Jeremia 44 - Angami Naga CL (Re-edited) Bible (BSI)

Terhuorhi Kerüsuo Pejokeshü

¹ Judamia Ijipt kijü, Migdol nu, Tahpanhe nu, Memfis nu, mu Pathros nu kelhouko la die Jeremia ki vor,

² Krodiko Jihova, Israel Kepenuopfüe puya: Nie thuo ae kepeka se Jerusalem nu mu Juda rünako pete nu kevor ngushüte, süko mehoshücie; thie süko methuo zhüte, süko nu miapuorei lhou keba jü,

³ kekreilamonyü uko mha kesuo chü di, a nou chü kemeyiekecü la, süu uko mha pie vo si kemo rhuo, uko rei nieko rei mu nie puonuo rei si kemo rhuo lie chü.

⁴ Sizorei ae pete mo zo di a kituo siedzekesi pete ketseshü di sie, “A nie ki chaya a ngumecükecü mha kerütsekecü hako chü hiecie!” isi.

⁵ Derei uko rünyü mvü mu u nyie kedeishü mo, u mhatho kesuo nunu rürei mo mu mha thepie terhuo kekrei tsü suokecü nunu rei.

⁶ Süla a noupfhünouyie rushüwa sidi Juda rünako tsiu Jerusalem chaüko thewa, sidi süko rate tsiu methuo zhüte, süko thie rei sizhü zo.

⁷ Süla krodiko Jihova, Israel Kepenuopfüe puya: Kedipuo la üdi nie mha kesuo haha chüpie nie thuo nie pesuo, mu Juda nunu thepfumia, mu thenumia, nhicumia mu nuoranuomia dathewa, sidi nie miapuorei lhiekelie jüta ga?

⁸ Kiüdi nie dzie mhatho mu mha pie Ijipt kijü, nieko lhoutuoü keba nu terhuo kekrei tsü di a nou bie kerüpeya ga? Nieko kelhikewamia tsiu kijü nu seyie pete donu mia krenyü chü mu rüsekepfümia chütatuo me?

⁹ Nie puonuoko, Juda kediko, uko kimiako, nie mhatho kesuo, tsiu nie kimiako mhatho kesuo, Juda kijü nu, tsiu Jerusalem chaüko nu chükecü rükra mote me?

¹⁰ Ukoe thie ketso rei uko nou rünuolie mo morei michielie mo, morei a zho tsiu ae chünu di khapie nie mhodzünu mu nie puonuoko mhodzünu keshü nu tuolie mo.

¹¹ Süla krodiko Jihova, Israel Kepenuopfüe puya: A kepeka se vortuoü, tsiu Juda pejülotsowatuoü a pepiliete.

¹² Siro ae Juda lhiepie kebako Ijipt kijü nu lhoutuo üdi le terü tuoketako chülietuo, sidi uko pejüwatuo, kehoupuorei; Ijipt kijü nu tetsutatuo; zhiecha geinu tsiu pekriekecü geinu uko pejüwatuo, kecütho-u nunu vo kezhatho-u ketso, zhiecha geinu mu pekriekecü geinu siatatuo, sidi uko kerütsekecü chütatuo siro mia bu uko ngu merie tsiu rüsepfü mu mia bu u thikecü chütatuo.

¹³ Siro ae zhiecha geinu, pekriekecü geinu, tsiu thepetheruo geinu siazha pie Jerusalem ketsü tuoi, Ijipt nu kelhouko siazha pie tsütuo.

¹⁴ Sitse Juda themia Ijipt nu lhoutuoü voketamiako miapuorei talie lho morei la Juda kijü nu volie lho. Ukoe sünu la vor nyü zorei vorlie kenjütatuo, ta rüzukelieko zo kemosie miapuorei la volie lho.

¹⁵ Sitse u kimianuoe mha pie terhuo kekrei tsükecü kesimiako, siro thenumia süki ketha pete, themia kekra, Ijipt kijü Pathros nu kelhou themia pete Jeremia die kela di sie:

¹⁶ “No Jihova za nunu hie ki kepu dieko la we, hieko n pfhe rünyülie lho.

¹⁷ Süu monyü, hieko rüsekeshü pete chütuo, mha pie teigei kedipfü tsükecü tsiu kekrie ruosuo rupie puo tsükecü, thiedzü Juda kijü nu mu Jerusalem chaüko nunu hieko rei, hie puonuoko rei, hie kediko rei, hie mhokezhako rei chü kevor tuoi, chü tou zotuo. Hieko kecükekrie nyi phi vor, tsiu kruo phi, tsiu theruokesuo puorei ngu mo vor zo.

¹⁸ Derei ruosuo chüpie teigei kedipfü tsükecü, tsiu kekrie ruosuo rupie puo tsükecü khawaketa sie, hie mha pete nu tsopfhüte, sidi zhiecha mu pekriekecü bu hie pekawate,” sita.

¹⁹ Siro thenukoe sie, “Hieko mha pie teigei kedipfü tsükecü ki kekrie ruosuo rupie puo tsükecü ki, niekhrüda rie pie puo rüsuokecü ki, tsiu kekrie ruosuo rupie puo tsükecü ki, hie nupfunuoko sa mo di chüücü noe le ba me?” sita.

²⁰ Sitse Jeremiae thepfumia mu thenumia, siro die süu pie puo die kelakeshü peteko ki:

²¹ “Nieko Juda rünako nu tsiu Jerusalem chaüko nu mha khakeshü, nie mu nie puonuoko, nie kediko siro kezhako, mu kijü nu themiako Jihovae süko rükraya mo üme? Siro süu puo sie le vorya moü me?

²² Jihova nie mhatho kesuo mu mha kerütsekecü kechü la shügeshühie salie kenjüte, süla nie kijü methuo zhüte tsiu rate mu rüsepfü di, miapuorei lhou ba mote, thie sümhie zhü zo.

²³ Süue kekreilamonyü nie-e mha thepie puo tsü, siro nieko Jihova gei joketa la sidi Jihova pfhe zelie mo morei puo zho nu mu puoe chünukeshüko nu tsiu puo zhapuko nu tuolie mo, süla mha kesuo hau nie gei vorte, thie ketso sükemhiete,” sishü.

²⁴ Siro Jeremiae sie themia pete mu thenumia peteko ki, “Ijipt kijü nu Judamia ketuo pete, Jihova pfhe rünyüliecie,

²⁵ krodiko Jihova, Israel Kepenuopfüe puya: Nie mu nie nupfünuokoe nie tie nu pukeshüko mhatho nu chü tseishüte, uko sie, ‘Hiekoe rüsekeshüu chü tou zotuo, mha pie teigei kedipfü tsükecü kekrie ruosuo rupie puo tsütuo’ ikecü pu di. Kehoupuo chü rei, nie rüsekeshüu chülie tsiu kekrie ruosuou rushü zolie!

²⁶ Süla Ijipt kijü nu lhouketuo Judamia pete, Jihova pfhe rünyüliecie: Harie, a a za kezhau se rüseshüya, Jihovae siya, süu Ijipt kijü pete nu Judamia kehoupuorei u tie nunu, ‘Niepuu, Ukepenuopfü rhei ketuo tuoi’ sikecü pu salie lho.

²⁷ Ae mha kesuou se uko mehotuo tsiu uko kevi lalie lho, sidi Ijipt kijü nu kelhou Judamia pete zhiecha mu pekrie bu uko thelau chüwa kemochie pekawatuo.

²⁸ Siro zhiecha therhielie di ta rüzukelie huoyo zotuo; mu uko Ijipt kijü nunu lase Juda kijü nu volietuo, sidi Juda lhiekeshüko, Ijipt kijü nu tsu lhoutuoketakoe a die nu tuo mo, uko die nu tuo shicü silietuo.

²⁹ Siro hau nie la zasi puo chütuo, Jihovae siya, süu ae thechü hau nu siazha pie nie tsütuo, sidi a die nieko petsoukeshüko vorta zo ükecü nie bu silietuo;

³⁰ Jihovae puya, ae Ijipt kediu Faro Hofra pie puo ngumvümia dzie nu, tsiu puo kerheiro pfhüyakezhako dzie nu shüwatuo, ae Juda kediu Zedekia pie puo ngumvüu puo kerheiro pfhüyakezhau Babilon kediu Nebukadnezar dzie nu shükewa tuoi zotuo,” sishü.