Jeremia 39 - Angami Naga CL (Re-edited) Bible (BSI)

Jerusalem Tetsuketa

¹ Juda kediu Zedekia kedi chükelie cie thepfü cie, khrü ker-u nu, Nebukadnezar Babilon kediu mu puo chüpahi pete vor Jerusalem reta sidi süu penyülieta;

² Siro Zedekia cie kerepuo cie, khrü diau nu zha thepfü nhie nadiu bie phalieta.

³ Siro Jerusalem liekelie ki, Babilon kezhakoe vor di kharu metsuo nu balie: Nergal-sharezer, Shamgar-nebo, Rabsaris Sarsekim, Rabmag-u Nergal-sharezer, Babilon kedi nu kezhako pete ze balie.

⁴ Siro Juda kediu Zedekia mu chüpahi pete uko ngu tse, ukoe tata, theva ze kediu tezie chau ze dahou kenie donu kharuu ze nadiu tse prata, tsiu ukoe Araba kevatsa vota.

⁵ Derei Chaldiamia chüpahi-e uko whuo vo di, Jeriko razhau nu Zedekia tsolie, sidi uko puo telie tse, ukoe puo ze Hamat kijü nu Ribla nu Babilon kediu Nebukadnezar ki vor, sünu puoe puo dienya kecü.

⁶ Siro Babilon kediue Ribla nunu puo mhodzüki nu puo nuonuoko dukhriwa, süsie rei Babilon kediu Juda pehüko pete dukhriwa.

⁷ Siro puoe Zedekia mhinie kerülawa, mu puo ze Babilon nu votaketuo la thegiro kedukecü pie puo phalie.

⁸ Siro Chaldiamia kediu ki mu themiako ki mi pie thewa, tsiu Jerusalem dahou biemewa.

⁹ Süsie kezhau kepfheu Nebuzaradan-e nadi nu themia lhiekelieko teze Babilon nu vota, siro themia lhiekelie, takelieko puo ki vorta.

¹⁰ Mu kezhau kepfheu Nebuzaradan-e Juda nu mhakejümiako mhapuorei ba mokecüko, khubelie mu lie pie uko tsü.

Jeremia Khakeshü mu Ebed-melek Rükrakeshü

¹¹ Süki Babilon kediu Nebukadnezar-e Jeremia dze se kepfhekezhau Nebuzaradan ki diekhashü di pucü,

¹² “Puo zelie, sidi puo meho menuoliecie tsiu puo gei mha kesuo puorei chü hie, derei puo nieko ki kedipuo putie shiü süu chüpie puo gei shülie,” siwa.

¹³ Süla kepfhekezhau Nebuzaradan mia ketseshü, sitse Rabsaris Nebushazban, Rabmag-u Nergal-sharezer, mu Babilon kediu kezhako pete

¹⁴ sidi vo rükhoumia kibouu nunu Jeremia zelie di, puo khapie Gedalia Ahikam nuou Shafan tsuu bu puo ze kinu votanu shüwa. Sidi puoe puo thuo puo themia ze bata.

¹⁵ Siro Jeremiae rükhoumia kibouu nu keba ki Jihova die puo ki vor:

¹⁶ Vo di Ebed-melek Ethiopia ki pucie: krodiko Jihova, Israel Kepenuopfüe puya: Ae nadi hau gei mha kesuou chüketuo a dieu chüshütatuo mu mha keviu lalie lho, siro sünhie n mhodzüki nu süko chü tseishütuo.

¹⁷ Derei teisozha sünhie a n kelashütuo, Jihovae siya, sidi n khapie no preiyakezha themiako dzie nu shüwalie lho.

¹⁸ Kekreilamonyü a n kelashü bei zotuo, mu no zhiecha geinu tetsutalie lho, derei n kerheiro pie terhü nu krakelie zhakhra puo mhiewatuo, noe a pele bacü la, Jihovae siya.