Jeremia 24 - Angami Naga CL (Re-edited) Bible (BSI)

Chiedesi Kevi mu Kesuo

¹ Jihovae chiedesi rha kenie Jihova rüsuoki mhodzünu keba pie a kie. Hauha Babilon kediu Nebukadnezar-e Juda kedi Jehoiakim nuou Jekonia, Juda nu kezhako, sei mistiriko mu rükreimiako sa di Jerusalem nunu ze Babilon nu vorkelie sie we.

² Merha puo nu chiedesi vi sekecü ba, sükoe melie kerieu ki tuoi, derei merha kekreiu nu chiedesi we suo se, sükoe suopie cülie kenjü.

³ Sitse Jihovae sie a ki, “Jeremia, no kedipuo ngu ga?” Sitse a sie, “Chiedesi, kevikoe vithor, mu kesuoko suothor, süko suothorcü la cülie kenjü.”

⁴ Sitse Jihova die a ki vor.

⁵ Jihova, Israelko Kepenuopfüe puya: Judako miadie chü voketako, ae thechü hau nunu uko ketsepie Chaldiamia kijü nu shükewako, ae süko pie chiede kevi hako mhie üdi letuo.

⁶ Ae uko dzevi la a mhipie uko mehotuo, sidi a uko ze la kijü hau nu vorshütuo tsiu ae uko phou sesie shütuo, mu uko biekhrü pie tsu zhüwalie lho; ae uko pelhoushütuo, mu uko phewalie lho.

⁷ Ae Jihova zo ücü silieketuo nou pie uko tsütuo; sitse ukoe a themia chülietuo mu ae uko Kepenuopfü chütuo, kekreilamonyü ukoe thenou pete se a ki vorlieketuo la.

⁸ Derei Jihovae puya: Chiedesi kesuoko suothorkecü la cülie kenjü kecüko tuoi, ae Juda kediu Zedekia, puo kezhako, Jerusalem nu lhiepie kijü hau nu kebako tsiu Ijipt kijü nu kelhouko gei chüshütuo.

⁹ Sidi ae uko chüpie kemeriekecümia, mu kijü nu kedi pete la mha kesuo puo, thenga chü, miadzemiase chü, u pese, mu a uko whuokeshü thechü kheko nu mia bu u rüsekecü chütuo.

¹⁰ Siro ae zhiecha, pekriekecü, mu thepetheruo ketsepie uko donu shütuo, a pie uko mu uko puonuoko ketsü kijüu nunu peka lotsowa kemochie si batuo.