Jakob 5 - Angami Naga CL (Re-edited) Bible (BSI)

Mhakenyimia Bu Menuolienukecü

¹ Harie mhakenyiko, nieko a die rünyüliecie, kemezhiekecü nieko gei phirtuoü keba la nieko krakhouilie.

² Nie kinyiko cieürietazhie mu nie pfhe nie neiko shülhe bu cülietazhie.

³ Nie suna mu rakachüko mhouthietazhie mu mhouthie süu nie kejo tha nie kieshütuo, tsiu süu mi mhiei nie chü cülietuo. Nie thelatsa la nie kinyiko kenguliete.

⁴ Rünyüliecie! Nie mia nie lie nu mhachükeshüko zha chü moketako zha thuo shiekhoui zhüte, mu nie lie rekeshüko shiekeshü pfhe si kho krodiko Niepuu tsote.

⁵ Nie kijü hau nu lhou ketheguo mu nie nei nie nyüko chüwate; sidi nie nou thuo nie chü peluopie dukhriketuo zhau pfhe bate.

⁶ Nieko themia kemiathoko pejo mu dukhriwa, sükoe nie mese chü mo zo.

Kemezhiekecü nu Shügeshühiekelie

⁷ Süla a khrieko, Niepuu vor kemochie shügeshühie balie. Lieciemia shügeshühiepfü di puo lieyie bu vilieketuo la teirü kerieu mu kenuou pfhe terüpfü baya.

⁸ Süla nie rei shügeshühiepfü balie. Nie nou jükrepfü ba zolie, Niepuu kevor tei penuoketa la.

⁹ A khrieko, nieko huoniehuo gei panyapara hiecie, sitse nie pejo molietuo. Harie, mia Ketsoketuou kikha ki tha zo!

¹⁰ A khrieko, Niepuu za se die pu kevor siedzekesiko rei kemezhiekecü nu rei hiepfü thalie üdi thakie puo chükeshü rükrashücie.

¹¹ Ketho zo, we shügeshühiekeliemia üse thejakepfümia üya. Nie Job shügeshühiekelie dze silie mu nie Niepuu mharhüu kedipuo shicü ngulie, Niepuue mia khrie mu mia ngumezhie phiyakecü.

¹² A khrieko, ba hurei nie tei rei morei kijü rei morei phrakeshü kehoupuorei se rüse hie, derei nie die ro “U” ülie mu moro “Mo” üliecie, nie pejokewa nu leta molieketuo la.

Kepele Kecha

¹³ Nie donu miapuonie kemezhie ba me? Sümia bu kecha chülie. Miapuonie u nei ba me? U bu ketshe pfhe chü kelilie.

¹⁴ Miapuonie mhachü ba me? Puo bu kehou nu phichüko kielie di uko bu puo la chashülie mu Niepuu za nunu tier pie puo kenheshülie.

¹⁵ Pele di chakeshü la mhachükezhüu bu la sielietuo, mu Niepuu puo thuo süu bu shürholietuo, tsiu puo phoumawa shierei vashü puo tsütuo.

¹⁶ Süla nie shürholieketuo la huoniehuo mhodzünu nie kejokemouko phrawalie mu huoniehuo la chaliecie. Kemiathomia kechae kuo phi mu chükhrielieya.

¹⁷ Elija rei u kemhiemia puo zo, ru puo thenou thetho chü di tei bu rü hienu cha ba tse, cie se di puotie teirü bu kijü tsur mota.

¹⁸ Süsie puo cha lashü ru tei bu rülie, sidi mha bu kijü nu lhou la parlie zo.

¹⁹ A siezedzürieko, nieko donu huomia ketho-u therhieta di yo tuota, sidi huomia puo nou chü kedi lalie ro,

²⁰ sümia bu si touliecie, mha kesuo chüketau nou chü kedipie puo bu puo kejokemou kechü chau therhielieketau, puo kesia nunu kephoumau ruopfü kelalietuo tsiu kejokemou kekra whelietuo.