Jeremia 40 - Angami Naga CL (Re-edited) Bible (BSI)

Jeremia Gedalia Ze Baketa

¹ Jihova kinu die Jeremia ki kevor kepfhekezhau Nebuzaradan puo bu Rama nunu tuoketa sie, puoe puo ze di Jerusalem mu Juda nu themia pete thegiro pie khelie di teze Babilon nu kevo ki.

² Kepfhekezhau Jeremia zelie di puo ki, “N Kepenuopfü Jihova mha kesuo hau pie thechü hau kedeshü;

³ mu tsie Jihovae süu chüshüte, tsiu puo kepu tuoi chüshüte, kekreilamonyü niekoe Jihova gei phoumawate tsiu puo pfhe rünyülie mo. Süla mha hau nieko gei vorketa zo.

⁴ Tsie meholie, thie a thegiro n dzie gei keba phreishüwazhie. Mhanuü no a ze Babilon nu vor nyü ro vorlie, sitse a n meho menuolietuo; derei mhanuü a ze Babilon nu vo nyü moro, no vor morei vi. Harie, kijüu pete n mhodzüki zhü zo; kirapuo n mhodzüki vi mu rüütie shi süra votalie.

⁵ No hanu ba nyü moro, la se Gedalia Ahikam nuou Shafan tsuu, Babilon kediu puo chüpie puo bu Juda rünako kekhakeshüu ki votalie, sidi puo ze themia donu lhou batacie; morei n mhodzüki kirapuo vo ro vitie shiü süra voliecie.” Sidi kepfhekezhau kecükekrie khashü tsiu mha methuo khapie puo tsüshü di puo bu tuota.

⁶ Süsie Jeremiae Mizpa nu Ahikam nuou Gedalia ki vota, di puo ze kijüu nu themia kebako donu lhou bata.

⁷ Siro rüna nu ketuo krütako mu uko chüpahikoe Babilon kediue Ahikam nuou Gedalia bu kijüu nu ahng chüketa, siro thepfumia mu thenumia tsiu nhicunuomia, mu kijüu nu mhakejümiako, miadie chü Babilon nu vota kemoko pie puo dzie nu shüwatakecü silie tse,

⁸ ukoe Mizpa nu Gedalia ki vor, sükoe Nethania nuou Ishmael, mu Karia nuo Johanan, siro Tanhumet nuou Seraia, mu Efai Netofat nuonie, mu Makat nuou Jezania, tsiu uko chüpahiko sa.

⁹ Siro Gedalia Ahikam nuou Shafan tsuue uko mu uko chüpahiko rüseshü di sie, “Chaldiamia lie chü michie hie. Kijüu nu lhou di Babilon kediu lie chü balie, silie ro süu nie la vituo.

¹⁰ A la we, Chaldiamia u ki kevorko la nie sou Mizpa nu batatuo; derei nie we, khubezu teile ki nhasiko mu tier pfhü kenguliecie, sidi süko khapie nieko viebou nu shülie, di nieko liekelie rünako nu lhou batacie,” sishü.

¹¹ Sükemhie, Judamia Moab nu mu Ammonmia donu, siro Edom nu mu kijü kekreira ketuoko pete Babilon kediue Juda nu themia huo lhiepie bawaketa siro puoe Ahikam nuou Gedalia bu uko mho zhaketa silie tse,

¹² Judamia pete whuopie cüretuoketako thechü pete nunu vorta, sidi Juda kijü nu Mizpa nu Gedalia ki vor, sidi khubezu tsiu teile ki nhasiko kekra pfhü kengulie.

¹³ Siro Karia nuou Johanan tsiu rüna nu ketuo chüpahi mhokezhako pete Mizpa nu Gedalia ki vor,

¹⁴ sidi puo ki, “Ammonmia kediu Balis-e n dukhriwatuo üdi Nethania nuou Ishmael ketseshütacü no si tou bate nhie?” sita. Derei Gedalia Ahikam nuou uko die pele mota.

¹⁵ Sitse Karia nuou Johanan-e Mizpa nu pekhre Gedalia rüchü di sie, “N pezie rei a bu vo di Nethania nuo Ishmael dukhriwacie, miapuorei süu silie lho, kiüdi puo bu n kerheiro liewa, sidi Judamia n ki vor kengu kebako bu cüre tuotata, sidi Juda lhiekelieko bu kaüjütatie mu?” si.

¹⁶ Derei Gedalia Ahikam nuou sie Karia nuou Johanan ki, “No mha hau chü suo, kekreilamonyü no Ishmael dze pu kekrü bate,” si.