Jeremia 43 - Angami Naga CL (Re-edited) Bible (BSI)

Jeremiae Siazha Vorketuo Pukeshü

¹ Siro Jeremiae themiako pete ki uko Kepenuopfü Jihova dieko, süu uko Kepenuopfü Jihova puo ketsepie uko ki keshü die hako pu tseiwa tse,

² Hoshaia nuou Azaria mu Karia nuou Johanan mu themia kemiakokecü kekreiko pete rei sie Jeremia ki, “No meda bate, hie Kepenuopfü Jihova n ketsepie n bu, ‘Ijipt nu lhoutuoü tsu hie’ ishünu mo zo;

³ derei Neria nuou Baruk n chüpie n bu hie petsou di, hie khapie Chaldiamia dzie nu shüwa, sidi süko bu hie dukhriwa morei hie ze Babilon nu tsutaketuo la zo,” sita.

⁴ Sidi Karia nuou Johanan siro chüpahi kezhako pete tsiu themia pete Juda kijü nu lhounukecü nu Jihova die ze mota.

⁵ Derei Karia nuou Johanan siro chüpahi kezha pete-e Juda lhiekelie seyie kekrei nu cüre tuo di la vor Juda kijü nu kebako,

⁶ thepfumia, thenuthenuo mu nhicumia, kedinuopfüko, siro kepfhekezhau Nebuzaradan-e pie Gedalia Shafan tsuu Ahikam dzie nu shüpie keba pete, siro Jeremia siedzekesiu mu Neria nuo Baruk rei zelie.

⁷ Sidi ukoe Ijipt kijü nu tsu, kekreilamonyü ukoe Jihova die ze mota, sidi ukoe Tahpanhe nu tsolie.

⁸ Sitse Jihova die Tahpanhe nu Jeremia ki vor di sie:

⁹ N dzie pie ketsie kezha huo chülie, sidi vo Tahpanhe nu Faro kediu kicieki nyoba pie nyhü keba khro nu khruwalie, no süu chükecü Judako bu ngucie.

¹⁰ Sidi uko ki, krodiko Jihova, Israel Kepenuopfüe puya: Ae mia ketseshü di Babilon kediu Nebukadnezar a kituou zelietuo, sidi puo kediba pie a khrukewa tsie hako mho shütuo, mu puo kedi keyapie süko mho keza vo.

¹¹ Puoe vortuo mu puo Ijipt kijü pekawatuo, sidi thepetheruo nu voketuoko bu thepetheruo nu votatuo, tsiu kedie chü votaketuomia bu, kedie chü votatuo, siro zhiecha nu votaketuomia bu, zhiecha nu votatuo.

¹² Puoe Ijipt rhuoko rüsuokiko nu mi petushütuo, mu puo süko thewatuo sidi uko teze tuotatuo, tsiu puoe Ijipt kijüu pa kemesawatuo, tekuokepfhemia u pfhenei geinu tekhrü pa kemesawayakezha tuoituo; sidi puoe jüdzie zo di sünunu tuotatuo.

¹³ Puoe Ijipt kijü nu Heliopolis, nu keba tsieseko biephrowatuo; tsiu Ijiptmia terhuo kerüsuo kiko puoe mi pie thewatuo.