Jeremia 37 - Angami Naga CL (Re-edited) Bible (BSI)

Zedekia Merü Zhü Kemo Merükecü

¹ Josia nuou Zedekiae, Jehoiakim nuo Konia sou nu kedi chülie, Babilon kediu Nebukadnezar-e puo pie Juda kijü nu kedi chüshü.

² Derei puo rei morei kituoko rei morei kijüu nu themiako rei Jihova die siedzekesiu Jeremia geinu pukeshüko rünyülie mo.

³ Siro kediu Zedekiae Shelemia nuou Jehukal mu Maseia nuou Zefania zievo-u ketsepie siedzekesiu Jeremia ki shü di sie, “Hieko la Ukepenuopfü Jihova ki chashücie,” si.

⁴ Hateiki zorei Jeremia themiako donu pra mu le baya, ukoe puo tepie kedieki nu shüwa moluocü la.

⁵ Süki, Faro chüpahi-e Ijipt nunu parta, sidi Chaldiamia Jerusalem re kebakoe süko dze silie tse, ukoe Jerusalem nunu lata.

⁶ Süsie Jihova die siedzekesiu Jeremia ki vor:

⁷ Jihova, Israel Kepenuopfüe puya: Nnie hamhiekecü pie Juda kediu, nie ketsepie a ki shü di ketsokecüu ki pushücie. Faro chüpahi, nieko khruohituoü kevorkoe la u thuo u kijü Ijipt nu votatuo.

⁸ Siro Chaldiamia la vortuo sidi nadi hau perhietuo; sidi ukoe süu lielietuo mu mi pie thewatuo.

⁹ Jihovae puya: “Chaldiamia uko kinu lata mecie zo” ikecü pu di nie thuo nie sewa hie; kekreilamonyü ukoe latalie lho zo.

¹⁰ Mhanuü nie-e nie perhie ketha Chaldiamia chüpahi pete penyüwa, sidi uko donu rüzakelieko rübei thuo u pfheki nu ba zo rei, ukoe sielie di mi pie nadi hau thewatuo.

Jeremia Tepie Kedie Chükewa

¹¹ Siro Chaldia chüpahikoe Faro chüpahiko vorkezhü silie di lata tse,

¹² Jeremiae Jerusalem nunu tuo Benjamin kijü nu votuoü sie süko donunu puo ya kiülie lielietuo üdi.

¹³ Sidi puoe tuo Benjamin Kharuu tsolie tse, rükhou kepfhemia puo puo za Irija, Shelemia nuou, Hanania nuou ba ru puoe Jeremia siedzekesiu telie di sie, “Noe Chaldiamia ki votatuo üzhie ha.”

¹⁴ Sitse Jeremia sie, “Süu kemeda zo, a ta Chaldiamia ki votieya mo zo,” si. Derei Irija puo die rünyü mvüta, sidi Jeremia telie di puo ze kezhako ki vor.

¹⁵ Süki kezhakoe Jeremia gei u nei mota, di puo vü siro puo pie kethuu Jonathan kinu kedieki nu shüwa, kekreilamonyü puoe süu pie kedieki chükewa la.

¹⁶ Hamhie di Jeremia kedieki kesou nu mu kibou nu leta, sidi sünu teisozha kekra bata.

¹⁷ Sitse kediu Zedekia puo la mia ketseshü, di puo ze vorlie sidi kediu puo ki nu pekhre puo ketso, di sie, “Jihova kinu die huo ba me?” Sitse Jeremia sie, “Bawe!” Sitse puo sie, “N tepie Babilon kediu dzie nu shüwatuo,” sishü.

¹⁸ Jeremiae kediu Zedekia ki pu sa di sie, “No a tepie kedieki nu shüketa, a n gei morei n kituoko gei morei n themiako gei kedipuo chü kekrüwaketa la ga?

¹⁹ N siedzekesiko n ki siedzedie pu di, ‘Babilon kediu vor no mu n kijüu perhielie lho,’ isi ketuoko kirapuo tuota ga?

²⁰ Tsie n pezie rei a pfhe rünyüshücie, a niepu kediu: sidi a mezhiemelokecü rünyüshücie, sidi a ketsepie kethuu Jonathan ki nu vo di sünunu a bu siata hieyi.”

²¹ Sitse Zedekia kediue uko bu Jeremia pie rükhoumia bou nu shüwa; mu teisonhie niekhrüda zeyakezhamia cha nunu niekhrüda puo pie puo tsü, nadiu nu niekhrüda jüta kemochie si balienu die khashüwa. Süla Jeremiae rükhoumia bou nu bata.