Jeremia 35 - Angami Naga CL (Re-edited) Bible (BSI)

Rekabko Zhapu Chükeshü

¹ Juda kediu Josia nuou Jehoiakim teiki Jihova kinu die Jeremia ki vor:

² Rekabko ki nu vocie, di uko ki pushülie, sidi uko ze Jihova ki nu vo di kibou puo nu lecie, di uko bu zu krie nu khashülie.

³ Sitse ae Jeremia nuou Jazania süu Habazinia nuou mu puo siezedzürieko mu puo nuonuoko pete, siro Rekab kinuko pete zelie.

⁴ Sidi ae uko ze Jihova kiu nu Hanan nuonuoko Igdalia nuou, Kepenuopfü themia puo, puoe kezhako khieki Maseia, Shalum nuo, kikha kepfheu kibou tsü gei keba nu vor.

⁵ Süsie ae zu bu lipfhü tshupfü keba mu tehieko pie Rekab kinuko mhodzünu shü, sidi a sie uko ki, “Zu huoyo kriecie,” ishü.

⁶ Derei uko sie, “Hieko zu krie lho, kekreilamonyü Jonadab Rekab nuou, hieko pfutsau hie ki diekhakeshü, ‘Nieko zu krie lho, nieko shierei, morei nieko nuonuoko bu rei mhakipuorei zu krie lho;

⁷ morei nieko ki rei chü hie, morei tsia pru rei hie, morei khube pelhou rei hie, morei mhapuorei pie ba hie, derei nie rhei chie nie pfheki nu lhoutuo; silie ro nie bakelie kijü nu teicie kekra lhou balietuo.’

⁸ Hiekoe Jonadab Rekab nuou hie pfutsau hie bu chünukeshü dieze chütuo zo, sidi hie rhei chie zu krie mo, hie rei, hie kimianuoko rei hie nuonuo thepfu rei thenu rei,

⁹ mu lhou baketuo hie la ki chü mo. Hiekoe khubelie rei jü morei lie, morei mhatsia rei jü:

¹⁰ derei hie pfhekiko nu lhou, mu dieze chü di hieko puo Jonadab-e hie bu chünukeshü pete chü zo.

¹¹ Derei Babilon kediu Nebukadnezar kijüu petsou sier tse, hie sie, ‘Vorlie, di Chaldiamia chüpahi keprei la tsiu Siriamia chüpahi keprei la, úko Jerusalem nu vota khe,’ sishü. Sidi hiekoe Jerusalem nu lhouta.”

¹² Süsie Jihova die Jeremia ki vor:

¹³ Jihova Israel Kepenuopfüe pucü: Vo di Juda themiako mu Jerusalem nu kelhouko ki pushülie, nieko pethakeshüu silie di a dieko zelie lhoü me? Jihovae siya.

¹⁴ Rekab nuou Jonadab-e zu krie hienu di diekhakeshüu keyiepie puo nuosenuoyieko tsüshülie, mu ukoe thie ha ketso rei zu krie molie, kekreilamonyü ukoe uko puonuoko diekhakeshüu zekelie la. Derei a thuo tsiemelie nieko ki pukeshüko, niekoe a die zelie mo.

¹⁵ Ae a kituo siedzekesiko ketseshü, tsiemelie uko ketseshü di sie, “Themia kehoupuorei puo kesuo chau nunu rüreilie, nieko mhathoko chü kemezhülie, sidi terhuo kekrei lie chütuoü süko medzita hie, sitse niekoe a kijü pie nieko mu nie puonuoko ketsü nu lhoulietuo,” sishü. Derei nieko nie nyie kedeishü mo sidi a die zelie mo.

¹⁶ Rekab nuou Jonadab seyiemiako uko bu chünukeshü chülie, derei themia hako a die zelie mo.

¹⁷ Süla, Jihova krodiko Kepenuopfü, Israel Kepenuopfüe puya. Ae Juda mu Jerusalem nu lhou kebako pete petsou di kepeka pukeshü pete se uko gei vortuoüzhie, kekreilamonyü a uko ki pu zo sirei uko zelie mote, ae uko kie zo sirei uko a pfhekho mo.

¹⁸ Derei Rekabko kinuko la we Jeremia pukecü: Krodiko Jihova, Israel Kepenuopfüe puya: kekreilamonyü niekoe nie pfutsau Jonadab pukeshü pete zelie, mu puo zhoko se balie, tsiu puoe nieko ki diekhakeshü pete chülie.

¹⁹ Süla Krodiko Jihova, Israel Kepenuopfüe puya; Rekab nuou Jonadab-e kechachie a mhodzü thaketuo puo yiemia jütalie lho.