Jeremia 18 - Angami Naga CL (Re-edited) Bible (BSI)

Litho-u mu Linyo-u

¹ Jihova kinu die Jeremia ki kevor:

² “Vorlie, di litho-u ki kecie, sitse sünunu a n bu a die silietuo,” si.

³ Süla a litho-u kinu ke, ru harie, puoe puo thuou se mhachü ba.

⁴ Siru linyo pie kechü mhabouu puo dzie nunu suota, süsie puoe süu pie mhabou kekrei puo chü lalie, mu süu puo mhodzüki ngu zivita.

⁵ Süsie Jihova die a ki vor:

⁶ He-i Israel kinuko, litho hau kemhie a nieko gei chüshülie lhoü ba me? Jihovae puya. Linyoe litho-u dzie nu keba tuoi, nieko ha rei a dzie nu ba zo, he-i Israel kinuko.

⁷ A va puo nunu seyie puo morei kedirüvie puo dze, phewaketuo mu bietshebietshawa di pekawaketuo pushülie vi,

⁸ derei mhanuü seyie, a puo dze pukeshü, süu kesuo kechü nunu rüdilie liro, a uko gei mha kesuo chüshütuo üdi le kebau nunu a nou rüditatuo.

⁹ Sidi puotei kekrei puo nu seyie puo morei kedirüvie puo dze pu di a süu chüshü mu pelhou lashülie vi,

¹⁰ derei mhanuü süu a mhinguki mha kesuo chü, a pfhe rünyü mvüta ro, a mha kevi chüshütuoü kebau nunu rüditatuo.

¹¹ Süla tsie, Juda themiako mu Jerusalem nu kelhouko ki pushüliecie: Jihovae puya: Harie, ae mha kesuo puo rhipie nieko ngumvütuoü bate, tsiu mhapuo rhüpie nieko petsoutuoü bate, tsie nie pete mhatho kesuo nunu rüreilie, sidi nie zhoko mu nie mhathoko bu viliecie.

Israel Terhuorhi Kerüsuo nu Rüdi Mvüketa

¹² Derei ukoe sie, “Süu kemethuo zo! Hie hie thuo rhükelie medzituo, tsiu mia puopuokecü hie nou kekhrü kesuo keleu medzi zotuo,” sita.

¹³ Süla Jihovae puya: Seyieko ketsoshü phi: Huomia mha haikecü si me? Israel phousepfü mha kemerie se puo chüwate.

¹⁴ Lebanon pekrie Sirion tsiekrieu khawaya me? Kijüthou dzüko sotaya me, rücü dzü kemekuu?

¹⁵ Derei a themiako a rükra mote, uko kethengu ketheu kemethuo zo; sükoe uko bu thiedzü, kerieki chako nunu u phi mesü, mu chatseko nu vo, cha mezhü kemo nu tuo,

¹⁶ Ukoe kijü chüpie kemeriekecü puo chüwate, kechachie pesekecü vie puo chüwa. Süu pfüthe kevo kheko u ngo tsiu ue tsügetatuo.

¹⁷ Ae süko kezapie ngumvümia mhodzü, niathutsa teikhrie mhiewatuo. Ae uko kemezhiekelie nhie rünoupie uko tsütuo, a zie pie uko meholie lho.

Jeremia Ngumvükecü

¹⁸ Sitse ukoe sie, “Vorlie, uko mharhüpie Jeremia petsou khe, kekreilamonyü kepethadie zievo-u kinu jütalie lho, morei mhakesiu kinu tahitarhokecüu jüta lho, morei siedzekesiu kinu dieu jüta lho. Vorlie, úko theda pie puo dalie khe, sidi puo dieko yopuorei rünyü hie,” sita.

¹⁹ He-i Jihova, a pfhe rünyüshücie, sidi a ngumvüko kepuko rünyüshücie!

²⁰ Mha kesuo pie mha kevi zhakhra chütuo me? Sirei uko a kelhou la thekre puo holiete. A n mhodzünu tha di mha kevi se uko ki pukeshü, n nouyieu uko geinu teshü kereiwatuoü ketha rükrashücie.

²¹ Süla uko nuonuoko pie pekriekecü nu shüwacie; zhiecha kekuo geinu uko zie peruwalie, u kimiako bu nuojü mu samimiapfü chütacie. Uko thepfuko bu thepe geinu siatacie, u khriesako bu terhü nu zhiecha geinu sia üthienyü.

²² U kiko nu kekra pfhe sicie, noe kepeka se u gei vor mhaikeshü ki! Kekreilamonyü uko a telietuo üdi thekre thielie, tsiu a phi la kebie pethupie zhü.

²³ Sirei Jihova, uko a dukhriketuo mharhü pete noe si. Uko kejo vashü uko tsü hiecie, n kengu kinu uko kejovawa hiecie. N mhinguki nu uko chü kelhouwacie, n nou meyiekelie kinu uko gei hakemhie chüshücie.