Jeremia 32 - Angami Naga CL (Re-edited) Bible (BSI)

Jeremia Lie Puo Khrükelie

¹ Zedekiae Juda kedi chükelie cie ker cie, süu Nebukadnezar kedi teicie kerethetha cie, Jihova kinu die Jeremia ki vor.

² Süteiki Babilon kediu chüpahi-e Jerusalem re, sidi Jeremia siedzekesiu tepie rükhouko bou nu khawa süu Juda kediu kiu nu,

³ Juda kediu Zedekiae puo tepie sünu khawa. Zedekia sie, “Kiüdi siedzedie pu di. Jihovae puya. Ae nadi hau pie Babilon kediu dzie nu shüwatuo, mu puoe süu lielietuo.

⁴ Siro Juda kediue Chaldiamia dzie nunu talie lho, derei puo pie Babilon kediu dzie nu shüwa tou zotuo, mu puoe mhotsou puo ze kerüchütuo siro puo mhotsou puo ngutuo;

⁵ siro puoe Zedekia ze Babilon nu tsutatuo, sidi a vor puo meho kemochie puoe sünu tuotuo, Jihovae siya; nieko Chaldiamia ze kegei rei, nieko kuolie lho, iya ga?”

⁶ Jeremiae sie, Jihova die a ki vorcü:

⁷ N nieu Shalum nuou Hanamel n ki vor di sie, “A lie Anathot nu kebau no khrüliecie, kekreilamonyü noe süu rhakelie n mese zocü la,” si.

⁸ Sitse a nieu nuou Hanamel-e Jihova die tuoi rükhouko kitiezhau nu a ki vor di sie, “Benjamin kijü Anathot nu a lieu khrüliecie, kekreilamonyü kawe lie kezhüu mu rhalie kezhüu sü no zo, n thuo n la khrüliecie.” Sitse ae hauha Jihova die ükecü silie.

⁹ Sidi a a nieu nuou Hanamel lieu Anathot nu kebau khrülie, di rakako mejüpie puo tsüwa, rakachü shekel kerethenie.

¹⁰ Siro a zaru thushü, süu zasi vüwa di zhapuko lielie, sidi roshükhou nunu raka mejüwa.

¹¹ Süsie ae khrükelie zhapu mhatho-u, thezho-u nu kepfhekhokelie kemhiei, tsiu süu leshü mohor pie vükewa dzeu, siro dze kemo leshü rei pielie.

¹² Sidi khrükelie zhapu mhatho-u pie a nieu nuou Hanamel mhodzüki nu, siro khrükelie zhapu mhatho-u nu zhapu kechüko keba nu, rükhouko bou nu keba Judako pete mhodzünu pie Mahseia nuou Neria nuou Baruk tsüwa.

¹³ Ae uko mhodzünu Baruk ki,

¹⁴ Krodiko Jihova, Israel Kepenuopfüe puya: Zhapu hako, khrülieketa zhapu leshü, mohor vükewau rei, tsiu dze kemo-u rei pieliecie, sidi süko pie rünyo li puo nu shüwalie, sidi süko bu teisozha kekra balie kevi chülie.

¹⁵ Kekreilamonyü krodiko Jihova, Israel Kepenuopfüe puya; kijü hanu kiülieko mu khubelieko pie u vie chü lalietuo.

Kesikele Khashünu di Jeremia Kecha Chü

¹⁶ Ae khrükelie zhapuu pie Neria nuou Baruk tsükewa sie, ae Jihova ki cha di sie:

¹⁷ He-i Niepuu Jihova! Noe n kekuo kezha geinu n bou yhashü di teiko mu kijü chüshüe! siro n la mhapuorei chülie kelho tuo mo.

¹⁸ Noe kekhrie ngukemezhie pie themia phou nyienyie pekieshüya, derei miapuonuoko kesuo kechü khepuu pie mianuonuoko gei shüya, puo zae Kepenuopfü kekuo kezhau Krodiko Jihova.

¹⁹ Puo kepetha zha tsiu puo mhatho kuo; N mhi-e themia nuonuo pete meho bayakezhau, themia kehoupuorei puo zho puo rüli kemhie mu puo mhatho kheki sü chüshütuo ükecü la.

²⁰ Noe Ijipt kijü nu zasiko mu u ngoko chüshü, thie ha rei sükemhieya Israel nu rei tsiu themia kekreimia donu rei, sidi n thuo n za chülie, thie ha kemhie di;

²¹ noe Ijipt kijü nunu zasi tsiu ungomhatho chü di mu n dzie kuo tsiu n bou yhase, tsiu kemerie zo di n themia Israel ze parshüe,

²² sidi kijü hau pie süko tsü, süusü noe rüse zo di uko puonuoko ki pie uko tsütuoüshü, kijü süusü mithunudzü mu mepfhidzü kruzhüya;

²³ sidi sünu lelie di süu welie. Derei ukoe n die ze mo morei n zho nu tuolie mo, ukoe no chünukeshü yopuorei chülie mo. Süla noe mha kepeka hako pete pie uko gei vorshü.

²⁴ Harie, mia kewhuomia puothou chüpfü nadiu perhie di lielietuoüzhie, mu nadiue, zhiecha, pekrie mu thepetheruo ze kesetuo, sidi uko ze keperhiekecü Chaldiamia dzie nu shüwatuo, no n thuo süu ngukeba tuoi.

²⁵ Sirei no we, he-i Niepuu Jihova, a ki pushüte, “Raka se lieu khrülie di zhapu seliecie,” puo thuo nadiu pie Chaldiamia dzie nu shüwata zo ürei.

Ukepenuopfü Themiako la Vorlieketuo Kepu

²⁶ Jihova die Jeremia ki vor:

²⁷ Harie, ae Jihova, u chü chükepfü pete Kepenuopfü; a mhachülie kere huo ba me?

²⁸ Süla, Jihovae puya: Ae nadi hau pie Chaldiamia dzie nu siro Babilon kediu Nebukadnezar dzie nu shüwatuo, mu puoe süu lielietuo.

²⁹ Siro Chaldiamia nadi hau ze kegeikecüko, vor di mi pie nadi hau thetuo, sidi kiko thewatuo, süko kilha peso geinu ukoe kethengu thepie Baal tsü tsiu kekrie ruosuo rupie terhuo kekrei tsü, di a nou chü kemeyie.

³⁰ Kekreilamonyü Israel themiako mu Juda themiako mhapuorei chü mo derei u nhicu nunu a mhodzüki mha kesuou chü tuota zo; Israelmiako mhapuorei chülie mo derei uko dzie mhathoko pie a nou chü kemeyiekecü sie sa mo, Jihovae siya.

³¹ Süla nadi hau puo chükelie nhie nu vor thie ketso a nou chü kemeyie mu chü kerüda tuo zo, süla a süu a mhodzünu bie kediwatuoüte.

³² Kekreilamonyü Israel themiako mu Juda themiako kesuo kechü pete la, ukoe süko chü a nou bie kemeyie, uko, uko kediko, tsiu uko kezhako, uko zievoko mu uko siedzekesiko, Juda themiako mu Jerusalem nu kelhouko pete.

³³ Ukoe uko chie kereipie a tsü, sidi uko zie kereishü mo; ae tsiekenuo uko petha vor zo, sirei ukoe rünyü mvü mu chü kemezhükeshü lielie mo.

³⁴ Ukoe u vie kerütsekecüko khapie kinu a za sekezhau nu shü di süu perhuwa.

³⁵ Ukoe Hinom nuou razhau nu Baal la thechü kerükrie chülie, sidi u nuonuo thepfumia mu thenumia thepie ruosuo chü di Molek tsütuoü, ae uko bu chünushü mo, morei süu a nou rei vor mo zo uko bu mha kerütse hau chü di Juda chü kephoumaketuo.

³⁶ Süla tsie Jihova, Israel Kepenuopfüe puya, nadi hau dze nieko pukecü, “Zhiecha geinu, mu pekriekecü geinu, tsiu thepetheruo geinu süu pie Babilon kediu dzie nu shüwatuo,” iya.

³⁷ Harie, ae a noupfhü nu mu a nouyie nu tsiu a nei mo se di uko whuopie cüre tuoketa kijü pete nu uko pfhü kengulietuo; ae uko ze la thechü hanu vortuo, mu ae uko bu khrukhre di lhou batatuo.

³⁸ Ukoe a themia chütuo, mu a uko Kepenuopfü chütuo.

³⁹ Ae uko bu nou puochü mu cha puo chülietuo, sidi uko bu puotei pete nu a preilietuo, uko dzevi uko nuonuoko u sie vorkezhüko dzevi la.

⁴⁰ Ae uko ze kechachie dietseidiekhotuo, uko gei mha kevichütuoü mu tsiesietalie lho, mu a khrüpreiu pie uko melou nu shüwatuo, sitse uko a kinu tsiesietalie lho.

⁴¹ Ae uko gei mha kevi kechüu a neitatuo; sidi a nou pete se tsiu a kerheiro pete se kemiatho nu kijü hau gei uko pelhoushütuo.

⁴² Kekreilamonyü Jihovae puya: Ae mha kesuo kemeriekecü se themia hako gei kevor tuoi, ae khashü uko tsütuoü phrakeshü mha kevi pete uko gei se vorshütuo.

⁴³ Kijü hau nu lie khrülietuo niekoe sie süu üse methuote, themia morei khunuo rei jü, süu khapie Chaldiamia tsüwate, iya.

⁴⁴ Lieko raka pie khrütuo, mu mhatho-u chülietuo tsiu zasi mu zhapu chülietuo, Benjamin kijü nu, mu Jerusalem khieümhoura, tsiu Juda nadiko pete nu, kijükhru rünako nu, Shefela nu, mu Negeb nu; kekreilamonyü a miadie chü ketuo nunu uko bu la vorlietuo, Jihovae siya.