Jeremia 1 - Angami Naga CL (Re-edited) Bible (BSI)

¹ Jeremia, Hilkia nuou, Benjamin kijü Anathot nu zievoko mia puo die;

² Amon nuou Josia, Juda kijü nu dikelie cie kerese cie, Jihova die puo ki vor.

³ Süusü Juda kediu Josia nuou Jehoiakim teiki rei vor, mu Juda kediu Josia nuou Zedekia dikecü teicie kerepuo thela, khrü pengouu nu Jerusalem ze miadie chü voketa ketso.

Jihovae Jeremia Kekie mu Ketsekeshü

⁴ Siro Jihova die a ki vor di sie,

⁵ “Ae n zuo va nu n rhikelie mhodzü a n si, tsiu n penuokelie mhodzü a n chü kemesaliete; a n bu seyieko ki siedzekesimia puo chütuo üdi petholiete,” si.

⁶ Sitse ae sie, “He-i Niepuu Jihova! A die pulie si mo ketho zo, a nhicumia puo zoluoe,” si.

⁷ Derei Jihova a ki, “A nhicumia puo zoluoe, sikecü pu hie, kekreilamonyü noe a n ketsekeshü pete ki vo zotuo, tsiu a n ki diekhakeshü pete no pu zotuo.

⁸ Uko prei hie, a n kelalieketuo la n ze tuo zocü la, Jihovae siya.”

⁹ Süsie Jihovae puo dzie yhapie a tie nyüshü, sidi Jihovae a ki, “Tsie a dieko pie n tie nu shüshüte ho.

¹⁰ Harie, thie a n pie seyieko mu kedirüvieko mho shüwate, phewa mu shükhrüwa, pekawa mu kelhouwa, tsiu chüshü mu pelhoushüketuo la,” ita.

¹¹ Siro Jihova die a ki vor di pukecü, “Jeremia, no kedipuo ngu ba ga?” Sitse A sie, “A almond seico puo ngu balie.”

¹² Sitse Jihova a ki, “No ngu touta zo, kekreilamonyü a a dieu chüshütuoü süu meho ba,” si.

¹³ Süsie Jihova die va kenieu a ki la vor di sie, “No kedipuo ngu ba ga?” si. Sitse a sie, “A gali mekhrokeba puo ngu ba, süu pesotsa nu rülhi kekreitsa va ba” sishü.

¹⁴ Sitse Jihova a ki: Pesotsa nu kepeka par di kijüu nu ketuo themia pete gei votuo.

¹⁵ Kekreilamonyü a tsie pesotsa kedi seyieko pete kieshütuo, Jihovae siya; mu ukoe vortuo, sidi uko pete u kediba chüpie Jerusalem kharuko nu shülie di, sü khieümhoura dahouko pete, tsiu Juda nadiko pete petsoutatuo.

¹⁶ Sidi a uko petsou di uko dienya kecütuo, süusü uko rügerüzhü di ukoe a khakegewatacü la, sidi uko ruosuo chüpie terhuo kekrei tsü, mu u thuo u dzie mhatho rüsuo tuote.

¹⁷ Derei no we n chie phalie, sielie, sidi a n ki diekhakeshü pete se uko ki pushülie. Uko mhodzünu tetsuta hie, moliro a uko mhodzünu n pekrüshütuo.

¹⁸ Kekreilamonyü a kitsa nu n bu kijü perhieketuo la n chüpie dahou baketa nadi puo, thegi pie kechü co puo, tsiu mese pie kechü sozha puo chüshüte, Juda kediko, kedinuoko, zievoko, mu kijü nu themianuoko, petsoulietuo üdi.

¹⁹ Ukoe n perhietuo; derei uko n penyülie lho; kekreilamonyü n kelalieketuo la a n ze tuo zo, Jihovae siya.