Jeremia 4 - Angami Naga CL (Re-edited) Bible (BSI)

¹ Mhanuü no rürei la vorlie ro, he-i Israel, Jihovae puya, mhanuü no rürei a ki vorlie ro, mhanuü a kengu kinu kerütsekecüko khawa di rüdi mo thalie ro,

² tsiu mhanuü noe, “Jihova rhei ketuo tuoi!” ketho nu, kethoca, mu kemezhü nunu rüselie liro, puoe japie seyieko tsütuo, tsiu ukoe puo geinu u mhokuo chütuo.

³ Kekreilamonyü Jihovae Juda mu Jerusalem nu themiako ki puya: Lie pekropie kezhüko cieliecie, tsiu tsia prupie zohu donu shüwa hie.

⁴ Nie zhükere bu Jihova kitsalie, nie melou kezeu chüwalie, nie Juda themiako mu Jerusalem nu kelhouko, moliro a nouyie mi kemhie tu par thekecü ki miapuorei süu tshülie lhotatuo, nie mhatho kesuoko la.

Juda Peka mu Perawaketuo Se Kedekeshü

⁵ “Juda nu pesishülie, tsiu Jerusalem nu pu keyieshüliecie: ‘Kijü nu ketsü khoushülie; shieshülie di sie, “Vo kengulie, úko dahou houpie keba nadiko nu vo khe!” sishülie.

⁶ Pfhelha puo lhapie Ziontsa vashülie, nie kelalieketuo la talie, bata hie, ae pesotsa nu mha kesuo se vorzhie, mu mha peka sewaketuo puo.’ ”

⁷ Loshae puo rüshübou nunu parte ho, seyieko kepekau parte; puoe n kijü bie kemethuowatuo üdi puo tha nunu tuo parte; n nadiko themia puorei ba mota di ruotatuo.

⁸ Hau lanu gakhropfhe dzieliecie, kralie tsiu mepfükeruoilie: “Jihova noupfhü kemeriekecüu úko kinu lalie mote eru.”

⁹ Jihovae puya, “teisozha sünhie, kediu mu kezhako u kethepfu jütatuo; siro zievoko u ngotatuo tsiu siedzekesiko u ziejütatuo.”

¹⁰ Sitse ae sie, “He-i, Niepuu Ukepenuopfü, noe ‘Mha kesuo nie gei vor lho’ ikecü pu di themia hako mu Jerusalem kedowate, zhiechau u vo gei toupfü ba zorei!” sishütuo.

¹¹ Süki themia hako mu Jerusalem ki haikecü putuo: “kijükesia nu thechü kerükrie nunu teikhrie kele puo a themia kejüko kitsa vorzhie, süu hetuoü morei chü kemesawatuoükecü la mo.

¹² Süko gei teikhrie re. Tsie a uko petsou di theca pushüya.”

¹³ Mehoshücie! Puoe kimhou mhie vorzhie, puo kierbagei khriewhi mhie; puo kierko tsüüra ki rei ta vikuo, úko we ce, chülietie, úko sü ruote!

¹⁴ He-i Jerusalem, n melou nunu mha kesuo khrü kemesawalie sitse n kelalietuo. Mha kesuo dorhüko kedithechiepuo n nou batieya ga?

¹⁵ Dan nunu mhapfhe puo vor mu Efraim kijüthou geinu kepeka shieshüketa la.

¹⁶ “Seyieko ki pushülie, ‘Harie uko sü!’ Jerusalem petsoukecü pushülie, ‘Kijü kepetse nunu mia kepepriemia vorzhie, ukoe Juda nadiko petsou di shiezhie.

¹⁷ Liepfhemia tuoi ukoe houpfülie, kekreilamonyü süpfüe a petsoute,’ Jihovae siya.

¹⁸ N zhorüli mu n mhathoko thuo mha hako se n gei vor. Hauha n siazhau; kidepuorei pfhü shi! Süu ke n melou tsote.”

Pekakewa Seyie la Thenou Suokecü

¹⁹ A nou kemezhiete, a nou kemezhiete! A kechü la rüperülete! He-i, a melou keyau! A melou metouthorte; a kemekrie balie kenjüte; kekreilamonyü ae ketsü kekhou pfhe, terhü vorzhü üdi pesikeshü pfheu si bate.

²⁰ Kepeka sie kepeka, kijü pete chü kemethuowate. Va puo nu a pfhekiko pekawate, tsiu hiepuo nu a kikha pfheko pekawate.

²¹ A bu kedithechiepuo zasiu ngu, tsiu ketsü kekhou pfhe si batie shi?

²² “Kekreilamonyü a themiako nyate, ukoe a si mo; ukoe kenya nuonuo, ukoe mhacamhala silieya mo. Ukoe kesuo kechütsa we chü si, derei mha kevi kechü do we si mo.”

²³ A kijüu meho ru harie, süu methuo mu puorhi tuo mo; tsiu teiko mehoshü, mu ukoe u kezie jü.

²⁴ A kijüthouko mehoshü ru harie, sükoe mele bata, tsiu kijükhruko pete rei mele phi mu phi bata.

²⁵ A meho sie ru harie, miapuorei tuo mo, tsiu teirako pete pruota.

²⁶ A meho sie ru harie, kijü kekro-u sü kijükesia chüzhüta, Jihova mhodzünu tsiu puo nouyie nunu nadi peteko metsu zhüta.

²⁷ Jihovae pucü: Kijü pete rei methuotatuo; sirei a süu bu puo thela chüwalie lho.

²⁸ Hauha la kijüu kratuo, tsiu pesogei teiko teimekietatuo; kekreilamonyü ae pushüte, a süu rhüshüte; tsiu a nou rüdi lalie lho, morei sünunu tsiesietalie lho.

²⁹ Kier themiako siro theükeseko themiako pfhe lanu rüna pete tatatuo; ukoe ketsa kesou nu votatuo, ukoe tsiekrieko melituo; rüna pete khawatuo, mu miapuorei sünu lhou motatuo.

³⁰ Siro no, he-i pekakewau, no pfhe meriemegekecü pie n whese tuo zorei, no suna pienyie pie kerütso tuo zorei, no mha kenhekecü pie n mhi kenhelie rei, no sicü kedipuoü ta? N chü keziviketuou kemethuo zo. N kekhriemiako n mecüte, ukoe n kerheiro pfhü tuote.

³¹ Kekreilamonyü ae mhapfhe puo tuoikecü, nuorieu penuoshütuo üdi kemezhiekecü, Zion nuopfü pfhe hatoutoui di puo dzie yhapie lutsahatsashü di sie, “A we ce, chülietie! A we kedukhrimia mhodzünu phisiazhüte!” isikecü si ho.