Jeremia 11 - Angami Naga CL (Re-edited) Bible (BSI)

Dietseidiekho-u Bierhuokewa

¹ Jihova die Jeremia ki kevor:

² Dietseidiekhokelie hau dieko rünyüshücie, sidi se Judako mu Jerusalem nu lhou kebako ki pushülie.

³ No uko ki, Jihova Israel Kepenuopfüe puya: Dietseidiekhokelie hau rünyü kemvüu bu rüsepfücie.

⁴ Süusü ae nieko puonuoko Ijipt kijü nunu, thegi lho pezhayakezhau nunu uko ze parshü di diekhashü, di sie, a pfhe rünyüliecie, di a nie ki diekhakeshü pete chüliecie. Sitse nieko a themia chülietuo, mu a nie Kepenuopfü chülietuo,

⁵ sidi a nie puonuoko ki rüsekeshü, mithunudzü mu mepfhidzü krukezhü kijü puo, thie tuoikecü pie tsütuo üdi rüsepie kezhüu chülieketuo la. Sitse a puo die kela di, “Jihova, süu bu siliecie,” ishü.

⁶ Sitse Jihovae a ki: Die hako pete pie Juda nadiko, mu Jerusalem chaüko nu pushülie. Dietseidiekhokelie hau dieko rünyülie di süko chüliecie.

⁷ Kekreilamonyü a hiechü di nie puonuoko Ijipt kijü nunu uko ze kepar nhie nu vor thie ha ketso rei mvürümvü chü uko ki pu di, A pfhe zelie, sishü zo.

⁸ Sirei uko zelie mo morei uko nyieto kereishü mo, derei kehoupuorei u nou khrü di u thuo u noule kesuo nu tuo phrete. Süla ae dietseidiekho hau dieko se u ki vor, uko bu chünu di diekhakeshüko, derei ukoe chülie mo.

⁹ Siro Jihova a ki: Juda themiako mu Jerusalem nu kelhouko donu kepekhre mharhü puo bate.

¹⁰ Ukoe rürei thiedzü uko puonuoko a die rünyü mvüketa kephouma nu la vote; ukoe terhuo kekrei lie chütuo üdi vote; Israel kinuko mu Juda kinuko a uko puonuoko ze dietseidiekhokelieu varhuowate.

¹¹ Süla, Jihovae puya, a kepeka se uko gei vor tou zotuo mu uko tapralie kenjü; uko thuo a ki u mezhiemelo zorei, a uko pfhe rünyülie lho.

¹² Sitse Juda nadiko mu Jerusalem nu kelhouko vo kethe ruosuo chüpie tsü kevor rhuoko ki vo u mezhiemelotuo, derei uko kemezhiekelie ki sükoe uko kelashü lho.

¹³ Kekreilamonyü he-i Juda, n rüna kedithede ba shi süthede terhuorhiko rei ba, tsiu Jerusalem nu chaü kedithede ba shi süthede uko thenga ruosuoba chüpie ba, ruosuo chüpie Baal tsüketuo la.

¹⁴ Mu no we themia hako la kecha chü hie, morei uko sou nu n mezhiemelo tsiu cha rei hie, kekreilamonyü uko kemezhiekelie ki a kiekeshü a rünyülie lho.

¹⁵ A kekhriepfü mha kesuo chüta üliro, a kinu puo mezhü kedipuo ba ta? Rüseko mu kethe ruosuo muoe n siazhau chü kedilie vi me? Sidi no zayie chülie vi me?

¹⁶ Jihovae va puo n üse, “Olivbo kepejo puo, zivi mu puo si vi” üpu; derei khriedi pfhe ze di puoe mi pie süu thetuo, sidi puocoko thewatuo.

¹⁷ Krodiko Jihova n pelhoukeshüu, mha kesuo n gei vorketuo pushüte, kekreilamonyü Israel kinuko mu Juda kinuko mha kesuo chükewa, süusü kethe ruosuo chüpie Baal tsü di a nou chü kemeyieshü.

Jeremia Kedekeshü

¹⁸ Süu Jihovae a pesishü, sidi a süu silie; süsie no uko mhatho kesuoko pie a pekie.

¹⁹ Derei a we puo zho kevi tekuonuo dukhrituoü ze kevo tuoi zo. Mu ae süu a petsou keba si mo, süu uko kelhiekecü doko rhü di sie, “Úko seibo-u puo siko sa di pekawa khe, úko kerheimia kijüu nunu puo dathewa khe, sitse puo za rükra sa motatuo!” iya.

²⁰ Derei no we, he-i krodiko Jihova, kemezhü nunu capi chüyakezhau, themia nou mu melou kese mehoyakezhau, no uko gei khepu lieketuou a bu nguyi, kekreilamonyü a dzeu pie n dzie nu shüshüte.

²¹ Süla Jihovae Anathot themia, n kerheiro pfhü ketuomia la pu di sie, “No Jihova za nunu siedzekesi die pu hie, moro no hieko dzie nunu siatatuo,” iya.

²² Süla krodiko Jihovae puya: A siazha pie uko tsütuoüzhie; khriesako zhiecha geinu siatuo; uko nuonuo thepfu mu thenu rei pekrie nunu siatuo;

²³ tsiu uko donu miapuorei lhieshülie lho. Kekreilamonyü a uko pechüketuo teicieu nu kepeka se vor Anathotmiako gei shütuo.