Jeremia 33 - Angami Naga CL (Re-edited) Bible (BSI)

Siazha Khakeshü sie Chü Kemene Lakelie

¹ Siro Jihova die va kenieu Jeremia ki vor, puoe rükhouko bou nu baluokecü ki.

² Jihova kijü chükeshüue puya, Jihova süu chüshütuo üdi rhikeshüu, puo zae Jihova zo.

³ A kieshücie sitse a n pfhekhoshütuo, sidi no si kemo mha kezha mu mha pekhrepie kebako se n ki pushütuo.

⁴ Kekreilamonyü Jihova, Israelko Kepenuopfüe puya; nadi hau nu kiko dze mu Juda kediko kiu dze u kewhuomia perhietuoü mu zhiecha mhodzü u yalietuo üdi bietshokewau dze:

⁵ Chaldiamiae kegeituoü vorzhie mu a noupfhünouyie nunu dukhrikewako kesiamo pie uko tshuwatuoü vorzhie, kekreilamonyü uko rügerüzhü la ae nadi hau nunu a zie kevieliete.

⁶ Ae keshürho mu chü kemenekelie se vortuo; ae uko chü keshürhoshütuo mu ae kruokelie ba phikecü mu khrukhrekecü bakecü thashü kietuo.

⁷ Ae Juda mu Israel miadie chü voketako ze la vorshütuo sidi uko chüpie therieki tuoishütuo.

⁸ Siro ae uko a gei mha kesuo kechü kephouma pete nunu uko chü kemesashütuo, tsiu ae uko a gei mha kesuo kechü kephouma pete vashü tsütuo.

⁹ Sidi nadi hau we a la u kenei theza puo chülietuo, tsiu kijü nu seyie pete a uko gei mha kevi chükeshü dze silietuo, sitse ukoe a uko gei mha kevi pete mu kruokelie chükeshü pete la michie mu petatuo.

¹⁰ Jihovae puya; Nie thechü hau pu di, “Hau we themia rei khunuo rei jü di methuotatuo,” iya, Juda rünako nu mu Jerusalem chaüko methuo zhüta di themia morei khunuo lhou tuo moketako nu mhapfhe si latuo,

¹¹ kenei pfhe mu thenou kemvü pfhe, yasau pfhe mu yasapfü pfhe, tsali kechüko kethezie kha Jihova ki kevor pfhe hamhie di situo: “Kethezie se krodiko Jihova tsüliecie, Jihova vi zocü la, Kekreilamonyü puo kekhrie rüdirüli kemoe kechachie baya!” Kekreilamonyü ae miadie chü ketuo nu ze la vorwa di therieki kemhieshütuo, Jihovae siya.

¹² Krodiko Jihovae puya: Thechü hau themia rei mu khunuo rei jü di ruozhüta, sirei rüna süko pete nu kuopfheko u kuoko bu zhü di rüleikelie chü chü lalietuo.

¹³ Kijükhruko gei rünako, Shefela nu mu Negeb nu, Benjamin kijü nu, Jerusalem khieümhou thechüko, mu Juda rünako nu, tekuokroko phrüyakezhau dzie khro vortuo, Jihovae siya.

Kemiatho Co-u mu David Ze Dietseidiekhokelie

¹⁴ Teisozhako vor touzhie, Jihovae siya, sükisü ae Israel kinuko mu Juda kinuko gei mha kevi chüshütuo üdi phrakeshüu chüshütuo.

¹⁵ Teisozha süko nu mu süteiki ae kemiatho seico-u bu David la lhousierkelie chüshütuo; mu puoe kijü nu kethoca mu kemezhüu chüshütuo.

¹⁶ Süteiki Juda kelalietuo mu Jerusalem khrukhre di lhou batatuo, siro puo üse “Jihova u kemiatho-u zo,” idi kietuo.

¹⁷ Kekreilamonyü Jihovae puya: David-e Israel kinuko kediba gei baketuo themia jütalie lho,

¹⁸ mu Levimia zievo a mhodzünu kethe ruosuo khashüketuo, tsiu thoulha ruosuo, mu ruosuo chüshü sei balieketuo themia jütalie lho.

¹⁹ Jihova die Jeremia ki vor:

²⁰ Jihovae puya: Mhanuü nieko mia puo a teisozha mu teizeizha ze dietseidiekho pie kezhüu bierhuowa, sidi teisozha mu teizeizhau puo teiki par mota ro,

²¹ süzenu ae David a kituou ze dietseidiekhokelieu, puo kediba gei diketuo nuo jütalie lho ükecü, tsiu Leviko zievo liethoko ze kepfhekhokelieu bierhuowalie kevi ze.

²² Teigei krodiko phrü hulie kelho kemhie morei dzükezha nu huocanyo mejü hulie kelho kemhie, a a kituou David seyie, tsiu a lietho chüyakezha Levimia chü pekrashütuo.

²³ Jihova die Jeremia ki vor di:

²⁴ themia hakoe sie, “Jihova kedakelie kikrunie puoe khawate” isi di pu keba no leshü mo mo ga? Siro uko mhodzüki a themia le kethachü pie seyie puo kemo mhie zocü leshü mo me?

²⁵ Jihovae puya: Mhanuü ae teiso mu teizei ze dietseidiekholie mo morei tei mu kijü zhoko ze kepfhekholie mo üro,

²⁶ ae Jakob mu a kituou David seyie meliewatatuo sidi ae puosepuoyie pie Abraham, Isak mu Jakob seyie mho kekhalie lho. Kekreilamonyü ae puo phou lase sieshütuo, sidi uko ngumezhieshütuo.