Jeremia 16 - Angami Naga CL (Re-edited) Bible (BSI)

Jeremia Kiya Kemo mu Puo Dielie

¹ Jihova die a ki vor di:

² No thechü hau nunu thenu lie hie, morei n nuonuo thepfu rei thenu rei nyi hie.

³ Kekreilamonyü Jihova thechü hau nunu penuokelie thepfumia morei thenumia tsiu ukoe penuokeshü zuopfüko mu upuonuoko dze pukecü:

⁴ Ukoe kechü re sekecü chü di siatuo. Uko krükralie lho, morei uko khru reilie lho; sidi ukoe kijüu gei thebuo tuoitatuo, uko zhiecha geinu mu pekriekecü geinu katatuo, sidi uko kesiamo pie teirako mu kijüu gei khunuoko kecüca chüwatuo.

⁵ Kekreilamonyü Jihovae puya: Kra keba kinu le hie, morei uko la thekrü chütuoü, morei kratuoü vo hie; kekreilamonyü a themia hako kinu a nouneu, a kekhrieu mu ngukemezhieu chüsete, Jihovae siya.

⁶ Thechü hanunu kezhamia rei kecümia rei siatatuo; uko khrulie lho, mu miapuorei uko krükralie lho; uko la u chü gei lho, uko la u tsü rei thielie lho.

⁷ Miapuorei thekrü kechümia la kecüca keselie lho, kesiamia la uko nou thupeluolie lho; morei mia u puonuo morei uko zuonuo la thenou chü peluokecü hiepie u bu krienu khashülie lho.

⁸ No mia thehethehie chü keba kinu vo hie, vo uko ze ba di cüükrietuoüta hie.

⁹ Kekreilamonyü krodiko Jihova, Israel Kepenuopfüe puya: A thechü hau nu nieko mhinguki nu, tsiu nieko teiki nu, kenei pfhe thenou kemvü pfhe, yasau pfhe mu yasapfü pfhe bu ba motatuo.

¹⁰ Siro no die hako pete pie themia hako ki pukeshü ki, mu uko n ki, “Kiüdi Jihova mha kesuo kemeriekecü hako pete pu hie petsoute shi? Hie kephouma kedipuota ga? Hie hie Kepenuopfü Jihova gei jokewa kephoumau kiu ga?” situo.

¹¹ Sitse noe sie uko ki: Süu kekreilamonyü nie puonuokoe a khawaketa la, Jihovae siya, sidi terhuo kekrei siemedzi tsiu süko lie chü mu süko rüsuo, sidi a khawa mu a zho ze balie mote;

¹² Mu niekoe nie puonuoko ki rei kesuo chükuo, kekreilamonyü nie pete rei kesuo keleu medzitsa tuote, sidi a pfhe rünyü mvüte.

¹³ Süla a kijü hau nunu nieko khapie nie rei mu nie puonuoko rei si kemo kijüra shüwatuo, sidi süra nu niekoe teisoteizei terhuo kekrei lie chü tuotatuo; kekreilamonyü a ngukemezhie pie nie kielie lho.

Kepenuopfü Israel Kelashüketuo

¹⁴ Süla, teisozha vor tou zotuo, Jihovae siya, sükisü “Jihova rhei ketuo mhie Ijipt kijü nunu Israel nuonuoko ze kepar-u” isikecü pu sa motatuo.

¹⁵ Derei “Jihova rhei ketuo mhie pesotsa nu mu puoe uko whuoshükewa kijü pete nunu Israel nuonuo ze kevor-u,” isituo. Kekreilamonyü ae uko ze la vor uko kijü nu a pie uko puonuoko ketsü nu shütuo.

¹⁶ Ae khuoketemia kekra ketseshüzhie, Jihovae siya, sidi uko süko telietuo; mu süsie a chüwhuomia kekra ketseshütuo, sitse ukoe kijüthou kheko nu mu kijükhru kheko nu, tsiu tsiekrie gei tsiepfüko nu uko whuotuo.

¹⁷ Kekreilamonyü a mhi-e uko zhoko pete meho ba; ukoe a mhodzü rüshülie kenjü, morei uko kesuo kechü a mhingu nunu jütalie lho.

¹⁸ Siro a uko kesuo kechü mu uko kephouma zhakhra de kenie khashütuo, kekreilamonyü ukoe kesiamo mhiei kerheiro kejü rhuoko se a kijü bie perhuwate, siro uko vie kerütsekecüko pie a kijü ketshu chüwate.

¹⁹ He-i Jihova, a kekuo mu a dahouu, kemezhiekecü ki a keyau, kijü valako nunu seyieko n ki vor di sie; Hie puonuokoe mhapuorei welie mo derei kemeda, puoma kejü vie sügeinu mha kemevi kejü rübei welie.

²⁰ Themia puoe puo thuo puo la terhuo rhilie vi me? Sükemhie kecükoe terhuo mo zo!

²¹ “Süla uko petha toushütuoüzhie, a tsieu va uko bu a kekuo mu a kezha silietuo, sitse ukoe a za Jihova ücü silietuo.”