Jeremia 3 - Angami Naga CL (Re-edited) Bible (BSI)

Israel Dietho Kemo

¹ Mhanuü mia puoe puo kimia khawa, sidi süpfüe puo kinu tuota, sidi mia kekreimiae puo kimia chüta, siliro puoe süpfü ki la votuo me? Kijü süu perhu sewata mo üme? Noe n neimia kekra ze di thethelie; sidi rürei a ki la vortuo me? Jihovae siya.

² Tosie di thechü kerükrieko mehoshücie! No zhü kemo thechü kirapuo ba ga? Arabmia nhatsa nu lhou ketuo tuoi, no cha khieki ba di n neimia pfhe. Sidi noe thethe lie, tsiu n rügerüzhü se kijüu perhuwa.

³ Süla tei-e rüshü mote, tsiu bayie teirüu rei rüshü mote; sishierei n teikhie-e thethenumia teikhie tuoi, noe mengalie mo.

⁴ No tsie kinu a ki, “A puo, noe a khriesa khrietho-u chü vor zo,

⁵ puoe kechachie puo nei mo batuo me, sidi süu bu vo puo thela tsotuo me?” isi. Hauha noe pushüe, derei no chülie kevi de mha kesuo chü.

Thenoukedilienu Kiekeshü

⁶ Kediu Josia teiki Jihovae a ki pukeshü: Puoe kedipuo chüshü shi, no ngu mo? Kepele kejü, Israel. Puoe kijüthou kerükrieko gei, tsiu seibo kepejo kheko khro nu thethe lie.

⁷ Siro a lecü, “Hako pete chükewa sie puoe rürei a ki vortuo,” iba; derei puo rürei vor mo, mu puo sieze kemedapfü Judae süu ngu.

⁸ Siro kepele kejü Israel thetheliekecü hako pete la a puo khawa, sidi puo khakewa leshü pie puo tsüwakecü puoe ngu. Sirei puo sieze kemedapfü Judae michielie mo, derei puo rei vo thethelieta.

⁹ Kekreilamonyü puoe thethekelie pie mhaü mo, sidi puo kijüu perhuwa, mu ketsie tsiu seiko ze pieü chü.

¹⁰ Mha hako pete nu rei puo sieze kemedapfü Judae puo nou puo thochü di rürei a kitsa vorlie mo, derei puo mevivakecü nunu zo, Jihovae siya.

¹¹ Süsie Jihovae a ki: Kepele kejü Israel-e kemeda Juda ki rei mezhükuokecü thashüte.

¹² Vo di die hako pie pesotsa shieshülie, di sie: Kepele kejü Israel, rürei la vorliecie, Jihovae siya. A nei kemo nunu n meho lho, ae mia ngumezhieyacü la, Jihovae puya; A kechachie a nei mo ba lho.

¹³ Noe Jihova n Kepenuopfü petsou, di n kenei kezapie sikemomia ze seibo kepejo kheko khro zhü, tsiu a die ze mo di jowaketau siliecie, Jihovae siya.

¹⁴ Rürei la vorliecie, he-i, kepele kejü nuonuoko, Jihova puya, ae n niepuu zocü la; a nadi puo nu mia puo mu kikru puo nu mia kenie, idi ae nie ze Zion nu vortuo.

¹⁵ Siro ae a nouliemia pie nieko kepfhemia chüshütuo, ukoe kesikele mu puocapuola kesi se nieko vachütuo.

¹⁶ Sidi nieko kijüu nu kralie tsiu kruolie tse, sünhie ukoe “Jihova dietseidiekhobouu” ikecü pu salie lho. Süu uko nou vorlie lho, morei rükralie lho, morei mengu salie lho, Jihovae siya.

¹⁷ Süteiki ukoe Jerusalem üse Jihova kediba üdi kietuo, mu seyie pete sünu vo kengutuo, Jihova za se Jerusalem nu votuo, mu ukoe u nou re di u kelekemedo kesuo nu tuo salie lho.

¹⁸ Sükisü Juda kinumia Israel kinumia ze tuotuo, sidi ukoe kijü pesotsa nu a khapie nieko puonuoko bu welietuo üdi khashü tsükecü kijü nu keze vortuo.

¹⁹ Kedipuo mhie di a n khapie a nuonuoko donu shü, sidi kijü kevi puo, seyieko donu kayie kevi puo pie n tsüshütuoüliete shi idi ae le. Siro a lecü, no a üse, A Puo, idi a siemedzikecü nunu rürei lata lho nhie iba.

²⁰ Sirei mianupfünuo puoe dietho mo di puo nupfu khakewa tuoi, sütuoi nieko a gei dietho mote, he-i Israel kinumiako, Jihovae siya.

²¹ Mhapfhe puo thechü kerükrieko gei si vota, Israel nuonuoko la thekrü chükecü, kekreilamonyü ukoe uko cha bie kerülhiwate, ukoe uko Kepenuopfü Jihova rükra mote;

²² “Rürei la vortacie, nie kepele kejü nuonuoko, sitse a nie kepele kejüu chü kemeneshütuo.” “Hie n ki vorzhie; noe hie Kepenuopfü Jihova zokecü la.

²³ Kijütseiko mu kijüthouko gei kerüyocüko, mhaseketuo zo. Jihova úko Kepenuopfü gei Israel kelakelie ba tou zo.

²⁴ “Derei u khriesarüü teiki thengau thuo u puonuoko mhatho, uko kuoko mu uko kicükiriko, uko nuonuo thepfuko mu thenuko mezuliete.

²⁵ Úko menga di tetsuzhüta khe, tsiu u therhu jüketau bu u yalie khe, kekreilamonyü we Kepenuopfü Jihova gei phoumawate, u puonuoko, u khriesarüü nunu vor thie ha ketso, sidi úko Kepenuopfü Jihova die zelie mote.”