Jeremia 28 - Angami Naga CL (Re-edited) Bible (BSI)

Hanania Jeremia Petsou di Siaketa

¹ Siro sücie, Juda kediu Zedekia kedi chükelie therieki cie diau, khrü pengouu nu, siedzekesi Azur nuou Hanania, Gibeon nu kevor-u, Jihova kinu, zievoko mu themia pete keba nunu a ki pu di sie,

² “Krodiko Jihova, Israelko Kepenuopfüe puya: Ae Babilon kediu vocie bietshewate.

³ Teicie kenie donu ae Jihova kinu mhabouko, Babilon kediu Nebukadnezar-e thechü hanunu se Babilon nu voketako se la vortatuo.

⁴ Siro ae Juda kediu Jehoiakim nuou Jekonia, mu Juda themia miadie chü Babilon nu tsuketa pete ze la thechü hanu vortatuo, Jihovae siya, kekreilamonyü ae Babilon kediu vocie bietshewatuocü la,” sita.

⁵ Sitse Jeremia siedzekesiue zievoko mu Jihova kinu ketha themia pete mhodzünu sie Hanania siedzekesiu ki die pu,

⁶ ru siedzekesiu Jeremiae sie, “Amen! Jihova bu sikecü chüshülie; Jihova bu nie-e siedzedie pukeshü tuoi, Babilon nunu Jihova kinu mhabouko, tsiu tezeketako pete ze thechü hanu la vorshücie.

⁷ Derei tsie a n nyie nu kepu die mu themia pete nyie nu kepu die rünyüshücie.

⁸ Kerieki siedzekesimia n mhodzü mu a mhodzü ketuokoe seyie kekra nu mu kedirüvie kekra nu, terhü, pekrie, thepetheruo vorketuo dze siedzedie pushü.

⁹ Vitho dze siedzedie kepumia, puo siedzekesi dieu chü tseilie tse, Jihova siedzekesi süu ketseshü ketho zo ücü silie.”

¹⁰ Sitse siedzekesiu Hananiae Jeremia siedzekesiu vo nunu vocieu pielie, di süu bietshewa.

¹¹ Siru Hanania themia pete keba nunu pu di sie, “Jihovae puya: Hamhie di ae teicie kenie donu seyieko vo nunu Babilon kediu Nebukadnezar vocieu bietshewatuo,” sishü, sidi siedzekesiu Jeremia puo cha nu vota.

¹² Siro Hanania siedzekesiu Jeremia siedzekesiu vo nunu vocieu bietshekewa sie, Jihova die Jeremia siedzekesiu ki vor;

¹³ vo di Hanania ki pushülie, Jihovae puya. Noe sei vocieu bietshewa rei süko sou nu no thegi vocie chütuo.

¹⁴ Kekreilamonyü krodiko Jihova, Israel Kepenuopfüe puya. Ae seyie hako pete vo nu thegi vocie khashü, uko bu Babilon kediu Nebukadnezar lie chüketuo la, tsiu ae lie nu khunuoko rei sa pie puo tsüwate.

¹⁵ Mu siedzekesiu Jeremia sie Hanania siedzekesiu üse, “Rünyüliecie, Hanania, Jihova n ketseshü mo, mu no themia hako chüpie uko bu kemeda pelete.

¹⁶ Süla Jihovae puya: Ae kijüu zie geinu n kelhouwatuo. Ciethie no siatatuo, kekreilamonyü noe Jihova petsoukecü puketa la,” sishü.

¹⁷ Sükemhie di Hanania siedzekesiu sücie khrü thenieu khrü siata.