Jeremia 2 - Angami Naga CL (Re-edited) Bible (BSI)

Ukepenuopfü Israel Ngumezhiekecü

¹ Jihova die a ki vor di pukecü:

² Vo di Jerusalem nyieto nu pushülie, Jihovae puya: No n rüüki pecükecüu, yasapfü chü di n kekhrie pie a ketsü, noe kimhie di rayha nu tsia va moluokecü kijü nu, a siemedzilie shicü rükra ba.

³ Israel-e Jihova kitsa mesa, mu puo lieyie donu chieshüko chü. Süu cükewa pete rei joüta; kepekau sümia gei vor, Jihovae siya.

⁴ He-i Jakob kinuko, mu Israel kinuko pete, Jihova die rünyüliecie.

⁵ Jihovae puya: Nie puonuoko a gei puotou kemo kikecüpuo ngulie di uko a kinu pecieta, sidi mhathokemo medzi, mu u thuo kemethuo chüta ga?

⁶ Ukoe, “Jihova Ijipt kijü nunu u ze parkeshüu, rayha nu, kijükesia mu thekheko nu, kijü keso nu, tsiu kesia khrü nu, miapuorei vo kemo kijü, tsiu miapuorei lhouya kemora u cha tha ze ketuou kirapuo tuota ga?” sikecü rei puya mo,

⁷ A nieko ze mhakenyi kijü puo nu, nie bu süu si cütuoü mu süu keviu cütuo üdi nieko ze vorshü. Derei nie sünu lelie tse, niekoe a kijü bie perhuwa, mu a kayieu pie kerütse chüwa.

⁸ Zievokoe, “Jihova kirapuo ba ga?” sikecü pu mote. Siro thezho kesekoe a si mo; kezhako a gei kejokemou chü; siedzekesiko Baal geinu siedzedie pu, sidi puo kemevi kejütsa whuo vota.

⁹ Süla a tsie rei nie pejo zotuo, Jihovae siya, tsiu a nieko nuonuo nuonuoko pejo zotuo.

¹⁰ Saipras kijü khietsa pfü di mehoshücie, mia ketsepie Kedar nu shü di meho menuoshücie; sidi mha hamhiekecü tuoya mo mo shi mehoshü phi.

¹¹ Seyie puoe puo rhuoko, terhuomia mo shierei bie kediwaya me? Derei a themiako we uko zayieu pie puo kemevi kejü vie puo ze keliliete.

¹² Nie ngolie, he-i, teiko, hau la, sidi nie kedethelie, mu thezie kejü chü batalie, Jihovae siya.

¹³ A themiako mha kesuo kenie chüwaketa la; uko a khawate, kerhei dzüluou, sidi uko thuo dzükhou thielie, rükoketa dzükhou kro puo, dzü thoulie kelho dzükhou kro puo.

¹⁴ Israel-e miadiemia üme? Puoe ki nu penuokelie miadiemia me? Kiüdi puoe mia bu puo pekakewamia chüta ga?

¹⁵ Loshakoe meho puo petsoute, ukoe ruorüite. Ukoe puo kijü chü kemethuowate; puo nadiko ruote, themia lhou sa mote.

¹⁶ Süsie rei Memfimia mu Tahpanhemia bu n tsü gei keditsüre bie pesuowate.

¹⁷ No n Kepenuopfü Jihova, puo n cha tha ze ketuou khakewa lanu, n thuo mha hako se n gei vorta mo üme?

¹⁸ Siüro Ijipt nu kele kedipuo mevilie ga? Nail dzü krieketuo la me? Morei Asiria nu tsu kedipuo mevilie ga? Eufrat dzü krieketuo la üme?

¹⁹ N rüzhüko thuo n pechütuo, mu no tsiesieketa thuo n pejotuo. N Kepenuopfü Jihova khakewa; mha kesuo mu kepfhü ücü siliecie, a khrüpreiu n gei tuo mote, krodiko Kepenuopfü, Niepuue siya.

²⁰ Kekreilamonyü thiedzünu noe n vocieu bietshewa, mu n phako biethewa ru, noe sie, “A n lie chülie lho!” site. Noe kijüthou kerükrie kheko gei mu seibo kepejo kheko khro nu pelapfü di thethe lie.

²¹ Sirei a n leipie khubebo kevi puo chüshü, puo tsia vi tseikecü. Siliro kiüdi nha khubebo kesuo puo chü lata mu?

²² N thuo daru se n khrüwa, tsiu sabou kekra se zorei, no kesuokechükoe a mhodzüki ba seite, Niepuu Jihovae siya.

²³ Noe kikemhie di, “Ae rhuta mo, a Baalko medzita mo” ikecü pulie vi ga? Razha nu n zhorüli mehoshü phi; no kedipuo chüwa shikecü siliecie, noe bajülie kemo ut nuonuo puo cha nu rüge phi mu phi ketuo mhiei;

²⁴ Gadapfü rayha pie puo tuo chüketa tuoi, thushü puo va di nyhüpfhü tseitsei! Supuo puo mengu nunu puo kekhalie ta? Miapuorei puo pfhü kemezhie morei vi; puo teiu nu ukoe puo ngulie zotuo.

²⁵ N phi bu phikou pfü mo, mu n mezha bu terhü moketuo la n kireilie, ishü. Derei noe, “Mhapuorei chülie suote, a sikemomia a neite, mu a süko siemedzi vota zotuo,” ite.

²⁶ Kerügumia mia puo tekelie ki mengatayakezha tuoi, sütuoi Israel rei mengalietuo, uko, uko kediko, uko kezhako, uko zievoko, mu uko siedzekesiko pete rei,

²⁷ ukoe seibo ki, “No a puo,” iya, mu ketsie ki, “No a penuoshü,” isiya. Kekreilamonyü ukoe rünoupie a tsü, mu uko zie pie a tsü mo. Derei uko kemezhiekelie ki ukoe, “Vor di hie kelashücie,” iya.

²⁸ Derei n thuo chükelie rhuoko kirapuo tuota ga? No kemezhiekelie ki n kelalie vi üro, süko bu vorliecie; kekreilamonyü n rünako kedithedepuo ba shiü, n rhuoko rei sü thede ba, he-i Juda.

²⁹ No kiüdi a gei kenyaya mu? Nieko pete a petsoute, Jihovae siya.

³⁰ A n nuonuoko vü thedo chü; uko pethapfülie mvüte. N zhiecha thuo siedzekesiko cülie, losha mha tekecü tuoi.

³¹ Siro nieko, he-i themia phou, Jihova die rünyüliecie! Ae Israel mhodzüki rayha puo mhiei, zeibouikecü kijü puo kemhieta zo memu? Kiüdi a themiakoe, “Hie hie medo chülie vite, hie n ki vor salie lhote” iya ga?

³² Thenunuomia puoe pienyieko rükra mo, morei yasapfüe puo pfhenei rükra motalie vi me? Sirei a themiakoe teisozha phrü hulie kelho a rükra tuo mote.

³³ Kidepuo n cha kese pevipie n khrieu pfhüya shi? Sümhie di no n zho pie thenu kerüzhüpfü pethawate.

³⁴ Siro n nei gei mhakejü kejo kejüu zie ngute; no uko kekrükecü chü ba di ngulie mo rei. Mha hako pete donu rei,

³⁵ noe sie, “A kejo jü; a geinu puo nouyieu rüditatuo,” isi baya. Noe, “A phouma mo” isi keba la, a n ze dienya chütuo.

³⁶ No kiüdi n rienuochü n zho n rüli kedikeli ba zo mu! No Asiria dzie nunu mengakelie tuoi, Ijipt dzie nunu rei mengalietuo.

³⁷ Sünunu rei no n dzie pie n tsü gei shülie di tuotatuo; kekreilamonyü noe peleyakezhamiako Jihovae meliewate, mu no uko geinu vilie lho.