Jeremia 34 - Angami Naga CL (Re-edited) Bible (BSI)

Zedekia Miadie Kechü nunu Siaketuo Pukeshü

¹ Jihova kinu die Jeremia ki vor, Babilon kediu Nebukadnezar mu puo chüpahi pete mu kijüu gei puo rüvie nu kedibako pete tsiu puo khro keba themia pete-e Jerusalem mu puo nadiko ze kegeikezha ki pukeshü:

² Jihova, Israel Kepenuopfüe puya: Vo di Juda kediu Zedekia ki pushülie; Jihovae puya: Ae nadi hau khapie Babilon kediu dzie nu shüwatatuo, mu puoe mi pie süu thewatuo.

³ Siro no rei puo dzie nunu talie lho, derei n telie petuotuo sidi pie puo dzie nu shüwatuo; noe n mhipie Babilon kediu ngutuo tsiu mhotsou zo di puo ze kerüchütuo; sidi noe Babilon nu tsutatuo.

⁴ Sirei Jihova die rünyüliecie he-i Juda kediu Zedekia! Jihova n dze pucü: N bu zhiecha geinu siatalie lho;

⁵ noe tshüimhiei di siatuo. Siro n puonuoko, n mhodzü kelhou kedimiako kethengu kethe tuoi, ukoe n la kethengu thetuo ukoe n krükratuo, sidi sie, “Yha, Niepuu sü!” ituo. Kekreilamonyü ae dieu pushüwate, Jihovae siya.

⁶ Sitse Jeremia siedzekesiu die hako pete pie Jerusalem nu Juda kediu Zedekia ki pushü.

⁷ Babilon kediu chüpahi-e Jerusalem mu Juda nadi peshakeshüko Lakish mu Azeka ze kegei keba ki, kekreilamonyü Juda nu nadi hako rübei dahou chüpie bakecü la.

Kedieko gei Kelhiekecü

⁸ Jihova kinu die Jeremia ki vor, Zedekia kediu Jerusalem nu kebako ze dietseidiekhowa di mia bu uko kekha mo di lhoutatuoü pesikewa sie

⁹ Themia kehoupuorei Ibrimia u diemia thepfu rei thenu rei khashüwata morosuo, sidi miapuorei bu Judamia puorei pie u die chü lho.

¹⁰ Siro kezhako pete mu themia pete dietseidiekhokelie khe kehoupuorei puo diemia thepfu mu thenu rei khashüwalienukecü, kehoupuorei uko ze u die chü sakecü mese mo ükecü silie tse, uko die süu zelie, sidi uko khashüwa.

¹¹ Derei süsietsa ukoe kediemia thepfu rei ue thenu rei khashüwaketako ze lalieta, sidi uko pie mia khro keba kediemia chü lata.

¹² Süla Jihova die Jihova kinu Jeremia ki vor:

¹³ Jihova, Israel Kepenuopfüe puya: A a thuo nie puonuoko Ijipt kijü nunu ze par, miadie chü ketuo nunu mu uko ze dietseidiekholie di pukeshü,

¹⁴ “Teicie thenie tseiketa metsei ki themia kehoupuorei puo siezedzürie Ibrimia pie u ki zekeshüu bu teicie sorou n die chüwa ro; uko bu nie lie kechü nunu prata morosuo bei zo,” ishü. Derei nie puonuokoe a pfhe rünyü mo morei u nyie kedei rei shü mo.

¹⁵ Siro nieko thuo zorei tsie kinu nie nou rüdilie sidi a mhinguki kemezhüu chülie, mu a za kieyakezha kiu nunu dietseidiekho chülie di huohuo pie u diemia chü mota;

¹⁶ derei nie sünunu rürei lata di a za bie perhuwa sidi nie mia puopuokecü u kituo thepfu rei thenu rei ze lalie, nie-e uko kemengu kemhie khashüwaketako, mu nie-e uko pie nie khro keba kituomia chü latuote.

¹⁷ Süla, Jihovae puya: Nieko mia puopuokecü puo zanuomia mu puo khriethomia khashükecü nu a die ze mote; süla a rei nieko khashüwatuo, Jihovae siya, zhiecha, thepetheruo, mu pekriekecü gei khashüwatuo. Siro kijü kedirüvie pete nie ngu di meriekecü chütuo.

¹⁸ Mu a dietseidiekho varhuo di a mhodzünu dietseidiekho-u kemhiei chülie kemomia, a süko chüpie mithunuo da kenie chülie di sünie donu vorkezha tuoishütuo:

¹⁹ Juda nu kezhako, Jerusalem nu kezhako, iunuk, zievoko, mu themia kehoupuorei mithunuo da kenie chüpie kezhü donu tuo kevomia pete

²⁰ khapie ngumvümia dzie nu shüwatuo uko kerheiro pfhü ketuomia dzie nu shüwatuo. Siro uko kesiamoko pie teirako tsiu kijü gei nhachüko vachütuo.

²¹ Siro Juda kediu Zedekia mu puo kezhako, ae pie uko ngumvümia dzie nu shüwatuo tsiu uko kerheiro pfhü ketuomia dzie nu shüwatuo, siro pie Babilon kediu chüpahimia, nie kinu tuoketako dzie nu shüwatuo.

²² Ae die khashütuo, Jihovae siya, sidi uko la nadi hau nu vortuo; tsiu ukoe süu petsoutuo, mu süu lielie, di mi pie thewatuo, siro ae Juda rünako chüpie themia puorei bu lhou mota di bie peruowatuo.