Jeremia 25 - Angami Naga CL (Re-edited) Bible (BSI)

Babilonmia Die Chüketuo Pedzü Pukeshü

¹ Juda kediu Josia nuou Jehoiakim kedi chükelie cie dia cie Juda themia pete la die Jeremia ki kevor, (süue Babilon kediu Nebukadnezar dikelie cie therieu),

² süu dze siedzekesiu Jeremia Juda themia pete mu Jerusalem nu kelhoumia pete ki pukeshü.

³ Juda kediu Amon nuou Josia dikelie cie kerese cie, vor teisozha hanhie ketso, süusü cie mepfüese cie Jihova die a ki vor, mu ae nie ki pu lalashü zo, derei nieko a pfhe rünyü mvüte.

⁴ Siro Jihovae te mo zo puo kituo siedzekesiko pete ketseshü zo, sirei niekoe rünyü mvü morei rünyütuoü nie nyie kedeishü mo,

⁵ uko sie, “Nieko kehoupuorei tsie nie zho kesuo nunu mu nie mhatho kesuo nunu, rürei vorliecie, siro Jihovae pie nieko mu nie puonuoko kechachie la tsükeshü kijü nu balietuo.

⁶ Terhuo kekrei lie chü morei rüsuotuoüta hie, siro nie dzie mhathoko pie a nou chü kemeyieta hie. Sitse a nieko gei kepechü yopuorei khashülie lho,” sishü.

⁷ Sirei nieko a pfhe rünyülie mo, Jihovae siya, süla nieko nie dzie mhathoko pie a nou chü kemeyie di nie thuo nie pechütuoüte.

⁸ Süla krodiko Jihovae puya: Nie-e a dieko zelie moketa la,

⁹ Ae pesotsa seyieko pete kieshütuoüzhie, Jihovae siya, Babilon kediu, a kituou, sidi a uko ze vor kijü hau mu sünu kelhouko, mu seyie lutsahatsa houpfü keba pete petsoutuo; sidi uko pekawatuo, mu uko chüpie mia bu u michie, mu u rütse tsiu kechachie mengazhütatuo.

¹⁰ Siro ae uko donunu kenei pfhe, thenou kemvü pfhe, yasau pfhe, mu yasapfü pfhe, kegetsie pfhe mu mibou kezie chüsetatuo.

¹¹ Sidi kijü pete pekaperuowatuo, siro seyie hako cie hiethenie Babilon kediu lie chütuo.

¹² Situo di cie hiethenie tseita tse, uko kephouma la ae siazha pie Babilon kediu mu seyie süu, Chaldiamia kijüu tsütuo, Jihovae siya, sidi kijüu bu kechachie ruo zhütatuo.

¹³ Ae kijü süu petsoukecü die pukeshü pete, leshüda hau nu thupie kezhü kheko, Jeremia seyieko pete kepetsou siedzedieko, se vortuo.

¹⁴ Kekreilamonyü seyieko mu kedi kezhamia rei süko lie chütuo; tsiu uko mhatho kheki sü chü mu uko dzie-e chükeshü tuoi a uko zhakhra chüshütuo.

Ukepenuopfü Noupfhü Hieu

¹⁵ Kekreilamonyü Israel Kepenuopfü Jihovae, a ki pucü: A dzie nunu nouyie zu hieu lieliecie, sidi a n ketsepie u ki keshü seyie pete bu süu krieliecie.

¹⁶ Ukoe süu krielietuo, di pevüvüi votuo tsiu nyatatuo ae zhiecha ketsepie uko donu shüketuou la sitatuo.

¹⁷ Süla ae Jihova dzie nunu tehieu lielie, di Jihova a ketsepie u ki keshü seyie pete bu süu krie:

¹⁸ Sükoe Jerusalem mu Juda rünako, sünu kediko siro kezhako, uko bu thedzükezei mu ruoketa, mia krenyü kechü tsiu rüsekepfü, thie nhie ha tuoikecü chütuo;

¹⁹ Ijipt kediu Faro, puo kituoko, puo kezhako, mu puo themiako pete;

²⁰ themia kereiketuoko; Uz kijü nu kediko pete, Filistin kijü nu kediko pete, Ashkelon, Gaza, Ekron, mu Ashdod lhiekeshüko,

²¹ Edom, Moab, siro Ammonmiako;

²² Tur kediko pete, Sidon kediko pete, mu dzükezha khie kijü rüchütsokemo nu kediko;

²³ Dedan, Tema, Buz, tsiu kijü vala nu ketuo pete;

²⁴ Arabia kedi pete mu kijükesia nu themia kerei di lhou ketuo kedi pete;

²⁵ Zimri kedi pete, Elam kedi pete, siro Media kedi pete,

²⁶ Pesotsa kedi pete, kepetse nu mu kepenuo nu ketuoko, puo sie puopuo idi, tsiu kijüu gei ketuo kedirüvie peteko, siro süko sie kediu Sheshak-e krietuo.

²⁷ Sitse noe uko ki, Krodiko Jihova Israel Kepenuopfüe puya: Krielie, mezelie di merüwalie, tetsutalie mu mhakipuorei la sie hie, kekreilamonyü a zhiecha ketsepie nieko donu keshü la.

²⁸ Siro mhanuü uko n dzie nunu tehieu krietuoü pie mvü ro, noe süko ki hakemhie pushütuo: krodiko Jihovae puya: Nieko krie bei morosuo!

²⁹ Harie, a nadi a za se kiekelieu gei kepeka se vorzhie, mu nie kimhie di siazhau therhielie vi üya ga? Nieko siazha ngu motalie lho, kekreilamonyü a zhiecha kie pie kijüu gei kelhou themia pete gei shütuo, krodiko Jihovae siya.

³⁰ Süla no die hako pete se siedzedie pu uko petsoushütuo, sidi uko ki: Jihovae peso geinu mehotuo, mu puo keba kemesa chü nunu puo pfhe phrashütuo; puoe shie kemerie chü di puo themiako petsoutuo, puoe kijüu gei lhou keba peteko petsou di khubedzü theyakezhamia tuoi shiekhouishütuo.

³¹ Mhapfhe puo kijü vala ketso votuo, kekreilamonyü Jihovae seyieko pejoshüte; puoe chüüphou chükepfü pete nyie pepituoü thate, mu puoe kerüzhümia pie zhiecha tsüwatuo, Jihovae siya.

³² Krodiko Jihovae puya: Harie, kepekau seyie puo nunu seyie kekreiu gei vortuo, tsiu kijü vala nunu khriedi puo vortuo!

³³ Jihova bu dukhrikecü teisozha süu kijüu tietsapuo nu vo kijü kekreitsa tsotuo. Mia süko krükralie lho, morei pfhü kengulie lho, morei khrulie lho, süko kijüu gei thebuo chütatuo.

³⁴ Kuopfheko, thekrü chü mepfükeruoilie, mu kralie; sidi mige nu nie kephrelie, kuopfheko mho niepuko, kekreilamonyü nie dukhriketuo teisozha mu nieko bie kezawaketuo vor bate, mu niekoe mhabou kevi puo tetsuketa tuoi zotuo.

³⁵ Kuopfheko takelie cha jütatuo, mu tekuokro mho niepuko tapralie lho.

³⁶ Kuopfheko kekra pfhe, mu tekuokro niepuko pfhe si partuo. Kekreilamonyü Jihovae uko nha kemeneko bie pesuowate,

³⁷ Mu lhou menekebako bie pesuowate kekreilamonyü Jihova nouyieu kemerie chüketa la.

³⁸ Puoe losha tuoi puo keyau khawate, kekreilamonyü zho suo zhiechau, mu nouyie kemerie chüketa la uko kijüu bie peruowate.