Jeremia 22 - Angami Naga CL (Re-edited) Bible (BSI)

Thenoukedilienu Tarhokeshü

¹ Jihovae puya: Juda kediu ki tsu di die hau pushülie.

² Sidi sie: Jihova die rünyüliecie, he-i Juda kediu, David kediba gei bayakezhau no, mu n kituoko, siro n themia kharu hakoha ze di leyakezhako.

³ Jihovae puya: Kethoca mu kemiatho chüshülie, sidi mia peseyakezhamia dzie nu mia bu u pekawaketamia kelashücie. Siro kekrükecü mu mha kesuo puorei chüpie rüsomia, u puonuo kejümia gei, morei samipfümia gei shü hie, morei thechü hanu u kejo kejümia zie pekru hie.

⁴ Kekreilamonyü mhanuü nie die hau dieze chü kethokelie sie, ki hau careko nu David kediba gei keba kedimia letuo, kierbagei gei mu kier gei tuotuo, uko mu uko kituomia, mu uko themiako.

⁵ Derei no die hako rünyülie lhoü liro, a thuo rüsekeshü, Jihovae puya, ki hau kiruo chütatuo.

⁶ Kekreilamonyü Juda kediu kiu dze Jihovae pucü: Noe a la Gilid kemhie, tsiu Lebanon tsüu kemhie zo; derei a n chüpie kijükesia, tsiu nadi nu themia lhou moketa chüwatuo.

⁷ Ae mha pekayakezhamia kese pie n perhietuo, uko pete u rünyieko se di; ukoe nie sedarbo keviko wiwatuo tsiu süko kelhoupie mi nu shüwatuo.

⁸ Siro seyie kekra nadi hau khie rho votuo, sidi uko sie huoniehuo ki, “Kiüdi Jihovae hamhiekecü chüpie nadi hau gei shüwate shi?”

⁹ Sitse uko sie, “Kekreilamonyü ukoe Kepenuopfü Jihova ze dietseidiekhokelieu khawa di terhuo kekrei rüsuo mu süko lie chü tuoketa lanu lie,” ituo.

¹⁰ Siaketamia la kra ba hie, morei puo krükra hie; derei kepetse nu voketamia la kraliecie, puoe la vo puo kepenuo rüna ngulie lhotakecü la.

Josia Nuonuoko ki Dielie Khakeshü

¹¹ Kekreilamonyü Jihovae Juda kediu Josia nuou Shalum, puo puo sou nu kedi kechüu, thechü hanunu tuo praketau dze Jihovae pucü: Puoe hanu la vorlie lho,

¹² derei puoe kedie chü voketara nu siatatuo, sidi kijü hau ngu lalie lho.

¹³ Dietho kemo geinu puo ki chükelieu, kekrü di puo kibouko chükelieu; puo zanuou mhatho pie kemethuo chükewau, tsiu uko zhapie uko tsü kemo-u we ce, chülietie;

¹⁴ puoe sie, “A a thuo a la ki kemeya puo peso geinu kibou kezhazhacüko chülietuo,” ibaya, tsiu sünu khirkiko chülie, mu sedar la pie sozha dalie, siro kemeriedzü pie thelietuo, ibayakezhau.

¹⁵ No sedar kedalie üdi kedi chülietieya me? N puo thuo rei cüükrie sidi kethoca mu kemezhüu chü mo üme? Mu süu puo la vi.

¹⁶ Puoe kejümia siro ketsopfhümiako nyiekecü; mu süu vi zo. Hau nunu a silieketuo la mo üme? Jihovae siya.

¹⁷ Derei n mhi mu n noue dietho mo di ngukelie rübei le, siro kejo kejümia zie pekrutuoü, mu mia kepese tsiu mha pekatuoükecütsa la zo.

¹⁸ Süla Juda kediu Josia nuou Jehoiakim dze Jihovae puya: Uko puo krü di, “He-i, a dzürieu!” morei “He-i a üpfü!” isilie lho. Uko puo krükra di, “He-i, a niepuu!” morei “he-i, puo zayieu!” isilie lho.

¹⁹ Gada kekhru tuoi di puo khruwatuo, puo teshü se pra kelhoupie Jerusalem kharuko sie shüwatuo.

²⁰ Tuo Lebanon nu kho di shieshülie, tsiu Bashan nu shiekhouishülie; Abarim nunu shieshülie, kekreilamonyü n kekhriemia pete pekawate.

²¹ No mhanyi keba ki a n rüchü, derei no sie, “A rünyülie lho,” ite. No n khriesa teiki nu, hai zo a pfhe ze mo.

²² Teikhrie-e n kepfheko pete pfhelietuo, mu n neimia pete miadie chü votatuo; sitse noe n rügerüzhüko pete la menga mu n ziekejü chü batatuo.

²³ He-i Lebanon nu kelhouko, sedarboko geinu u kru chüse kebako, thenumia nuonuovachü tuoi kechü n gei kephir nhie, no meheimelo pie kedipfü chütie shi!

Konia gei Ketsokecüu

²⁴ A rhei ketuo tuoi, Jihovae siya, Juda kediu Jehoiakim nuou kediu Konia thuo a dzie a zatsa dziekha kemhie ba zo shierei, a sünunu rei n cierha pietatuo.

²⁵ Sidi n khapie n kerheiro pfhü ketuoko dzie nu, mu noe preiketuoko dzie nu, Babilon kediu Nebukadnezar dzie nu Chaldiamia dzie nu shüwatuo.

²⁶ Sidi ae no mu n penuokeshü n zuo chü kelhoupie rüna kekreira, n penuo kemora shüwatuo, sidi nie sünunu siatatuo.

²⁷ Derei uko la vo nyükecü kijüu nu vorlie lho.

²⁸ Konia hau thikewa liproketau, miapuorei lie nyü moketau me? Kiüdi puo mu puosepuoyie chü kelhoupie ue si kemo kijü nu shüwata ga?

²⁹ He-i kijüu, kijüu, Jihova die rünyüliecie!

³⁰ Jihovae puya: Themia hau puo nuo jü, puo kelhou teiki vilie kemo puo ükecü thupie zhüwaliecie; kekreilamonyü puosepuoyiemia miapuorei vilie lho, David kediba gei ba di Juda nu mia kekhalie lho.