Jeremia 36 - Angami Naga CL (Re-edited) Bible (BSI)

Rüsuoki nu Leshütshüu Phrükeshü

¹ Juda kediu Josia nuou Jehoiakim kedi chükelie cie dia cie, Jihova kinu die hau Jeremia ki vor:

² No leshütshü puo chülie sidi sünu ae Israel siro Juda mu seyie pete kepetsou dieko pete thulie, a n ki kepu nhie nu, Josia teiki nu vor thie ketso.

³ Juda kinuko a uko gei kepeka khashütuoü keba rünyülie, di uko pete rei u zho kesuo nunu rüdilie, sidi a bu uko kesuo mu uko kephouma vashüketuo chülie rei silie lhomu.

⁴ Sitse Jeremiae Neria nuou Baruk kielie, sidi Baruk-e Jeremia tie nunu Jihova die puo ki pukeshü pete puoe thupie leshütshü puo nu shülie.

⁵ Sitse Jeremia sie Baruk ki, “A bu Jihova kinu volie lho üdi a khaliete;

⁶ no n thuo voliecie, sidi no kemevo zhanhie a tie nunu silie di thukelie leshütshüu nunu Jihova dieko phrüpie themiako nyie nu shücie. Siro no süko phrüpie Juda pete uko rünako nunu kepar kheko ki shücie.

⁷ Ukoe Jihova mhodzü uko mezhiemelo rei silie lhomu, sidi themia pete rei puo zho kesuo nunu rüreilie rei silie lhomu, kekreilamonyü Jihova noupfhüu tsiu nouyie themia hako gei shütuoükeshüu re seta zo,” sishü.

⁸ Süla Jeremia siedzekesiu puo bu chünukeshü pete Neria nuou Baruk-e chülie di Jihova kinu Jihova dieko leshütshüu nunu phrüshü.

⁹ Siro Juda kediu Josia nuou Jehoiakim kedi chükelie cie pengouketa ki, khrü thepfüu nu, ukoe Jerusalemmia pete mu Juda rünako nunu vor Jerusalem nu baketako pete bu Jihova mhodzünu mevolienu di pushü.

¹⁰ Süki Baruk-e Jihova kinu, kethuu Shafan nuou Gemaria kibou nu, kibou pesotsa nu, Jihova kinu kele Care Kesau nu, themia peteko kesi kinu Jeremia leshütshüu phrüshü.

Leshütshüu Kediki nu Phrükeshü

¹¹ Mikaia Gemaria nuou, Shafan nuou leshüdau nunu Jihova dieko pete silie tse,

¹² puoe kediu kinu kethuu kibou nu tsu, mu kezhako pete sünu ba; Elishama leshükethuu, Shemaia nuou Delaia, Akbor nuou Elnathan, Shafan Gemaria nuou mu Hanania nuou Zedekia, mu kezhako pete.

¹³ Sitse Mikaiae uko ki puoe sikelie die pete pushü, Baruk-e leshütshüu phrüpie themiako kieshü.

¹⁴ Sitse kezhako pete-e Jehudi, Nethania nuou Shelemia nuou Kushi nuou ketsepie Baruk ki pu di, “No phrüpie themiako pekiekeshü leshütshüu selie, di vorlie,” si. Süla Neria nuou Baruk-e leshütshüu puo dzie nunu selie di uko ki vor.

¹⁵ Sitse ukoe sie puo ki, “Balie di süu phrüpie hie kieshücie,” süla Baruk-e süu phrüpie uko kieshü.

¹⁶ Ukoe dieko pete silie tse uko pete rei michie di reipra huoniehuo meho, sidi sie Baruk ki, “Hie die hako kediu ki pu beishü morosuo,” sita.

¹⁷ Süsie ukoe Baruk ketso di sie, “Tsie hieko ki pushücie, no kimhie di die hako pete thulie ga? Hau puoe pu di thu zo me?” sita.

¹⁸ Sitse Baruk uko die kela di sie, “Puoe puo tie nunu die hako pete a ki pu zo, mu a leshüdzü pie leshüda nu thushüliewe.”

¹⁹ Sitse kezhakoe sie Baruk ki, “Vo di rüshütalie, no mu Jeremia, sidi miapuorei bu nnie kebachü si hie,” sita.

Jehoiakim-e Leshütshüu Thekewa

²⁰ Ukoe leshütshüu pie kethuu Elishama kibou nu khapie zhüwa, sidi ukoe dienyakiu nu kediu ki le, mu ukoe dieko pete pie kediu ki pushü.

²¹ Sitse kediue leshütshüu se vorlienu di Jehudi ketseshü, siru puoe kethuu Elishama kibouu nunu süu chülie; sidi Jehudi-e süu phrüpie kediu nyie nu siro kediu mhodzü ketha kezhako pete nyie nu shü.

²² Süki kediue teisei kiu nu ba (süu khrü thepfüu meseki), mu puo mhodzünu miphu nu mi tuzhü.

²³ Siro Jehudi-e nethe se dia phrüshü tse, kediue zhietenuo pie süko rewa sidi kelhoupie miphu nu shüwa, sidi mi bu leshütshüu the pejüwa kemochie si zhüta.

²⁴ Sirei kediu, morei puo kituokoe die süko silie rei miapuorei michielie mo zo, morei u pfhe u nei rei cierha mo zo.

²⁵ Siro Elnathan mu Delaia mu Gemaria zowe kediu bu leshütshüu thewa hienu di puo ki pu zo, sirei puoe uko die rünyü mvüta.

²⁶ Süsie kediue Jerahmil kediu nuou mu Azriel nuou Seraia tsiu Abdil nuou Shelemia bu kethuu Baruk mu Jeremia siedzekesiu telienu di diekhashü, derei Jihovae unie keviewa.

Jeremia Leshü Kekrei Thu Lakelie

²⁷ Süsie, kediue leshüu Baruk-e Jeremia tie nunu thukelie dieko thewaketa sie, Jihova die Jeremia ki vor di:

²⁸ No Leshütshü kekrei puo chü lalie, sidi Juda kediu Jehoiakim thewaketa leshütshü kerieu nu keba dieko pete thu lapie sünu shüliecie.

²⁹ Siro Juda kediu Jehoiakim la noe pushülie: Jihovae puya, Noe haikecü pu di leshütshüu the n kerei mote, kiüdi sünu Babilon kediue vor tou zotuo sidi kijü hau pekawatuo, sidi sünu themia rei khunuo rei tuo motatuo ücü puya ga?

³⁰ Süla Jihovae Juda kediu Jehoiakim dze pucü: Puoe miapuorei bu David kedibau gei keba ba motatuo, tsiu puo kesiamo kelhoupie khinhie tei kele nu mu theva gei thezei nu shüwatuo.

³¹ Siro a puo mu puo seyie tsiu puo kituoko kephouma la a siazha pie uko tsütuo, sidi ae mha kesuo uko ki pukeshü pete se vor uko gei, mu Jerusalem nu kelhouko gei, siro Juda themiako gei shütuo, sirei ukoe rünyülie lho.

³² Sidi Jeremiae leshütshü kekrei puo chü lalie di pie kethuu Baruk Neria nuou tsüshü, puoe Jeremia tie nunu thukelie leshütshüu Juda kediu Jehioakim-e mi nunu thekewako pete sünu thushülie, mu süsie rei sümhiekecü kekra pie süko salie.