Jeremia 26 - Angami Naga CL (Re-edited) Bible (BSI)

Rüsuoki nu Jeremia Siedzedieko

¹ Juda kediu Josia nuou Jehoiakim kedi chükelie therie ki, Jihova kinu die hau vor:

² Jihovae puya: Jihova kifükhro thalie di, Juda nadi peteko nunu Jihova kiu nu rüsuotuoü kevorko pete ki; a n bu uko ki punukeshü dieko pete pushülie; die yopuorei bie petsawa hie.

³ Sitse uko rünyülie rei silie lhomu, sidi themia pete rei, puo zho kesuo nunu rüdilie, mu ae uko mhatho kesuo la uko gei kepeka khashütuoü lekecüu nunu a nou rüdita rei silie lhomu.

⁴ No uko ki pushülie: Jihovae puya: mhanuü niekoe a pfhe rünyü mo, a thezho pie nie mhodzünu keshü medzi mo,

⁵ tsiu a te mo zo di a kituo siedzekesiko dieko rünyülienu ketseshü, derei niekoe rünyülie moliro

⁶ ae ki hau chüpie Shilo kemhiewatuo, tsiu nadi hau chüpie puo bu kijüu nu seyie pete la rüsekewa chüwatuo.

⁷ Siro zievoko mu siedzekesiko tsiu themiako pete Jeremiae Jihova kiu nunu die hako kepu si.

⁸ Siro Jeremiae Jihova puo bu themia pete ki punu di diekhakeshü pete pu thewa tse, zievoko mu siedzekesiko tsiu themia petekoe puo telie di sie, “No sia tou zotuo!

⁹ No kiüdi Jihova za nunu siedzekesi die pu di sie, ‘Ki hau pie Shilo kemhiewatuo, siro nadi hau nu themia puorei ba mota di chü peruowatuo,’ isiya ga?” Sidi themiako pete vor Jihova kiu nu Jeremia houpfülie.

¹⁰ Siro Juda nu kezhakoe hako sikeshü ki, ukoe kediu kinunu Jihova kinu khor sidi Jihova kiu nu kharu kesau ki balie.

¹¹ Süsie zievoko mu siedzekesikoe sie kezhako mu themiako pete ki, “Themia hau siata sü zo kekreilamonyü puoe nadi hau petsoukecü siedzedie pu, nie thuo rei nie nyie pie siwate,” si.

¹² Sitse Jeremia sie kezhako pete mu themiako pete ki, “Nieko sikeshü die hako pete Jihovae a bu ki hau mu nadi hau petsoukecü siedzedie punushüwe.

¹³ Süla tsie nieko zho rüli mu nieko mhatho kedilie, sidi nie Kepenuopfü Jihova die chüüzelie, sitse Jihova nie petsou di pukeshü kepekau nunu puo nou kedilietuo.

¹⁴ Derei a la zo we, a nieko dzie nu ba. Süla nie mhodzüki viü mu puotoukecüu chüpie a gei shüwalie.

¹⁵ Derei nieko si toulie mhanuü nie a biekhriwa liro, kejo kejü zie se nie thuo nie gei mu nadi hau gei tsiu sünu kelhoumia gei votatuo, kekreilamonyü Jihovae a bu die hako pete pie nieko nyieto nu shünu di a ketseshü ketho zo,” si.

¹⁶ Sitse kezhako siro themia petekoe sie zievoko mu siedzekesiko ki, “Themia hau bu siaketuo mese mo, puoe úko Kepenuopfü Jihova za nunu úko ki die pushü zocü la,” sita.

¹⁷ Süki kijüu nu phichümia kro puo siethalie di vor kengu keba themia peteko ki pukecü,

¹⁸ “Moreshet nu Mika, Juda kediu Hezekia teiki siedzedie pu di Juda themia pete ki pushülie: ‘Krodiko Jihovae puya; Zion-e lie kemhiei phiewatatuo; Jerusalem va pie kepupfü zhütatuo, tsiu kiu kijüthou gei sei lhou sie puo thou chütuo’, sishü.

¹⁹ Juda kediu Hezekia mu Juda themia pete-e puo dukhriwaü me? Puo Jihova prei di Jihova neiu chü, sidi Jihova uko pekatuoü pushükewau nunu puo noukedilie moü me? Derei úkoe kepeka kemeriekecü se u thuo u gei vortuoü bate!”

²⁰ Siro themia kekrei puo Jihova za nunu siedzedie pu, Kiriat-jearimmia Shemaia nuou Uria. Puoe Jeremia kepu mhie di nadi hau mu kijü hau kepetsou siedzedie pu.

²¹ Ru kediu Jehoiakim, puo terhümiavi pete mu kezhako pete, puo dieko sitse, kediu puo dukhriwatuoü pfhü sieta; derei Uria süu sikeshü ki, puoe michieta di ta Ijipt nu tsuta.

²² Sitse kediu Jehoiakim-e mia ketsepie Akbor nuou Elnathan mu puo sa themia kro puo ketsepie Ijipt nu shü.

²³ Sidi ukoe Ijipt nunu Uria telie di puo ze kediu Jehoiakim ki vor, sitse puoe zhiecha pie puo dukhriwa, di puo kesiamo kelhoupie miaümia mekhru nu shüwa.

²⁴ Derei Shafan nuou Ahikam dzie-e Jeremia kitsa ba, süla uko bu puo khapie themiako tsüwa di puo bu siata molie.