Jeremia 15 - Angami Naga CL (Re-edited) Bible (BSI)

Kepechü Kha Toushüketuo

¹ Süsie Jihovae a ki: Mosa mu Samuel unie thuo a mhodzünu thalie zorei, a nou we themia hako kitsa rürei volie kenjüte. A mhodzü nunu uko ketsewatacie, sidi uko bu tuotalie!

² Siro ukoe sie n ki, “Hie bu kirapuo vo ta?” idi pukecü ki, no uko ki pushülie. Jihovae puya: Kesia nu votatuoü ketuoko bu, kesia nu votalie, mu zhiecha nu votatuoü ketuoko bu, zhiecha kitsa votalie, pekriekecü nu votuoü ketuoko bu pekriekecü nu votalie, mu miadie chütuoü ketuoko bu miadie chü votalie.

³ Siro a mha kepeka kekreikecü dia khapie uko gei shütuo, Jihovae siya: Zhiecha bu dukhrituo, tefüko bu cierha setatuo, tsiu teirako mu kijü nu khunuoko bu peka mu bie pesuoketuo la.

⁴ A uko chüpie kijü nu kedi pete bu merietatuo kekreilamonyü Hezekia nuou Manasseh Juda kediue Jerusalem nu chüshüwaketa la.

⁵ He-i Jerusalem, supuonie n ngumezhielie, morei supuo n krükratuo mu? Supuonie rürei vor n dze kevi ketsotie shi?

⁶ No a khawate, Jihovae siya, noe tsiesiete; süla a dzie yhapie n petsou di n pekawatuo, a thenou shükhre ba a nyiete.

⁷ Ae kijüu nu kharuu kinu lieherü pie uko hewate; a uko pesiashüte, a a themiako pekashüte; ukoe uko zhoko nunu rüdi lalie mote eru.

⁸ Uko samipfüko krapie dzükezha nu huocanyo ki rei krakuote; Ae khinhieluo ki u khriesako zuonuoko perhie di kepeka se vorshü; ae nousuo mu kemeriekecü bu te mhai uko gei tsukecü chüshüte.

⁹ Thenie penuokeshüpfü puocha meziete; puo ruopfüu cie vote; teiso baluokecü nu puo niakiu lete; puo pie kethengashüte mu puo ziejü bate. Siro ae uko khapie ngumvümia mhodzünu zhiechau tsüwatuo, Jihovae siya.

Jeremia Panya Lakeshü

¹⁰ A sü ce, chülietie, a zuo, no kijü pete nu themia ze kegei mu mia perhie tuoyakezha, a ha penuokeshü! Ae mha pie mia thepu mo, morei mia vie rei thepu mo, sirei uko pete rei a rüpfhürüse.

¹¹ Jihovae sie: A n kelhou nu vathe lerkecü kevi puo la zo ketho, puotei kesuo puo nu kemezhiekecü tei puo nu ngumvümia pie n gei shü.

¹² Thegiu mu meseue pesotsa thegiu bietshalie vi me?

¹³ N kinyi n vie puoma kere pie puoma kejü mhava chüwatuo, n kephouma la n tuo pete nu siwatuo.

¹⁴ A n chüpie n bu si kemo kijü nunu n ngumvümia lie chütuo, kekreilamonyü a nouyie nunu mi puo tu parte süu kechachie tutuo.

¹⁵ He-i Jihova, noe si; a rükrashücie di a ki vorcie, sidi a peseyakezhamia gei a khepushücie. No shügeshühiekezha nunu a chüseta hiecümu; n lanu mia a kengakecü siliecümu.

¹⁶ N dieko ngulie, sidi a süko cülie, mu n diekoe a nou chü pemvü mu a neilie; kekreilamonyü n za nunu mia a kieya, he-i Jihova, krodiko Kepenuopfü.

¹⁷ Ae keyukenyü chü kebako kro nu bata mo, morei a a nei bata mo; n dzieu mesi khro nu a rübei ba, kekreilamonyü noe noupfhü pie a ketshu chüshü.

¹⁸ Kiüdi a kechü lalie mo, mu a rüzapfüu menelie mota, süu kiüdi vilie mvüte shi? Ketho zo, noe a la ketho kemo rücü puo tuoi, dzü jüketa tuoite.

¹⁹ Süla Jihovae puya: No rürei la vorlie üro, a n ze lalietuo, sidi n bu a mhodzünu thalietuo. Noe diethuodieruo mo di mha puoma kereu hachielie üro, noe a tie mhie mhachülietuo. Uko bu rürei n kitsa valietuo, no rürei uko kitsa vota lho.

²⁰ Sitse a n chüpie themia hako la mese pie kechü dahou chüshütuo; ukoe n perhietuo, derei uko n mhodzü thalie lho, kekreilamonyü a n ze tuo mu n kelashütuo, Jihovae siya.

²¹ A kerüzhümia dzie nunu n kelashütuo, sidi nouzhie kejü dzie nunu n rhashütuo.