Jeremia 12 - Angami Naga CL (Re-edited) Bible (BSI)

Jeremia Ukepenuopfü ki Panyakecü

¹ He-i Jihova, a n petsou di kenya kesieki, noe kemezhütsatie tha zotuo; derei a bu a nyieu pie n ki shücie. Kiüdi kerüzhümia kruo miemielieya mu? Kiüdi kelhiecümia lhou pevilieya mu?

² No uko pelhoushü, mu uko u mie krelie; uko memielie di uko si vülie; uko tie nu zo we n penuo tuo, sirei uko melou n ze kepetse phi.

³ Derei no we, he-i Jihova, a si ba; No a ngu di a dojüshü, a melou n ze tuo zo. Tekuo dukhrituoü ketuo tuoi uko teshü thalietacie, tsiu dukhriwaketuo nhie la uko shükholietacie.

⁴ Kichiepuo kijüu bu meheimelo, mu lie pete nu nha bu rüwizhü ta? Sünu kelhouko rügerüzhü la khunuoko mu perako tshowate, mu themiako sie, “Puo u rüliko kitsa lawe puo mhicie,” iya.

Ukepenuopfü Jeremia Die Kelakeshü

⁵ Noe thephi se takecüko ze ta kewhuo sidi n nyieta üro, no kedipuo mhie di kier ze ketilie vituo ga? Siro no kijü kemezhü nu rei tetsuta üro, kimhie di no Jordan ketsa kesou nu tuolie vi ta?

⁶ Kekreilamonyü n siezedzürieko mu n kinuko zorei, ukoe n gei kelhie; ukoe krodi chü n siewhuo; uko n ki die kevi pu zorei, uko pele hiecie.

⁷ Ae a ki khawate, ae a phruokeshüko vawate; a a nou kekhriepfü pie puo ngumvümia dzie nu shüwate.

⁸ A kayiekoe ketsa nu losha puo tuoite; hapfüe puo pfhe phrapie a petsoute, süla a puo ngumecüte.

⁹ Haina a diekhakeshü la a kayie mehoute me? Tekecü perako puo houpfü ba me? Vo di nha khunuo pete kie kenguliecie; puo peka cüketuo la uko ze vorlie.

¹⁰ Kepfhemia kekra a khubelie pekawate, ukoe a yau kedewate, a ya a keneiu bie perapie khakewa rayha puo chüwate.

¹¹ Ukoe süu chü kemethuowate; methuo zhüte, süue a ki meloshü. Kijüu pete methuo zhüte, derei miapuorei puo nounyü mo.

¹² Mha pekawayakezhako rayha pfüthe thechü kerükrieko gei vorte; kekreilamonyü Jihova zhiechaue kijü tietsapuo nu vo kijü kekreitsa ketso pekawatuo; miapuorei krulie lho.

¹³ Ukoe thoulha tsia prushü mu zohu retuo, ukoe u thuo kemezhie seshü derei mhapuorei mevilie lho. Ukoe lie rekelieko se mengatatuo Jihova noupfhüu kemerietakecü la.

¹⁴ Jihovae a zanuo kesuomia pete a a themia bu welietuoükeshüu biekecüko pete petsou di pucü; Ae uko kijü nunu uko ciethewatuoüzhie, tsiu Juda kinuko uko donunu ciethewatuo.

¹⁵ Siro a uko ciethekewa sie, a uko ngumezhie lashütuo, sidi a uko mia puopuokecü ze la u vieu nu mu u kijü nu la voshütuo.

¹⁶ Süsie, ukoe a themia zhoko thethochü di dojülie, a za nunu rüse di, “Jihova rhei ketuo tuoi” idi ukoe a mia pethapie Baal gei rüsekecü mhielie liro, uko bu a themiako donu lhoulietuo.

¹⁷ Derei mhanuü seyie puoe a die rünyülie moro, ae süu mie phewatuo tsiu süu pekawatuo, Jihovae siya.