Jeremia 27 - Angami Naga CL (Re-edited) Bible (BSI)

Vocie Seiu Zasi

¹ Kediu Zedekia, Josia nuou Juda kijü mho dikelie therieki, Jihova kinu die Jeremia ki vor.

² Jihovae a ki pukecü: No seita pie vocie chülie, sidi süko pie n vo nu shülie.

³ Sidi die ketsepie Edom kediu, Moab kediu, Ammonmia kediu, Tur kediu, mu Sidon kediu tsücie, Jerusalem nu kediu Zedekia ki vor keba dieliemia dzie nunu ketseshücie.

⁴ Uko niepuko la die hau pushülie: Krodiko Jihova, Israel Kepenuopfüe puya: Hau se nieko niepuko ki pushücie.

⁵ Kijüu, themia mu khunuo kijüu gei ketuoko, a kekuo kezha tsiu a bou yhapie chüshü, sidi süu pie a mhodzüki puotoukecümia tsüya.

⁶ Siro tsie a kijü hako pete pie Babilon kediu Nebukadnezar, a kituou dzie nu shüwate, siro lie nu khunuoko bu puo lie chünu di ae pie puo tsüwate.

⁷ Sidi seyie pete puo lie chütuo, mu puo nuo siro puo tsunuoko, idi puo kijüu teiu vorlie kemochie situo; tsiu süsie seyie kekra mu kedi kezhakoe puo pie uko diemia chülietatuo.

⁸ Derei seyie kehoupuorei Babilon kediu Nebukadnezar lie chü mo, tsiu u vo nu Babilon kediu vocieu shükemomia, ae zhiecha mu pekriekecü, tsiu thepetheruo pie seyie süu pechütuo, ae puo dzie bu süko pekawa kemochie si tuo, Jihovae siya.

⁹ Süla, nie-e nie siedzekesiko, nie themouko, nie mho kepemako, kemeduomia, mu mha sekedoyakezhako pfhe rünyü hie, sükoe nie ki, “Nieko Babilon kediu lie chü hie,” isiya.

¹⁰ Kekreilamonyü ukoe nieko ki ketijü siedzedie pu di, nie kijü nunu nie ze kepetsera vota, sidi a bu nie whuowa, mu nie bu kaüjütatuo.

¹¹ Derei u vo pie Babilon kediu vocie nu shükelie seyiemia, mu puo lie chükeliemia, ae süko bu u thuo u kijü nu balietuo, Jihovae siya, siro ukoe süu cielie di sünu lhoutatuo.

¹² Ae Juda kediu Zedekia ki rei sükemhie tou di pu: N vo se Babilon kediu vocie nu leliecie, sidi puo mu puo themiako lie chülie di rheilie.

¹³ Kiüdi no mu n themiako zhiecha geinu, pekriekecü geinu, tsiu thepetheruo geinu siatuoü, Jihovae Babilon kediu lie chü kemo seyieko dze kepu kemhietatieya ga?

¹⁴ Nieko Babilon kediu lie chü hiecie idi kepu siedzekesiko die rünyü hie, kekreilamonyü ukoe nieko ki ketijü siedzedie puya.

¹⁵ Ae uko ketseshü mo, Jihovae siya, derei ukoe a za nunu ketijü siedzedie puya, sikecü la ae nieko mu nie ki siedzedie kepuko whuowa di nieko bu katatuo.

¹⁶ Süsie ae zievoko mu themiako pete ki pu di, Jihovae puya; siedzekesiko nieko ki siedzedie pu di, “Jihova kinu mhabouko pecha mo di Babilon nunu se la vortatuo,” ikecü kepuko pfhe rünyü hie, kekreilamonyü ukoe nie ki ketijü siedzedie pu keba zo.

¹⁷ Uko pfhe rünyü hie; Babilon kediu lie chülie sidi rheiliecie, kiüdi nadi hau perawatuo ga?

¹⁸ Ukoe siedzekesimia üliro, mu Jihova die uko zetuo üliro, uko bu tsie krodiko Jihova ki chacie, sidi Jihova kinu, Juda kediu kinu, mu Jerusalem nu mhabou peshapie kebako bu Babilon nu vota molieketuo la.

¹⁹ Kekreilamonyü krodiko Jihovae puya: ki coko, dzükezhau, puo mvüdzeko, mu nadi hanu peshapie keba mhabouko dze,

²⁰ Babilon kediu Nebukadnezar-e Jerusalem nunu Juda kediu Jehoiakim nuou Jekonia, mu Juda mu Jerusalem nu pehümia peteko teze kedie chüketa ki se tsu kemoko.

²¹ Krodiko Jihova, Israel Kepenuopfüe puya: Jihova kinu mu Juda kediu kiu nu mu Jerusalem nu mhabouko baluokecüko dze.

²² Süko toupfü Babilon nu tsutatuo, sidi a vo uko mehoketuo teisozhau vor kemochie, süko sünu ba zotuo, Jihovae siya süsie ae süko se vorlietuo sidi süko pie thechü hanu shü lalietuo.