Jeremia 23 - Angami Naga CL (Re-edited) Bible (BSI)

Miadie Chü Voketa sie Kelashüketuo

¹ Kuopfhe kehoupuorei a lie nu a kuoko peka mu phruo kecürewayakezhako we ce, chülietie! Jihovae siya.

² Süla a themia pfhekezha kuopfheko dze krodiko Jihova, Israel Kepenuopfüe puya: Nie thuo a kuoko phruo kecürewate, mu uko whuo petawate, siro niekoe süko meholie mo. Süla a nie mhatho kesuoko la nieko mehoshütuo, Jihovae siya.

³ Süsie a whuoshükecü rünako nunu a a kuo lhiekelieko pfhü kengulietuo, sidi a süko ze la vor uko kro nu shülietuo, sitse ukoe u si vülie tsiu kruolietuo.

⁴ Siro a uko pfhelieketuomia pie uko mho shütuo, mu uko michie salie lho, morei u ziejü salie lho, morei puorei pejüwalie lho, Jihovae siya.

David Co Kemiatho-u

⁵ Teisozhako vor touzhie, Jihovae siya, sükisü ae kemiatho co puo pie David tsütuo, tsiu puoe kedimia puo chü dituo sidi mha puotouu chütuo, siro kijü gei kethoca mu kemezhüu chüshütuo.

⁶ Puo teiki Juda kelalietuo mu Israel khrukhre di lhoutuo. Siro puo za kieketuou sü hau: “Jihova u kemiatho-u zo.”

⁷ Süla, teisozhako vor touzhie, Jihovae siya, süki, “Jihova rhei ketuo tuoi Ijipt nunu Israel nuonuoko ze parkeshüu,” ikecü pu salie lho,

⁸ derei sie “Jihova rhei ketuo tuoi Israel kiu pesotsa nu tsie ae whuoshükewa kijü pete nu cha tha ze ketuou,” isikecü putuo. Süsie uko u thuo u kijü nu lhou tuotatuo.

Ketijü Siedzekesiko Pejokeshü

⁹ Siedzekesiko dze pukeshü: A meloue a nou nu prote, a ruko pete mele bate; ae kemezemia tuoi, zu bu puo penyü seketuomia puo tuoite, Jihova mu puo kemesa dieko lanu.

¹⁰ Kekreilamonyü kijüue pieü thuo tshute; rüse la nu kijüu thekrü chüya, tsiu rayha nu kirituoko sote. Uko medzikezha chau suo, tsiu uko kekuou puotou mo.

¹¹ Siedzekesiko mu zievoko rei Ukepenuopfü kitsamia mote; a kinu zorei a uko rügerüzhüko ngute, Jihovae siya.

¹² Süla uko chae kezei nu cha kerünyüko tuoitatuo, sidi sünunu uko whuoshütuo mu tetsutatuo; kekreilamonyü uko pechükecü teicieu nu ae mha kesuo se uko gei vortuo, Jihovae siya.

¹³ Ae Samaria nu siedzekesimia donu kerütsekecü puo ngu: uko Baal geinu siedzedie pu, sidi a themia Israelko bu cha vajopfü tuote.

¹⁴ Derei Jerusalem siedzekesiko donu mha kemeriekuokecü puo ngu: ukoe pieü chü sidi kecürü nu tuo; ukoe mha kesuo kechümia chü kemeteishü, süla miapuorei puo rügerüzhü nunu rüreilie mo; uko pete rei a mhodzüki Sodom kemhie, mu sünu kelhoumia Gomora tuoite.

¹⁵ Süla siedzekesiko dze krodiko Jihovae pukecü: “Ae tsiena pie uko va chütuo, sidi uko bu therei dzü krietuo; Jerusalem siedzekesiko kinu miatho kemo kijü pete nu votakecü la.”

¹⁶ Krodiko Jihovae puya: Siedzekesiko nieko ki siedzedie pukecü rünyü hiecie; ukoe nie chü penya keba zo. Ukoe u thuo u nou nu kenguu puya, Jihova tie nunu kevor puya mo.

¹⁷ Ukoe Jihova die rütsekecüko ki pu di, “Süu nie la vituo,” iya; tsiu pietsümvü di uko nou kere nu tuoyakezhamia pete ki pu di, “Mha kesuo puo rei nieko gei vorlie lho,” siya.

¹⁸ Süko donu supuonie Jihova kepetha nu thalie tsiu puo die silie mu rünyülie vi ga? Supuonie puo die rünyülie di süu pu pesishü ta?

¹⁹ Harie, Jihova teikhrieu mehoshücie! noupfhünouyieu rükhrie prate, teikhrie kere puo; süue te kemerie chü di kerüzhüko tsü gei tsutuo.

²⁰ Jihova medo chü tseilie kemochie tsiu puo nou kele chülieta kemochie puo noupfhüu lata lho. Teisozha thelatsako nu nie süu si kemecielietuo.

²¹ Ae siedzekesiko ketseshü mo, sirei ukoe ta vote; a uko ki die pushü mo, sirei ukoe siedzedie pu.

²² Derei ukoe a kepetha nu thalie, sidi a dieko pie a themiako ki pushülie ro, sitse ukoe uko zho kesuo nunu rüreilie, mu uko mhatho kesuoko nunu rüdilie zotuo.

²³ Ae kepenuo nu keba Kepenuopfü di kepetse nu keba Kepenuopfü rei mo üme? Jihovae siya.

²⁴ Themia puo a bu puo ngulie lho üdi kerüshükerüviera nu puo keviese balie vi me? Jihovae siya. Ae tei mu kijü ketshu chüpfü ba mo üme? Jihovae siya.

²⁵ Ae siedzekesiko a za pu di, “A mho pema, a mho pema!” isikecü siliete.

²⁶ Siedzekesiko kichiepuo rürei vor mo di u nou se ketijü siedzekesi pu, tsiu u thuo u nou se u sese ketuo siedzekesi kro puo chü tuotuo ga?

²⁷ Ukoe uko mho pemakecü pie huoniehuo ki pu di a themiako bu a za rükra motaketuo rhüya, uko puonuokoe Baal se di a za rükra moketa tuoi.

²⁸ Siedzekesiu puo mho pemakecüu bu puo mho-u pushücie, derei a die sekebau bu dietho di a dieu pushülie. Rügu mu telha unie kedipuo kemhie ga? Jihovae siya.

²⁹ A die-e mi kemhie zo mo üme? Jihovae siya, siro ketsie vütshie phawayakezha metevü mhie mo üme?

³⁰ Süla ae siedzekesiko huoniehuo kinu a die rügukezhako perhieya, Jihovae siya.

³¹ Harie, ae siedzekesimiako, u meü üse, “Jihovae puya” isikecüko petsouya, Jihovae siya.

³² Harie, ae kemeda mho siedzekesi puyakezhako, tsiu kecülhie mu kemeda nunu a themia bu cha vajopfü ketuoko petsouya, Jihovae siya, ae süko ketseshü mo morei uko pethoshü mo; süla ukoe themia hako gei mha kevi puo rei chüshü lho, Jihovae siya.

³³ Siro themia hako, morei siedzekesi, morei, zievo-u n ketso di, “Jihova pieu kikecüpuo ga?” ikesie ki, noe uko ki, “Niekoe thepieu, mu ae nie kelhouwatuo, Jihovae siya,” sishülie.

³⁴ Siro siedzekesiu, zievo-u, morei themiako “Jihova pieu,” isi di kepumia la liro a uko mu uko kinuko siazha pie tsütuo.

³⁵ Nieko pete rei hamhiekecü pie huoniehuo ki, nie thuo nie donu, “Jihova kedipuo pu kelashü ga?” morei “Jihova kedipuo pushü ga?” isituo.

³⁶ Derei “Jihova pieu” nie pu salie lho, kekreilamonyü thepieue themia pete dieu chütatuo, niekoe rhei tuoyakezha Ukepenuopfü, krodiko Jihova, úko Kepenuopfü dieko chü kediwaketa la.

³⁷ Noe hamhiekecü pie siedzekesiu ki pushülie, “Jihova kedipuo pu n die kelashü ga?” morei “Jihova kedipuo pushü ga?” si.

³⁸ Jihovae puya: Sirei mhanuü nie-e sie, “Jihova pieu,” ishü, kekreilamonyü niekoe, “Jihova pieu,” sikecü dieko pucü la, ae ketsepie nie ki keshü ki, “Jihova pieu, ikecü nieko pu hiecie,” sishü.

³⁹ Süla, ae nieko chüwatuo mu a mhodzü nunu nie kelhouwa tou zotuo, no mu nie puonuoko ketsü nadiu nunu.

⁴⁰ Sidi ae kechachie kemezhiekecü tsiu thenga se nieko gei vortuo, süu mhakipuorei rükra motalie lho.