Jeremia 21 - Angami Naga CL (Re-edited) Bible (BSI)

Jerusalem Te Nebukadnezar Dzie nu Leketuo

¹ Jihova kinu die Jeremia ki kevor, süsü Zedekia kediue Melkia nuou Pashur mu Zefania zievo-u Maseia nuou ketsekeshü ki pukecü,

² “N pezie rei hie la Jihova ki ketsocie, kekreilamonyü Babilon kediu Nebukadnezar-e hie ze terhü chütuoü bate, mu Jihovae tsiemelie chüshüyakezha tuoi ungokecü chüshü di puo bu hie kinu tuotakecü chülie rei si momu.”

³ Sitse Jeremia sie uko ki:

⁴ Nieko hamhiekecü se Zedekia ki pushücie: Jihova; Israel Kepenuopfüe puya: Ae nie dzie nu keba terhünyieko nie-e se di kegeikezha Babilon kediu mu Chaldiamia dahou sie nu nie houpfü kebako kinu kerei pesiewa di a süko ze vor nadi hau metsuo nu kengushütuo.

⁵ Siro a a thuo a bou yha se mu a bou kekuo se di a nouyie nunu, a noupfhüu nu, tsiu a nei mo se di nieko ze kegeituo.

⁶ Sidi a nadi hau nu kelhouko, themia rei, khunuo rei dukhriwatuo; ukoe thepetheruo kemeriekecü nunu siatuo.

⁷ Siro süsietsa, Jihovae puya, ae Juda kediu Zedekia mu puo kituoko, tsiu nadi hau nu themiako, thepetheruo nunu zhiecha nunu, mu pekriekecü nunu lhie se kebako pie Babilon kediu Nebukadnezar dzie nu, mu uko ngumvüko dzie nu, uko kerheiro pfhü ketuoko dzie nu shüwatuo. Puoe zhiecha üse uko dukhrituo; puoe uko ngumezhielie lho, morei peshashülie lho, morei khrieshülie lho.

⁸ Siro no themia hako ki: Jihovae puya: Harie, ae kerhei cha mu kesia cha pie nieko mhodzü shü ho.

⁹ Themia nadi hau nu kebamia zhiecha, mu pekriekecü nu mu thepetheruo nunu siatatuo; derei themia pra di Chaldiamia nie kewhuomia dzie nu leketamia rheilietuo mu uko rheikelie-e terhü nu zhakhra puo tuoitatuo.

¹⁰ Kekreilamonyü ae mha kevi la mo di mha kesuou la a zie pie nadi hau petsou bate, süu pie Babilon kediu dzie nu shüwatuo, sidi puoe mi pie süu thewatuo.

David Kiu la Dielie

¹¹ Juda kediu kinuko ki pukecü: Jihova die rünyüliecie,

¹² He-i David kinuko! Jihovae puya: Khise gei kethocau chüshücie, mu mia peseyakezhau dzie nunu, mia bu u kechükede setuoketako kehoupuorei kelashücie, mo üro a nouyie miü tuoi partuo, sidi bie pemhelie motatuo, n kesuoko la.

¹³ Harie, a n petsouya, he-i razha nu kelhouko, He-i kijü kemezhü nu tsiekrieu, Jihovae puya, nie-e sie, “supuonie tsur hie perhie, morei supuonie hie keya chüko nu lelie ta?” ibayakezhako.

¹⁴ Ae nie mhatho kheki sü chü di siazha pie nie tsütuo, Jihovae siya; siro ae ketsa sünu mi petushütuo, sidi süu khieümhou keba pete thewatuo.