Jeremia 20 - Angami Naga CL (Re-edited) Bible (BSI)

Pashur-e Jeremia Pechükecü

¹ Süki Pashur, Imer zievo-u nuo, Jihova ki kepfhe kezhaue, Jeremia siedzedie pukeshüko sishü.

² Sitse Pashur-e Jeremia siedzekesiu vüta, sidi puo pie Benjamin Kharu kerükrieu nu Jihova kiu cabo nu shüwa.

³ Süsieduü Pashur-e cabo nunu Jeremia ze kepar ki, Jeremia sie puo ki, Jihovae n za pie Pashur üdi kie lhote derei, “Mha pete nu kemeriekecü,” ütatuo.

⁴ Kekreilamonyü Jihovae puya: A n chüpie n thuo n la mu n zemia la kemerie puo chüwatuo; tsiu uko ngumvümia zhiecha geinu tetsutuo mu n mhi-e süu ngutuo. Siro ae Juda pete khapie Babilon kediu dzie nu shüwatuo, sidi puoe uko ze kedie chü Babilon nu votatuo, mu zhiecha pie uko dukhriwatuo.

⁵ Siro a nadi hau kinyi pete, süu vienya pete, mhanya puoma kere pete, mu Juda kediko kinyi pete pie puo ngumvümia dzie nu shüwatuo, uko pekawaketuoko, uko chüse Babilon nu votaketuoko.

⁶ Siro no, Pashur, mu n kinu keba pete, miadie chü votatuo, mu no Babilon nu votatuo; sidi sünunu no siatatuo, mu sünunu n khruwatuo, no mu n zemia pete, no uko ki ketijü siedzedie pukeshü kheko.

Jeremia Puo Kepechüko Petsoukecü

⁷ He-i Jihova, noe a seshü, sidi a sewate; noe a ki kuokuo, süla no thaliete. A teisonhie mia krenyü chü bate; mia pete rei a krete.

⁸ Kekreilamonyü a die pukeshü ki, a shieshü morosuo, a shie peto di, “Mha kebvükecü mu kepeka!” ishü morosuo. Kekreilamonyü zhate Jihova dieu a kerhie tsiu a krenyü bate.

⁹ Ae sie, “A puo dze pu salie lhote morei puo za nu mha pu sa lhote,” ishü ro, mhapuo a nou a ru nunu mi pie thekeba mhietaya; a süu khapie bakecü a nyiete, khalie kenjüte.

¹⁰ Kekreilamonyü mia kenoupu di: “Mha pete nu kemichie bate! Puo meliewa khe! Úko puo meliewa khe!” ikecü a siya. A khriethomia pete a phi mesükecü meho baya. “Puo selie rei silie lhomu, silie ro we puo penyülie vi, mu puo gei u khepu lietuo,” ibaya.

¹¹ Derei Jihova kemerie chü di a ze ba; süla a peseyakezhako phi mesülietuo, mu uko thalie lho. Uko mengadapfü chü lho, kekreilamonyü ukoe kuolie lho. Uko thenga chüketa mhakipuorei kechachie rükra motalie lho.

¹² He-i krodiko Jihova, noe kemiathomia dojüya, noe themia melou mu puo kele nguya; a bu uko gei n khepu nguyi, kekreilamonyü no a kitsa thate.

¹³ Kelipie Jihova ki shücie; Jihova tsheliecie! Kekreilamonyü puoe kesuo kechümia dzie nunu kejümia kerheiro kelashüte.

¹⁴ A kepenuo teisozhau bu rüsepfücie! A zuo a penuokeshü nhie bu, thejapfü hie!

¹⁵ A puou ki dielie se, “Thepfunuomia puo penuopie n tsü ho,” sidi puo nou chü pemvükeshü themiau bu rüsepfücie.

¹⁶ Themia süu bu Jihovae ngumezhie mo di kelhoukewa nadiko tuoitalie; puo bu khise kekra pfhe si mu khinhie shiekeshü pfhe sitalie.

¹⁷ Kekreilamonyü puoe a zuo va nunu a dukhriwata mo; mo üro a zuo bu a mekhru chü mo, mu puo nuobvü bu zha sei tuotatuomu ru.

¹⁸ Kiüdi a mhachümhalie tsiu thenou kesuo ngutuoü, a teisozha thenga nunu pevotuoü a zuo va nunu parta mu?