Jeremia 17 - Angami Naga CL (Re-edited) Bible (BSI)

Juda Kephouma mu Siazha

¹ Juda kephouma thegi kethusei mu diamond tie pie thupie zhüwate, süu uko melou gei tsiu uko ruosuo kiako gei rhipie zhüwate,

² uko nuonuoko uko ruosuobako mu uko nanyü seiko, seibo kepejo khieki, mu kijükhru kerükrieko gei,

³ rüna kezha nu kijüthou kebako rükralie. N kijü pete nunu vo kijü tierie ketso n nyaürako mu n kinyiko pete pie nie kephouma la mia bu vakelie chüwatuo.

⁴ N thuo n mhatho la a khapie n ketsü kayieu pejüwatuo, mu n bu no si kemo kijü nunu n ngumvümia lie chütuo, kekreilamonyü a nouyie miu petushüte mu süu kechachie tu batatuo.

⁵ Jihovae puya: Themia peleyakezhamia mu chüüphou pie puo kekuo chükecümia, puo nou Jihova ki nunu rüreiketamia rüse pfütuo.

⁶ Ukoe kijükesia nu nhabo mhietatuo, sidi kekhruohi kevor ngulie lho. Ukoe rayha thechü kesora, themia lhou kemo metsie kijüra lhoutuo.

⁷ Jihova peleyakezhau, puo kemerü pie Jihova gei kebau thejakepfümia zo.

⁸ Ukoe dzü khieki seibo pelhoupie keba tuoilietuo, rücü khieki süu mieko krazhüya. Teile vor zorei michielie lho, mu puo nyüko pejorükhreipfü balietuo; teiso gei rei puo nou meyhumezhielie lho, tsiu puo si vü moketa chülie lho.

⁹ Themia melou ha mha pete ki rei suo; mharhi mo zo, supuonie süu silie vi ta?

¹⁰ A Jihovae themia nou dojü mu themia melou kevikesuo pfhüya, uko zho ki ze, tsiu uko mhatho kheki sü chü khashütuo ükecü la.

¹¹ Peüpfüe puo thuo pedzü shü kemo puo be keba tuoi, sütuoi mezhü kemo nunu kinyi ngukelie pete sümhie zo; puo kelhou theweluo ki süko puo khawatuo, sidi süko thelanu ukoe kemelomia ücü thashütuo.

¹² He-i zapuzayie kedibau, sietsenu chü kerükriekeshüu, hie kemesa kemesachüu zo!

¹³ He-i Jihova! he-i Israel kemerüu! N khakewamia thenga chülietuo; n kinu tuoketa khe kijü nu thupie tuotatuo, kekreilamonyü ukoe kerhei dzüluou Jihova khawa.

Jeremia Kejo Vashünu Chakecü

¹⁴ He-i Jihova, a chü keshürhoshüyi, sitse a shürholietuo; a kelashüyi, sitse a kelalietuo; no sü a ketsheu zocü la.

¹⁵ Uko kimhie di a ki puya shi mehoshücie, “Jihova die kirapuo ba ga? Süu bu vorliecie!” iya.

¹⁶ Derei a we n lietho nu kepfheu chü mo di tatatuoü mo zo, morei a kemeriekecü teisozhau menguta mo. Noe a tie nu kepar-u kedipuo shi si ba, süu n mhodzüki ba zo.

¹⁷ A chü kemidewa hiecie; noe kepeka nhie a keyau zo;

¹⁸ A pechüyakezhamia bu mengalie, derei a bu we mengata hie; uko bu u shüshütalie, derei a bu we a shüshüta hiecie; kepekau se uko gei vorshücie; tsiu kepeka va kenie de pie uko pekawacie!

Sabat Zhau Se Kemesakelie

¹⁹ Jihovae a ki pucü: Vo di Themia Kharuu nu, Juda kediko ler mu prayakezha nu mu Jerusalem kharu pete nu thaliecie,

²⁰ sidi sie uko ki. Jihova die rünyülie, nie Juda kedi pete, mu Juda pete, tsiu kharu hako nu leyakezhau Jerusalem nu kelhou pete,

²¹ Jihovae puya. Nie kerheiro la, sabat nhie thepie pfü morei Jerusalem kharuko nu süko se ler molieketuo la menuoliecie.

²² Siro sabat nhie nieko kinu thepie puo rei pfü pra hie morei mhatho puorei chü hie, derei a nie puonuoko ki diekhakeshü mhie sabat zhau se kemesalie.

²³ Sishü rei ukoe rünyü morei uko nyie kedeishü mo, derei pietsümvü, sidi mia pfhe silie lhoü mu pethakeshü lielie lho üta.

²⁴ Derei mhanuü nie a pfhe rünyülie, Jihovae siya, sidi sabat nhie thepie puorei pfü di nadi hau nu ler mo, derei sabat zhau chü kemesalie mu mhatho puorei chü molie,

²⁵ silie ro kharu hako nunu kedimia David kediba nu baketuomia lelietuo, kierbagei mu kier gei tuotuo, uko mu uko kezhako, Juda themiako mu Jerusalem nu kelhouko; sidi nadi hau kechachie balietuo.

²⁶ Sidi themiako Juda nadiko nunu mu Jerusalem khie thechüko nunu, Benjamin kijü nunu, Shefela nunu, kijükhru rüna nunu, mu Negeb nunu, kethe ruosuoko mu ruosuo khakeshüko, thoulha mu kethengu ruosuo, tsiu ketshe mu kethengu ruosuo, tsiu ketshe ruosuoko se Jihova kiu nu vortuo.

²⁷ Derei nie a pfhe rünyü mo, sabat zha se kemesa mo, mu sabat nhie thepie pfü di Jerusalem kharuko nu le suokecü si moro, a kharuko nu mi petushütuo; süue Jerusalem nu kedikiko thetuo mu tshülie lhotatuo.