Jeremia 29 - Angami Naga CL (Re-edited) Bible (BSI)

Jeremia Leshü pie Miadie Chü Voketako Ketsü

¹ Jeremia siedzekesiue Jerusalem nunu leshü thupie teze miadie chü voketa phichüko, zievoko mu siedzekesiko, siro Nebukadnezar-e Jerusalem nunu teze Babilon nu voketa themia peteko ki keshü die hako.

² Hau kediu Jekonia, mu kedipfü zuo, kediki nu kezhako, Juda siro Jerusalem krütako, sei mistiriko, mu rükreimiako Jerusalem nunu tezeketa sie nu ketseshü.

³ Kediu Zedekiae Shafan nuou Elisa mu Hilkia nuo Gemaria, unie ketsepie Babilon nu kediu Nebukadnezar ki shü mu unie dzie nunu leshüu ketseshü. Sünu pucü:

⁴ Krodiko Jihova, Israel Kepenuopfüe puya, miadiemia chü voketako ae Jerusalem nunu teze Babilon nu tsuketako ki:

⁵ Ki chülie sidi süko nu lhou balie, tezie chülie sidi sünu lhou parkelieko cülie.

⁶ Thenu lielie sidi nie nuonuo thepfu rei thenu rei nyilie; nie nuonuo thepfuko bu thenu lielie, nie nuonuo thenuko bu nyhülie, sitse uko bu thenu rei thepfu rei pelhoulietuo, sidi nieko sünu kruolie, mu tsata lho.

⁷ Derei ae nie bu ta kevo nadiu dzevi pfhülie, tsiu Jihova ki süu la chalie, kekreilamonyü süu dzevi nunu nie dzevi rei ngulietuo.

⁸ Krodiko Jihova, Israel Kepenuopfüe puya: Nieko donu siedzekesiko mu kemeduoko bu nie sekedowa hie, morei ue kepema mhoko rünyü hie,

⁹ kekreilamonyü uko a za nunu ketijü siedzedie puya; a uko ketseshü mo, Jihovae siya.

¹⁰ Kekreilamonyü Jihovae puya: Babilon nu teicie hiethenie tseiketa ze nu a nieko ki la vortuo, sidi a phrakeshüu nieko gei chü tseishütuo mu a thechü hanu nieko ze la vorshütuo.

¹¹ Ae nieko la mharhü kebako a si ba, Jihovae siya, nie dzevi la mharhüko mu nie pesuowaketuo la mo, siedze kemerü puo pie nie tsüketuo la

¹² Süsie niekoe a kie di vor a ki kecha kechü ki, ae nie pfhe rünyütuo.

¹³ Nie a pfhükecü ki, nieko a ngulietuo; nie-e nie nou pete se a pfhü liro,

¹⁴ nieko bu a ngulietuo, tsiu nieko whuopie seyie neiünei nu mu thechü neiünei nu shükewara nu ae nie ze vor kengulietuo, Jihovae siya, tsiu ae nieko teze voketa thechüu nunu nie ze la vorshütuo.

¹⁵ Kekreilamonyü niekoe pukecü, “Jihovae Babilon nunu u la siedzekesimia pie sierliete” iya.

¹⁶ David kedibau gei keba kediu, siro nadi hau nu kelhou themia peteko, tsiu nieko siezedzürie nieko ze takemoko dze Jihovae pu.

¹⁷ Krodiko Jihovae pucü, ae uko gei zhiecha, pekrie, thepetheruo khashütuo, sidi uko bu suothorketa chiedesi cülie kenjükecü tuoiwatuo.

¹⁸ Ae zhiecha, pekrie, mu thepetheruo se uko pechütuo, sidi uko pie kijüu gei kedirüvie neiü nu mia bu u michie, rüsekepfü vie mu mia kechükede, siro mia bu rütse, mu uko whuopie seyie neiü nu keshü kheko nu mia bu u pesetuo,

¹⁹ kekreilamonyü ukoe a pfhe rünyü mvüte, Jihovae siya, ae te mo zo di a kituo siedzekesiko ketseshü, derei ukoe rünyü mvüte, Jihovae siya.

²⁰ Derei tsie nie miadie chü voketako a bu Jerusalem nunu ketsepie Babilon nu shükewako:

²¹ Krodiko Jihova, Israel Kepenuopfüe puya, Kolaia nuou Ahab mu Maseia nuou Zedekia a za nunu ketijü siedzedie pu di: A uko khapie Babilon kediu Nebukadnezar dzie nu shüwatuo, mu puoe nieko mhinguki nu uko dukhriwatuo.

²² Süko lanu Juda miadie chü Babilon nu keba pete rüse hau se tuo: “Jihova bu n chüpie Zedekia mu Ahab, Babilon kediue miü nunu thekewa mhiewaliecie,”

²³ kekreilamonyü unie-e Israel nu kenya mhatho chü sidi u zanuomia kimia ze pieü chü, siro a za nu kemeda die pu a süsü unie bu punushü mo; a a thuo si ba mu zhapu chükeshüu zo, Jihovae siya.

Shemaia Leshüu

²⁴ No Shemaia Nehelam-u ki hakemhie pushülie:

²⁵ Krodiko Jihova, Israel Kepenuopfüe puya: No n za nunu leshü pie Jerusalem nu keba khe, mu Maseia nuo Zefania zievo-u siro zievo peteko ki shü di hakemhie pushülie,

²⁶ Jihova n chüpie Jehoiada zievo-u sou nu zievo chüshü, sidi Jihova kinu mha kemeho bu balieketuo la themia kehoupuorei kenyamia di puo thuo puo chüpie siedzekesimia üta ro, no puo pie kedieki nu shüwalie tsiu seiphikha mu vokha nu shüwalie.

²⁷ Siro kiüdi no tsie Anathot-u Jeremia nie la siedzekesi chü kevor-u kerhie mo ga?

²⁸ Kekreilamonyü puoe ketsepie Babilon nu keba hie ki pukeshü, “Süu ba chatatuo; kiko chülie di sünu lhou batalie, tsiu tezie chülie di sünu lhou parkelieko cülie,” si.

²⁹ Sitse Zefania zievo-u leshü hau Jeremia siedzekesiu nyie nu phrüshü.

³⁰ Süsie Jihova die Jeremia ki vor di sie:

³¹ Dielie ketsepie miadiemia chü tuoketa kheko ki pushülie, Jihovae Nehelam-u Shemaia dze hai di puya: Shemaiae nie ki siedzedie pu, sirei a puo ketseshü mo, sidi puoe nieko chüpie nie bu ketijü peletakecü la.

³² Süla Jihovae puya. Ae siazha pie Nehelam-u Shemaia tsütuo mu puosepuoyie mia puo bu rei themia hako donu lhoulie lho; a themiako la mha kevi chüshütuoü ketuoko ngulie lho, Jihovae siya, kekreilamonyü puoe Jihova petsoukecü pukeshü la.