Jeremia 19 - Angami Naga CL (Re-edited) Bible (BSI)

Rünyo Lipfhü Proketau

¹ Jihovae puya: Vo di lithomia rünyo pie kechü lipfhü puo khrüliecie sidi uko donu phichümia mu thetsei zievoko huo sa zelie,

² sidi Hinom nuou razha nu Litho Kharuu kele ki kebau nu volie, sidi a n ki pushüketuo dieko pesishülie.

³ Noe hai di putuo: Jihova die rünyüliecie, he-i Juda kediko mu Jerusalem nu kelhouko. Krodiko Jihova, Israel Kepenuopfüe puya: A kepeka se thechü hanu vortuo, süusü themia kehoupuorei sishü ro u nyieto mesotatuo.

⁴ Kekreilamonyü themiako a khawate, mu thechü hanunu kethengu thepie terhuo kekrei tsü di thechü hau bie perhuwate süusü uko rei morei uko puonuoko rei morei Juda kediko rei si vor mo, sidi kejo kejü zie pie thechü hau ketshu chüwate;

⁵ Tsiu ukoe Baal kijü kerükrieko nu vo di u nuonuo the di kethe ruosuo chüpie Baal tsü, süu a chünu morei thezho khashü mo, morei süu a nou rei vor mo zo;

⁶ süla teisozhako vorzhü ketho, Jihovae siya, thechü hau üse Tofet, morei Hinom nuou razha üdi kie salie lho, derei Kedukhri razha ütuo.

⁷ Mu thechü hanunu a Juda mu Jerusalem unie mharhüko pie kemethuo chüwatuo, tsiu ae uko bu u ngumvümia mhodzü zhiecha geinu, mu uko kerheiro pfhü ketuomia dzie nunu tetsutatuo. Sidi ae uko kesiamoko pie perako mu nha nu khunuoko ca chüwatuo.

⁸ Siro ae nadi hau chü kemidewatuo, tsiu mia bu rütseketa puo chüwatuo; themia kehoupuorei süu pfüthe kevomia u ngo mu rütsetuo kekreilamonyü süu pekaperuowaketa la.

⁹ Siro ae uko bu u nuonuo thepfumia chü mu thenumia chü cütuo, tsiu uko terhü kechü mu kemezhiekecü nunu u thuo u zanuomia chü cütuo, sidi u ngumvüko mu u kerheiro pfhü ketuoko u pechütuo.

¹⁰ Sitse noe n ze kevoko mhodzünu lipfhüu biephroshütuo,

¹¹ sidi uko ki hakemhie pushülie: Krodiko Jihovae puya: Ae rünyo lipfhüu biephrokewa tuoi di themia hako mu nadi hau biephrowatuo, mu süu chü kema lalie kenjü. Tofet nu u kekhru chü ba sa mota kemochie khru ba zotuo.

¹² Hamhiekecü ae chüpie thechü hanu, siro hanu kelhoumiako gei shütuo, sidi nadi hau pie Tofet kemhiewatuo.

¹³ Siro Jerusalem kiko mu Juda kediko kiko Tofet thechüu tuoi perhuwatuo, u kiko kitieko nunu ruosuo chüpie teigei krodiko pete tsü, tsiu ruosuo rupie terhuo kekrei tsüketa la.

¹⁴ Jeremiae Tofet nunu vorlie tse, Jihova puo bu siedzedie punu di ketsekeshü ki puoe Jihova kiu kitiezha nu thalie di sie themia pete ki:

¹⁵ Krodiko Jihova, Israel Kepenuopfüe puya: Ae nadi hanu mu puo nado pete nu kepeka dze pukeshü pete se vortuo, kekreilamonyü uko vo meteithor di a die rünyü mvüketa la.