Jeremia 38 - Angami Naga CL (Re-edited) Bible (BSI)

Jeremia Kesou nu Bakecü

¹ Sitse Matan nuou Shefatia, mu Pashur nuou Gedalia, siro Shelemia nuou Jukal, mu Malkia nuou Pashur, Jeremiae themia pete ki pukeshü dieko silie,

² Jihovae puya, Nadi hau nu kebamia zhiecha, pekriekecü, mu thepetheruo geinu siatatuo, derei Chaldiamia ki vokeliemia rheilietuo, ukoe themiako pie terhü nu krakelie zhakhra puo mhietuo, sidi rheilietuo.

³ Jihovae puya, Nadi hau khapie Babilon kediu chüpahi tsü touwa zotuo sidi lielietatuo.

⁴ Süsie kezhakoe sie kediu ki, “Themia hau sia zhü tou zo, kekreilamonyü puoe die sikecü pu di terhü themia nadiu nu lhiepie kebako, tsiu themia peteko chü kethachüwate. Kekreilamonyü themia hau themia hako dzevi pfhüya mo, derei uko bie pesuowaketuo pfhüya.”

⁵ Sitse Zedekia kediue sie, “Harie puo haki ba, puoe nie dzie nu bate; kekreilamonyü kediue nieko petsoukecü chülie kenjü,” si.

⁶ Süki uko Jeremia telie di puo kelhoupie Hamelek nuou Malkia kitiezha rükhoumia keba ki dzükhouu nu shüwa, ukoe kero geinu Jeremia peteshü. Sirei dzükhou nu dzü ba mo, nyoba rübei, süla Jeremia nyoba nu rüle leta.

Ebed-melek Jeremia Kelakeshü

⁷ Süki Ebed-melek Ethiopiamia, kediu kinu iunuk-ue uko Jeremia pie dzübou kesou nu shüwaketa silie. Siro kediue Benjamin Kharuu ki ba.

⁸ Süla Ebed-melek-e kediu ki nunu pra di kediu ki,

⁹ “A niepuu kediu, themia hako Jeremia siedzekesiu kelhoupie dzükhou kesou nu shükewa ha mha kesuo se chüwate mu puo sünunu khe siatatie, kekreilamonyü nadi hanu niekhrüda ba sa mote,” si.

¹⁰ Sitse kediue sie Ebed-melek Ethiopiau ki, “Mia se sa zelie di, vo Jeremia siata kemonu dzükhou kesou nunu puo teshü se parwaliecie,” sishü.

¹¹ Süla Ebed-melek-e themiako zelie, sidi kedikiu nu mhanya khapie keba bouu nu vo di, sünu pfhenyhiepfhekra siro pfhemenei sekhreko keroko geinu petepie dzükhou kesou nu Jeremia ki shü.

¹² Sidi Ebed-melek Ethiopiau sie Jeremia ki, “Tsie pfhenyhiepfhekra siro pfhemenei sekhre hako pie keroko khro n socü nu shüliecie.” Sitse Jeremia sükemhie chülie.

¹³ Sitse ukoe keroko pie Jeremia teshülie di dzükhou kesou nunu puo ze parlie. Sidi Jeremia rükhoumia kibouu nu bata.

Zedekia Jeremia ki Mha Ketso Lakecü

¹⁴ Siro Zedekia kediu mia ketseshü, sidi Jeremia siedzekesiu ze Jihova kiu nu kele kicie seu nu vor. Sitse kediue sie Jeremia ki, “A n ki mhapuo ketsotuo; a ki mhapuorei kevie hie” si.

¹⁵ Jeremia sie Zedekia ki, “Mhanuü a pie n ki pushü ro, no a bu siata mecie zo die mu? Siro mhanuü n tarhoshü rei, no a pfhe rünyü lho mecie zo” sita.

¹⁶ Süla kediu Zedekiae pekhre rüsepie Jeremia tsü di sie, “U kerheiro kha u ketsüu Jihova rhei ketuo tuoi, a n bu siata lho, morei a n khapie n kerheiro pfhü ketuo hako dzie nu shüwalie lho zo,” sishü.

¹⁷ Sitse Jeremia sie Zedekia ki, “Jihova, krodiko Kepenuopfü, Israel Kepenuopfüe puya, mhanuü noe Babilon kezhako dzie nu le liro, no rheilietuo, mu nadi hau mi bu thewalie lho, sidi no mu n kinuko rheilietuo.

¹⁸ Derei mhanuü no n khapie Babilon kezhako dzie nu shülie mota ro, nadi hau pie Chaldiamia dzie nu shüwatuo, mu ukoe mi pie thewatuo, sidi noe uko dzie nunu tapralie lho,” si.

¹⁹ Sitse kediu Zedekiae Jeremia ki, “A Judamia Chaldiamia dzie nu taketako preilie, uko a pie süko dzie nu shü di uko a pie kethesewa rei silie lhomu,” sita.

²⁰ Derei Jeremia sie, “Sikecü chülie lho. A n ki pukeshü Jihova die zeu zeliecie, sitse no vilietuo, sidi no rheilietuo.

²¹ Derei mhanuü noe mia khro le mvüta ro, Jihova hakemhie di pie a pekieshü ho,

²² Juda kediu kinu khapie bakewa thenupfümia pete ze Babilon nu kezhako ki votuo sidi sie, ‘Nie peleyakezha nie zemia thuo nie ketsiwa sidi nie penyülie; Tsie nyoba nu n phi malie tse uko n khawate,’ situo.

²³ Nie kimianuoko mu nie nuonuo pete ze vo Chaldiamia kishüwatuo, mu no uko dzie nu talie lho, derei Babilon kediu dzie nu teletuo, sidi nadi hau mi bu thewatuo,” sita.

²⁴ Sitse Zedekia sie Jeremia ki, “Miapuorei bu kerüchükecü hako si hiecie, moro no siatuo.

²⁵ Mhanuü kezhakoe a n rüchükecü si liro, ukoe vor di sie n ki, ‘No kedipuo pie kediu ki pu shiü pie hie pesishücie; hie ki süu keviewa hiecie, moro hie n bu siatatuo. Kediu kedipuo se n ki pushü ga?’ ituo.

²⁶ Sitse noe uko ki, ‘A kediu ki a bu Jonathan kinu vo di siata hienu di a mezhiemelolie’ sishüliecie,” si.

²⁷ Sitse kezhako pete vor di Jeremia ketso; sitse puo kediu puo ki pukeshü kemhie dieyo se uko die kelashü. Süla ukoe puo ketso sa mota, unie kerüchükecüu silie moketa la.

²⁸ Sidi Jeremiae rükhou kibouu nu Jerusalem lielie kemochie ba.