko dzie nu, tsiu pie Babilon kediu Nebukadnezar mu puo kezhako dzie nu shüwatuo. Süsie thiedzü teiki tuoi themia Ijipt nu lhou lalietuo, Jihovae siya.

Ukepenuopfüe Israel Kelakelie

²⁷ Derei no we, michie hiecie, a kituou Jakob, tsiu thedzü zeita hie, he-i Israel; kekreilamonyü ae kepetsera nu n kelashütuo, mu kedie chü ketuo nunu n nuosenuoyieko kelashütuo. Jakob-e la vorlietuo mu rüleitshüi tsiu rüü batatuo, mu miapuorei puo chüpie michielie lho.

²⁸ No zowe, michie hiecie, a kituou Jakob, Jihovae siya, ae n ze tuo zokecü la. Ae n whuokeshü seyie pete bie pejüwatuo, derei a n bie pejüwalie lho! A mejü tou di kemezhü nunu n pethashütuo, mu siazha sa mo di n khawalie lho zo.