Jeremia 14 - Angami Naga CL (Re-edited) Bible (BSI)

Teikuo Dielie

¹ Teikuotaketuo la Jihova die Jeremia ki vorkecü:

² Juda kra bate mu puo kharuko thedzükezei chü zhüte; sükoe kijü nu u dzükezei chü zhüte, tsiu Jerusalem kekra pfhe peso gei kho.

³ Puo pehükoe u kituoko ketsepie dzü pfhü; ukoe lipfhü se vo, sirei ukoe dzü puorei ngulie mo, süla u lipfhü methuo di la vorta. Ukoe menga mu theziekejü chü di u tsü dzepfü tuota.

⁴ Kekreilamonyü kijüu rükote. Kijüu gei teirüshü moketa la lieciemiako u ziekejü chü bate, uko tsü dzepfü tuote.

⁵ Lie nu chüzhie krüpfü zorei penuokeshü puo nuo rei khawate, nha ba moketa la.

⁶ Nha gadako thechü kerükrie gei tha, sidi ukoe meseru tuoi teikhrie kelhetuoü sie; uko mhi mha ngulie mote, nha ba moketa la.

⁷ Hie kephouma thuo hie perhie baketa zhapu chü zorei, he-i Jihova, n zau lanu mhachüshücie, hie tsiesieketa va kekrata zo, mu hie n gei phoumawate.

⁸ He-i Israel kemerüu, kemezhiekelie ki puo kelakelieu, kiüdi noe kijüu nu sikemomia kemhie, rüvemia khuzhü puo rübei vo rüleiyakezhamia kemhieta ga?

⁹ Kiüdi no themia puo vapethopfü baketa puo mhie, terhümiavi kekuo puo mia kelalie lho baketamia mhie bata ga? Sirei, he-i Jihova, noe hie donu baya zo, mu hie n za se n kieya; hieko khawa hiecie!

¹⁰ Themia hako dze Jihovae puya: Ketho zo, uko rühou ketuo u neite, uko phi kethelie mo; süla Jihovae uko zelie mote, mu tsie puoe uko kesuoko rükratuo, sidi kephouma siazha khashütuo.

¹¹ Jihovae a ki: Themia hako dzevi la cha hie.

¹² Uko mevo zorei, a uko kekra pfhe rünyülie lho, tsiu ukoe kethe ruosuo morei telha ruosuo khashü zorei, a süko lielie lho, derei zhiecha, pekrie, tsiu thepetheruo geinu uko pekawatuo.

Ketijü Siedzekesiko Pejokeshü

¹³ Sitse a sie: “He-i, Niepuu Jihova! siedzekesikoe uko ki, ‘Niekoe zhiecha ngulie lho, morei pekriekecü nie ki vorlie lho, derei ae vitho ketho pie thechü hanu shütuo,’ ” si.

¹⁴ Süla Jihova a ki: Siedzekesikoe a zanu ketijü siedze puya; A uko ketseshü mo, morei uko bu chünu uko ki pu mo, morei uko rüchü rei mo. Ukoe ketho kemo ziemho, kemeduo die, tsiu kethemou di mha seketsiketuo ketijü siedze puya.

¹⁵ Süla Jihovae siedzekesiko a uko ketse morei a za nunu siedzedie pu di, “Zhiecha mu pekriekecü kijü hau gei vorlie lho,” ituoyakezhako dze pucü: Zhiecha mu pekriekecü geinu siedzekesi süko pekawatuo.

¹⁶ Siro mia ki siedzekesi pukecüko kelhoupie Jerusalem chaüko nu shüwatuo, zhiecha mu pekriekecü geinu kaketamia chütuo. Miapuorei uko khru lho, uko rei, u nupfünuoko, u nuonuo thenu, mu u nuonuo thepfu shierei. Kekreilamonyü ae uko rügerüzhü rupie uko gei shütuo.

¹⁷ No die hau pie uko ki putuo: A mhinie bu teizeiteiso mhidzü pekrucie, mu unie bu rülei hiecie, kekreilamonyü rüü phousepfü a themiako kevü sei pie vü pesuo sewate, rüza zadi pfüliete.

¹⁸ A lie nu tsu ro, zhiecha pie dukhrikewako ngu! Mu a nadi nu le ro, pekrie la suo kebako ngu! Kekreilamonyü siedzekesiu mu zievo-u unie kenienie kijüu nu rühou di u mhatho pie thelhi chü tuote, mu unie kenienie rei kesikele tuo mo.

Themiako Ngukemezhie Chakecü

¹⁹ No Juda kha lotsowate me? N meloue Zion rütsete me? Kiüdi no hie vükhrüshü di hie bu shürholie mo bata ga? Hie vitho pfhü, derei mha kevi ngulie mo, chü keshürhokecü tei puo pfhü, derei süu sou nu kemichie rübei.

²⁰ He-i Jihova, hie kesuoko hie rei site, hie puonuoko kesuoko, hie n gei phoumawate.

²¹ N za lanu, hieko meliewa hiecümu; n zapuzayie kedibau kengawa hiecümu; no hie ze kediekhokelieu rükrashü di süu bierhuowa hiecümu.

²² Seyieko rhuo huo teirü se vorlie vi me? Morei teikoe teirü khashülie vi me? He-i Jihova hie Kepenuopfü, no süu mo üme? Hie hie kemerü pie n gei tuo, kekreilamonyü no mha hako pete chüshüya.