Jeremia 10 - Angami Naga CL (Re-edited) Bible (BSI)

Terhuorhi Kerüsuo geinu Israel Pekakewa

¹ Jihovae nie ki kepu die rünyüliecie, he-i Israel kikruu.

² Jihovae puya: Seyieko zho silietuoü hie, morei teigei zasiko la michieta hie; kekreilamonyü seyiekoe süko la michie baya.

³ Themia zhokoe kekrükecü la: ketsa nu seibo puo wilie di, mhachü kesimia puo dzie pie kechie se di mharhilieya;

⁴ Mia rakachü tsiu suna pie süu dalie; ukoe gojal mu metevü se di zhie kemalie süu bu mele mokelie chülie.

⁵ Uko terhuorhiko sü tsütuo lie nu lieshie mhie zo, süko die pulieya mo; ukoe tuolieya kemo la, süko toupie morosuoya. Süko prei hie, kekreilamonyü sükoe mha kesuo chülie kenjü zo, morei uko gei mha kevi chülieketuo rei ba mo zo.

⁶ He-i Jihova, n kemhie jülie; noe zha, tsiu n za puo kekuo zha zo.

⁷ He-i seyieko kediu, supuo n prei mota ta? kekreilamonyü süusü n ya zo; seyieko donu mhakesiko pete tsiu uko kedi peteko nu n kemhie puorei tuo mo.

⁸ Ukoe mecie mo mu kenyamia zo; terhuorhiko kepetha sü sei ki rei suocü zie mo!

⁹ Tarshish nunu rakachü vü se vor, tsiu Ufas nunu suna se vor. Sükoe mhachü kesimia tsiu rükreimia dzie mhatho zo; uko teimezie mu krümeleikecü se u pfhenei chü; uko pete rei mhachü kesimia mhatho phre zo.

¹⁰ Derei Jihovae Ukepenuopfü ketho-u; puo rhei tuoyakezha Kepenuopfü tsiu kechachie ketuo kediu. Puo noupfhü nunu kijüu rünietaya, tsiu seyieko puo nouyieu pfülie lho.

¹¹ Hakemhiekecü se no uko ki pushülie: Teiko mu kijü chüshü kemo rhuoko kijü geinu tsiu teiko khro nu kaüjütatuo.

¹² Puoe puo kekuo geinu kijüu chülie, puo mhasi geinu kijüu sedelie, mu puo kesikele geinu teiko kelha voshü.

¹³ Puoe puo pfhephrakeshü ki, teiko gei dzükru pfhe partaya, tsiu puoe kijü valatsa nu mhoutsa pesieshü. Puo teirüu la teikemela chüshü, tsiu puo mhaboukiko nunu teikhrie se parshü.

¹⁴ Themia pete mecie mo mu kesikele jü; rükreimia pete rei uko terhuorhiko la mengata; kekreilamonyü uko miarhikoe ketho mo, tsiu uko gei kerhei thesü ba mo.

¹⁵ Ukoe kemethuo zo, mha sekecü tho zo; siazha pie uko ketsü teiki ukoe katatuo.

¹⁶ Jihova sü mhie mo, Jakob yau, kekreilamonyü puoe mha pete chükeshüu zo, tsiu Israel-e puo kayie seyieu; puo zae krodiko Jihova.

Miadie Chü Votaketuo

¹⁷ Kijü nu nie vienya dzeko chü kenguliecie, he-i mia bu u re di lhouyakezhako!

¹⁸ Jihovae puya: A hateiki kijüu gei kebako chü kelhouwatuo, sidi uko gei kemezhiekecü se vorshütuo, uko bu süu silieketuo la.

¹⁹ A mezhieko la a sü chülietie! A rüzapfüu re sete. Derei a sie, “Hauha a siazha puo toute, mu a hau toupfülie morosuo,” ishü

²⁰ A pfheki bie pesuowate, tsiu a roko pete tete; a nuonuoko a kinu tuote, sidi uko tuo mote; a pfheki pethoushülieketuo, tsiu kikha pfheko lhashüketuo miapuorei tuo mote.

²¹ Kekreilamonyü kuopfhekoe mecie mote, mu uko Jihova ketsolie mo; süla uko kruolie mo, tsiu uko kuoko pete cüre tuote.

²² Mhapfhe puo rünyüshücie! Rünyüshüyi, süu vorzhie, pesotsa kijü nunu kebvükebie se vorzhie Juda nadiko chü kemethuowaketuo la, tsiu meseru ki chüwatuo üdi.

²³ He-i Jihova, a sicü, themianuo cha ha u thuo kekhalieketuo u dzie nu tuo mo, themiae puo thuo tuokeshü puo phichako cha thalie kenjü.

²⁴ He-i Jihova, a chü kemezhüshücie, derei puotoukecü nunu liecie; n nouyie nunu hieyi, moro no a chüpie a bu mhathokemo chüwa rei si momu.

²⁵ N noupfhü rupie n si kemo seyieko, tsiu n za kieya kemo themiako gei shücie; kekreilamonyü ukoe Jakob tecüliete, ukoe puo mezulie mu puo bie pejüwa, sidi puo kebachü chü perawatakecü la.