Jakob 4 - Angami Naga CL (Re-edited) Bible (BSI)

Kijüu Ze Khriethokecü

¹ Nie donu kegei mu keprülikecüko kirapuo nu vorya ga? Süko nie menguko nie geinu kegei sei bayakezha nunu parya mo me?

² Nie mha menguya, derei süko ba mo; süla nie mia dukhriya. Mu nie mha mehouya, derei süko ngulieya mo, süla nie mia ze keprüli mu kegeitaya. Nie chaya kemo la, ngulieya mo.

³ Nie chakesie ki süu ngulieya mo, kekreilamonyü nie nei nie nyü chü di cha zhü kemoko chakezha la nie cha rei ngulieya mo.

⁴ Harie, pieümiako! Kijü hau ze khrietho kechüe Ukepenuopfü ngumvü zo ükecü nieko si mo me? Süla kehoupuorei kijü hau ze khrietho chü ro puo Ukepenuopfü ngumvümia zo.

⁵ Morei kethodie nu, “Ukepenuopfüe ruopfü khapie u nou shüwaketau la mha mengu kelho baya,” idi kepuu kemethuoü leya me?

⁶ Derei puo ngukemezhie kha pekrashüya; süla süu dze, “Ukepenuopfü kemiakokezhamia mese chüya, derei ngukemezhie pie kokemoko tsüya.”

⁷ Süla nie khapie Ukepenuopfü tsülie. Terhuokesuou mese chülie, sitse puo ta nie therütatuo.

⁸ Nieko Ukepenuopfü penuo volie, sitse puo rei nie penuo vorlietuo. Nie dzie chü kemesalie, nie kephoumako, mu nie nou chü kemesalie, nie nou kenieko.

⁹ Nie thekrü chülie, nie nousuolie mu kralie. Nie kenyü chüpie kekra chüwalie tsiu kenei chüpie thedzü kezei chüwalie!

¹⁰ Niepuu mhodzünu nie chü kerünuolie, sitse puo nie chü kerükrieshütuo.

Huoniehuo Le Pejo Hie

¹¹ A kezeko, nie huoniehuo tha hie. Kehoupuorei puo zemia tha morei puo zeu le pejo ro, thezho-u tha mu thezho-u pejoya; no thezho-u pejota ro, no thezho-u chüüzeyakezhamia monyü capimiate.

¹² Thezho khashüyakezhae mia puo rübei zo mu puoe süu kela rei shü morei peka reiwalie vi. No n zanuou le pejoyakezhau n thuo n üse supuo üya mu?

Kemiakokecüko la Tarhokeshü

¹³ Siro rünyüliecie, nieko we, “Thie morei sodu we rüna puo nu vo di cie puo sünu batuo, sidi thelhi chü di raka pfhülietuo, isiya.”

¹⁴ Sirei nieko sodu kedipuo vortie shicü si mo. Nie kelhou ha kicüpuo mu? Nieko mha kekhu zopuoki par di ngu mo latayakezha kemhie kro puo zo.

¹⁵ Süla nieko, “Niepuu medo ro, we rhei ba di mha hau morei luu chütuo,” ikecü pu zhü.

¹⁶ Sümhie nieko tsie rei kemiako mu kemelha tuoya; kemelhakecü süko pete kekrü.

¹⁷ Süla mia puoe chü kezhüu si zorei chü moro puo phoumata zo.