Jeremia 41 - Angami Naga CL (Re-edited) Bible (BSI)

Gedalia gei Mha Kesuo Rhükecü

¹ Si tuo di khrü thenieu nu, Ishmael Nethania nuou Elishama nuou, kedi yieu, siro kediu nuou mia ker ze puo salie, di Mizpa nu Ahikam nuou Gedalia ki vor. Sidi uko Mizpa nu keze niekhrüda cü ba tse,

² Nethania nuou Ishmael-e sielie tsiu mia ker puo ze ketuoko salie di Gedalia Ahikam nuou Shafan tsuu Babilon kediue puo pie puo bu kijüu nu ahng chükeshüu zhiecha pie puo dukhriwa.

³ Siro Ishmael-e Judamia Mizpa nu Gedalia ze keba pete, tsiu Chaldiamia chüpahi sünu ba di ngukelieko dukhri phrewa.

⁴ Siro Gedalia dukhrikewa sienhie, miapuorei süu si kemonu,

⁵ Shekem nu, Shilo nu mu Samaria nu mia hiethetha vor, uko tiemie thie, tsiu u pfhe cierhawa, siro u thuo u gei phaphawa, u dzie nu ruosuo mu kethengu se Jihova kinu süko se votuoü tuo.

⁶ Sitse Nethania nuou Ishmael-e Mizpa nunu uko ze kesetuoü par, puoe tuo chakhrie kratuo, siro puo uko ze keselie tse, sie uko ki, “Ahikam nuou Gedalia ki vorcie,” sishü.

⁷ Sidi ukoe nadiu metsuo nu vorlie tse, Nethania nuou Ishmael mu puo ze ketuokoe süko dukhriwa, di uko kelhoupie kheho nu shüwa.

⁸ Derei süko donu mia ker sie Ishmael ki, “Hie dukhriwa hieyi, hieko thoulha kenguya, barli, tier mu mepfhidzü lieko nu keviepie zhücü la,” ilie. Süla puo kethelie, sidi uko kezeko sa di uko dukhriwa molie.

⁹ Ishmael-e dukhrikewa kesiamoko kelhoukeshü kheho kezhau ro kediu Asae Israel kediu Basha perhiekecü puo keya chütuo üdi thiekelieu; mu Nethania nuou Ishmael-e dukhrikewako pie süu ketshu chüwa.

¹⁰ Sitse Ishmael-e Mizpa nu themia peshapie kebako pete kediu nuopfüko rei sa, mu Mizpa nu keba peteko, kepfhekezhau Nebuzaradan-e khapie Ahikam nuou Gedalia dzie nu shükewako teze kedie chü vota tsiu Nethania nuou Ishmael-e uko teze kedie chülie di ze Ammonmia ki votuoü tuota.

¹¹ Derei Karia nuou Johanan siro puo ze keba chüpahi mhokezhako pete rei Nethania nuou Ishmael-e mhatho kesuo chükewa pete silie tse,

¹² ukoe themia pete zelie di Nethania nuou Ishmael ze kegeituoü tuota, sidi Gibeon nu dzü ba sekecü kinu puo ngulie.

¹³ Siro Ishmael ze ketuokoe Karia nuou Johanan mu puo ze ketuo chüpahi mhokezhako ngu tse, ukoe u neilie.

¹⁴ Sidi Ishmael Mizpa nunu tezetuoketa pete rürei lalie di la vorta, sidi tuo Karia nuou Johanan ki vor.

¹⁵ Derei Nethania nuo Ishmael mia thetha zelie di Johanan dzie nunu talie di, Ammonmia ki vota.

¹⁶ Sitse Karia nuou Johanan siro chüpahi mhokezha puo ze ketuoko pete-e Nethania nuou Ishmael-e Mizpa nunu Ahikam nuou Gedalia dukhrikewa sie, tezeketako ze lalie, sükoe chüpahimia, thenumia, nhicunuomia, mu iunukmia, Johanan-e Gibeon nunu süko ze la vorta.

¹⁷ Siro uko tuoshü di, vor Bethlehem khieki Gerut Kimham nu balie, Ijipt vakecü le di

¹⁸ kekreilamonyü Chaldiamia la, ukoe süko preikecü la, Nethania nuou Ishmael-e Ahikam nuou Gedalia, Babilon kediu puo chüpie puo bu kijüu nu ahng chükeshüu dukhrikewa la.