Jeremia 13 - Angami Naga CL (Re-edited) Bible (BSI)

Linen Chiephau

¹ Jihovae a ki pucü, “Vo di n thuo n la linen chiepha puo khrülie, sidi süu pie n chie phalie, derei süu pie dzü nu petsewa hie,” si.

² Süla Jihova die tuoi a chiepha puo khrülie, di pie a chie phalie.

³ Süsie Jihova die va kenieu a ki vor di,

⁴ “No chiepha puo khrülie di se kebau selie, sidi tsie Eufrat rü nu vocie, sidi süu pie tsiekhie kecieki puo nu keviewalie,” si.

⁵ Süla Jihovae a ki kepu tuoi a vo di süu pie Eufrat khieki nu keviewa.

⁶ Süsie zha kekra sie Jihovae a ki pu di, “Eufrat nu volie, di a n bu keviewanukeshü chiephau sünunu chüliecie,” si.

⁷ Süla a Eufrat nu vo di sünunu chiepha keviekewau thielie, derei chiephau rieta, süu se mhapuorei chülie suota.

⁸ Sitse Jihova die a ki vor:

⁹ Jihovae puya: Hakemhie di ae kemelha tuoyakezha Juda tsiu kemelha setuoyakezha Jerusalem pekawatuo.

¹⁰ Themia kesuo hako, a dieko rünyü mvüketako u nou khrü di u medo nu tuoyakezha tsiu terhuo kekrei lie chütuo üdi medziketako, chiepha hau, se mhapuorei chülie kenjükecü mhietatuo.

¹¹ Kekreilamonyü chiephae themia chieca kupfü tuoyakezha tuoi, sütuoi ae Israel kikru pete mu Juda kikru pete a kupfü tuolieketuo chüshü zo, Jihovae siya, sidi uko pie a themia chülie, a za chülie, thetshepfü, mu zayie chülietuoü sie zo. Derei ukoe rünyü mvüte.

Khubezu Lipfhüko Zasi

¹² No uko ki die hau pushülie: Jihova Israel Kepenuopfüe puya: Lipfhü pete rei khubezu pie tshuliecie. Sitse ukoe n ki, “No hie üse lipfhü pete khubezu pie tshu morosuokecü si moü ba me?” isietuo.

¹³ Sitse no sie uko ki: Jihovae puya: Ae kijü hau nu kelhoumia pete, David kediba gei keba kediko zo rei, zievoko, siedzekesiko, mu Jerusalem nu kelhoumia pete, kemeze pie uko tshushütuoüzhie.

¹⁴ Sidi a uko bu huoniehuo geinu kejoshütuo, miakrünuoko mu u nuonuoko, Jihovae siya. Ae mia ngumezhielie lho morei peshashülie lho morei khrielie lho derei süko pekawatuo.

Miadie Chü Votaketuo Kedekeshü

¹⁵ Nie nyie kedeipie rünyüliecie; sidi kemiakota hie, kekreilamonyü Jihova die pushüte.

¹⁶ Puo kezeiu se vorta kemonu, tsiu kijüthou gei teizei merü di nieko phi mesükemo nu, nie kezieu merü baluokecü nu, puoe süu pie kezei nu shüwa di süu bu zeibouita kemonu; thetshetherhu pie nie Kepenuopfü Jihova tsüliecie.

¹⁷ Derei nie rünyülie moliro, nie kemiakokecü la a ruopfüe pekhre di kra batatuo; a mhi-e kra phituo sidi mhidzü pekrütuo, Jihova kuoko teze kedie chü voketa la.

¹⁸ Kediu mu kedipfü zuo ki pushücie. “Theba kerünuo nu balie, kekreilamonyü n keditsüre keziviu n tsü geinu kertakecü la.”

¹⁹ Negeb nadiko khawatuo miapuorei süko khrü lalie lho; Juda pete ze kedie chü votatuo, peteko teze kedie chü votatuo.

²⁰ N mhi pfüsie di pesotsa nu kevorko mehoshücie. Tekuokro pie n ketsüu, tekuokro keziviu, kirapuo bata ga?

²¹ No mia pethapie n zemia kechüko süko pie n tsü gei keshü ki no kedipuo pu ta? Kemezhiekecü thenumia nuonuovachü tuoi n gei vor lhoü ba me?

²² Siro noe n nou nu, “Kedipuo la üdi mha hako a gei vorta shi?” i üro, süue n kejokemou kemeriekecü la n nei hieshü di, n bie kethengawate.

²³ Ethiopiamia puo zhü bie kedilie morei khurhü puorhie kechüko kedilie vi me? Silie üro mha kesuo chü tuoyakezhamia mha kevi chülietuo.

²⁴ Kijükesia nunu teikhrie sier shübe hesetayakezha tuoi, a n bie kezawatuo.

²⁵ Hau n yau, a mejüpie n ketsü n yau, Jihovae siya, kekreilamonyü noe a rükra mo di ketijü peleketa la.

²⁶ A thuo n nei hiepie n zie dzewatuo, sidi mia bu n kemengau ngutuo.

²⁷ Ae no kerütse chü keba, n pieüko mu rügerüzhükecüko, tsiu noe menga mo di kijükhruko geinu thethe lie keba ngushüte. No we ce, chülietie, he-i Jerusalem! Kichiepuo n chü kemesalie mo batuo ga?