Jeremia 31 - Angami Naga CL (Re-edited) Bible (BSI)

Miadie Chü Voketako U Nei siei di la Kevor

¹ Sükisü, Jihovae puya, ae Israel kikru peteko Kepenuopfü chütatuo, mu ukoe a themia chütuo.

² Jihovae puya: Zhiecha nunu lhiekelie themiakoe rayha nu ngukemezhie ngulie; Israel kerülei pfhükesie ki,

³ Jihova kepetse phi nu puo pengushü. Ae kechachie bayakezha kekhrie pie n khrie vor zo; süla a kemiatho-u n gei ba seiya zo.

⁴ A n chü piesie lashütuo, mu n chü la sielietuo, He-i Israel phousepfü! Noe n übouko pie lalietuo, sidi u nei kebako ze u dowhuotuo.

⁵ Noe Samaria kijüthouko gei khube pelhoutuo, mha pelhouyakezhamiae pelhoutuo, sidi puo si cü ketheguotuo.

⁶ Efraim kijükhru rüna kepfheko melieshüketuo teisozha puo batuo: “Vorlie, úko Zion gei, Jihova Ukepenuopfü ki vo khe,” si.

⁷ Kekreilamonyü Jihovae puya: Jakob la nie nei di keliliecie, tsiu seyieko krüu la shieshülie; pu pesishülie, ketshe khashülie, di sie, “He-i Jihova, n themia, Israel lhiepie kebako kelashücie,” ilie.

⁸ Harie, ae pesotsa kijü nunu uko ze tsurshütuo, tsiu petse phikecü kijü valatsa nu uko kengulietuo, mhiciemia rei phiyhomia rei uko donu tuotuo; u nuonuo zeketuomia tsiu nuonuovachü ketuomia rei sa tuotuo, krodi kezha chü, ukoe hanu la vortatuo.

⁹ Ukoe kra zo di vortuo, tsiu thukepeluo se di a uko cha thatuo, a uko bu kerüdzü khie tuo votuo, uko phi mesüwalie kelho cha kemezhü nu; kekreilamonyü ae Israel puou mu Efraim-e a nuo nuorieu zo.

¹⁰ Jihova die rünyüliecie, he-i seyieko, sidi süu pie dzü khie kijü kepetseko nu pesishülie; sidi sie, “Israel biepie cürekewau, puoe kuopfheu tuoi puo khapie balietuo.”

¹¹ Kekreilamonyü Jihovae Jakob rhaliete, sidi puo ki kuokuokecüko dzie nunu puo rhaliete.

¹² Ukoe vorlie di Zion thou geinu kelituo, tsiu keze Jihova ketseikeviu la thoulha, khubedzü, mu tier la, siro tekuonuo mu kicükiri kemedzüko la uko u neituo; uko kelhoue dzü pie vakeshü tezie puo kemhie, sidi uko mhakipuorei thenousuo salie lho.

¹³ Sitse phousepfüe puo nei di helim chü, mu khriesamia tsiu phichümia rei u neituo. Ae uko thekrü pie kenei chüwatatuo, sidi uko nou thupeluo, tsiu nousuo sou nu kenei khashütuo.

¹⁴ Ae mha pie zievoko ketshukelhuo chüshütuo, tsiu a tseiüvikeshü geinu a themiako u kelhuo chülietuo, Jihovae siya.

¹⁵ Jihovae puya: Rama nunu mhapfhe puo si, kra mu thekrü chü. Rachel-e puo nuonuoko krü kra; sidi puo nuonuoko la puo nouluo mvüta, kekreilamonyü uko tuo sa mote.

¹⁶ Jihovae puya: Kra motuoü n ketheliecie, mhidzü bu n mhi nu kru sa hie; kekreilamonyü n mhatho zhakhra chüshü tsütuo, Jihovae siya: ukoe ngumvümia kijü nunu la vortuo;

¹⁷ N siedze kemerü ba zo, Jihovae siya: n nuonuoko u thuo u rüna nu la vorlietuo.

¹⁸ Efraim hai di meheimelo keba a si tou zo: “No a pethashüte, mu a a pethakeshü pfüliete; ae pethapfükemo thudoyo tuoi di. A ze la vorshücie, a bu la vorliecie, noe Jihova a Kepenuopfü zocü la.

¹⁹ A rürei tuoketa sie a thenou kediliete; mu a pfhülieketa sie, a a do kepfhü; ae mengalie, mu a ziekejü chü bata kekreilamonyü a a khriesaki ngau toupfüliete,” si.

²⁰ Efraim-e a nuo a khrieu me? Puoe nuo a keneiu me? A tsiekenuo die pu puo petsouya, siürei a tsie ketso puo rükra ba zo. Süla ae puo la a nou meyhumezhieta; a puo ngumezhie lashü tou zotuo, Jihovae siya.

²¹ Chapfüko nu zasi khashüliecie, n thuo n chatha tsieko pfhelie; n nou pie chapfüu, no kevo chau nu shülie. Rürei vorlie, he-i Israel phousepfü, rürei la n nadi hako nu vorlie.

²² He-i dietho kemo nuopfü, no kichiepuo rühou tuotieya ga? Kekreilamonyü kijüu gei mha kesa puo chüshüte: thenumiapfü puoe thepfumia puo yalietuo.

²³ Krodiko Jihova, Israel Kepenuopfüe puya: Ukoe Juda kijü nu mu puo nadiko nu, a uko miadie chü ketuo nunu ze la vorkelie ki die hako se latuo: “Jihova bu japie n tsücie, he-i, kemezhümia lhou keba thechü nu, He-i kemesa kijükhruko!”

²⁴ Sidi Juda mu puo rüna pete, lieciemia, tsiu tekuo ze rühou tuoyakezhamia keze lhoutuo.

²⁵ Ae u nyie ketuomia bu u kelhuo ngulietuo, tsiu phisiatuoketamia pete chü perhei lashütuo.

²⁶ Haki ae cosierlie di mehoshü, siru a ze ketheguo selieta zo.

Siazha pie Mia Puopuo Ketsü

²⁷ Teisozhako vor touzhie, Jihovae siya, süki ae themia tsia mu khunuo tsia pie Israel kinuko mu Juda kinuko donu prushütuo.

²⁸ Ae uko phewa, biethewa, kelhouwa mu pekawa tsiu mha kesuo se uko gei vortuoükezha tuoi, ae uko chüse sieshütuoü mu pelhoushütuo üdi pfhe batuo, Jihovae siya.

²⁹ Süki ukoe sie: “U puonuokoe khubesi kekhro cüwate, sidi u nuonuo bu u hu mekre bate,” isikecü pu salie lho.

³⁰ Derei mia puopuokecüe puo thuo puo kesuo la siatuo; themia khubesi kekhro kecü kheko, u hu mekretuo.

Dietseidiekho Kesau

³¹ Teisozhako vor touzhie, Jihovae puya, süki ae Israel kinuko mu Juda kinuko ze dietseidiekho chü kesalietuo.

³² Süue ae Ijipt kijü nunu uko dzie teshü kepar nhie uko puonuoko ze dietseidiekho kechüu kemhielie lho, ae uko nupfu kemhie zorei ukoe a ze dietseidiekhokelieu varhuowa, Jihovae siya.

³³ Derei ae Israel kinuko ze dietseidiekhokelieu haituo, teisozha sükosü Jihovae siya, Ae a zho-u pie uko noutsa shütuo, tsiu süko pie uko melou gei thushütuo; sidi ae uko Kepenuopfü chütuo, mu ukoe a themia chütuo.

³⁴ Siro uko huoniehuo petha morei mia puo mia puo ki, “Jihova silie” isilie lho, kekreilamonyü uko pete-e a sitatuo, kecütho-u nunu vo kezhatho-u ketso, Jihovae siya; kekreilamonyü ae uko kesuo kechü kejo vashütuo, tsiu uko kephouma rükra salie lho.

³⁵ Jihovae puya, Teiso gei kezie khashüketuo la niaki khashü tsiu teizei gei kezie khashüketuo la khrü mu themvü zhoko khashü, Puoe dzükezha kerhüshü di dzü rüpfhü sie di ruotayacüu, puo zae krodiko Jihova we.

³⁶ Puo zho hako a kinu jüta liro, Jihovae siya. Siliro Israel rei kechachie a mhodzünu seyie chüketuo jütatuo.

³⁷ Jihovae puya: Mhanuü tei pesogeiko mejülie vi üliro, tsiu puo khro kijü mvüdzeu pfhü se parlie üliro, ae Israel nuosenuoyie ukoe chükewa pete khakegewatuo, Jihovae siya.

Jerusalem Chü Kemeyielieketuo

³⁸ Teisozhako vor touzhie, Jihovae siya, süki Hananel tsiepfhe nunu vo Puoke Kharuu ketso nadiu chütuo.

³⁹ Siro puo kemejüro-u Gareb kijüthou geinu sede ro Goah ketso houtuo.

⁴⁰ Tsiu kijü razha pete nu kesiamoko tsiu migeko, mu lieko pete vo Kidron rü ketso, sünunu vo niathutsa Kier Kharu ketso Jihova la mesatatuo. Süue kechachie phewalie lho morei kelhouwalie lho.