Jeremia 30 - Angami Naga CL (Re-edited) Bible (BSI)

Israel mu Juda Ze la Vorketuo Phrakeshü

¹ Jihova die Jeremia ki vor:

² Jihova, Israel Kepenuopfüe puya: A n ki pukeshü pete pie leshüda puo nu thuliecie.

³ Teisozhako vor touzhie, Jihovae siya, sükisü a themia, Israel mu Juda miadie chü tuoketako ae ze la vorshütuo, Jihovae siya, sidi ae khapie uko puonuoko ketsü kijü nu uko bu la vortuo mu uko süu welietuo.

⁴ Jihovae Israel mu Juda dze kepu die hako:

⁵ Jihovae puya: Hiekoe u va pethokecü, kemichie, kemeriekecü, mu noune kejü pfhe sishüte.

⁶ Tsie ketsocie, sidi mehoshücie, thepfumia nuonipfülieya me? Siro kiüdi themia pete rei u dzie pie u va nepfü di thenumia nuonuovachü ki mhieta ga? Kiüdi mia pete zie siatheda haita ga?

⁷ He-i! Teisozha süusü zhaza sü kemhiekecü jü; süu Jakob kemezhiekecü teiu, sirei sünunu puo kelalietuo.

⁸ Krodiko Jihovae puya, sünhiesü ae puo vo nunu puo vocieu bietshewa, siro puo phako phreiwatuo, tsiu si kemo themia bu puo pie kituo chü salie lho.

⁹ Derei ukoe uko Kepenuopfü Jihova, mu a pie uko tsüketuo u kediu David lie chütatuo.

¹⁰ Derei n la zo we, michieta hie, a kituou Jakob, Jihovae siya, tsiu nie ziejüta hie, he-i Israel; kekreilamonyü a kepetsera nu, mu n seyieko miadie chü ketuo kijü nunu kelashütuo. Jakob-e la vorlietuo sidi kerülei ngulie di kemekrie batatuo; siro miapuorei puo chüpie puo bu michietalie lho.

¹¹ Kekreilamonyü a n kelashütuo üdi, n ze tuo zo, Jihovae siya; ae n phruopie mia donu keshü seyieko pete peka lotsowatuo, derei a n bu puo thela chütalie lho. Sirei a puotouu se n pethatuo, tsiu n bu siazha ngu mo zo di tuolie lho.

¹² Jihovae puya: N kechüu chü kemenelie kenjüte, tsiu n rüzau re sete.

¹³ N nyieu nu n yapie shüketuo miapuorei tuo mo, n rüzau la daru jü, n chü kemenelie kenjüte.

¹⁴ N kekhriemia pete n rükra mote; uko n la u nounyü puorei jü; kekreilamonyü ae ngumvümia tuoi n bieshü, ngumvümia u zhosuo di chüyakezha tuoi, süusü n kejokemou zha phiketa la, mu n kephouma kra phiketa lanu zo.

¹⁵ Kiüdi kemezhiekecü la kraya ga? N kechüu chü kemenelie kenjü, n kejokemou zhathorte, mu n kephouma kra phiketa la, a mha hako chüpie n gei shüwate.

¹⁶ Süla n pekakecümia pete pekawatuo, tsiu n ngukemvümia pete, uko kehoupuorei, miadie chü votatuo; siro n bie pesuokecümia pete bie pesuowatuo, mu n rükeba pete ae pie mia chüte chüwatuo.

¹⁷ Ae n bu shürholietuo, tsiu a n rüzapfüko chü kemeneshütuo, Jihovae siya, kekreilamonyü ukoe no üse thikewau üdi sie; “Hauha Zion; miapuorei puo varükraya kemo-u!” isi.

¹⁸ Jihovae puya: Ae Jakob pfhekiko nu theruo keviu se la vorshütuo; sidi puo kebachüko ngumezhieshütuo, razhüketa nadiu chü lashütuo, sidi kedikiu bu sünu puotoukecü chü nu balietuo.

¹⁹ Süko geinu kethezie pfhe, mu kenei pfhe si partuo. Ae uko chü pekrashütuo, mu uko tsatalie lho; a uko chü ketherhushütuo, mu mia uko pese salie lho.

²⁰ Uko nuonuoko rei keriekimia tuoi, uko a mhodzünu uko kehouu chülietuo; mu ae uko pesekecüko siazha pie tsütuo.

²¹ Siro uko donu mia puo thuo uko kediu chülietuo, uko donunu uko kekhakezhau siertuo; ae puo ze penuo vortuo, mu puoe a ki vortuo, kekreilamonyü puo thuo a ki vor nyükelie hau supuo ga? Jihovae siya.

²² Siro nieko pie a themia chütuo, mu a nieko Kepenuopfü chütuo.

²³ Mehoshücie, Jihova teikhrieu! Noupfhünouyieu prate, teikhrie khriewhi puo; süue kerüzhümia tsü gei tsurtuo.

²⁴ Jihova nouyie kemeriekecüu puo mhatho-u chüwa kemochie mu puo keleu chü tseiwa kemochie se lalie lho. Teisozha thelatsa nieko hau ca silietuo.