Jakob 3 - Angami Naga CL (Re-edited) Bible (BSI)

Utie Kekhalie Morokesuo

¹ A siezedzürieko, nie mia kekra kepetha chüta hie, we mia kepetha chüyakezhako kekreimia ki rei u ketso menuokuoketuo nie si ba zocü la.

² We mha kekra nu kekrütayacü la. Derei mia puoe puo diepuko nu kekrütaya moro puo vi tsei zo, mu puoe puo kelhou peteu rei kekhalie vi.

³ We mha kecü yopuo se kier me doulie di puo bu u die zelie, di puo ze u medora volieya.

⁴ Morei rou puo dze leshü phi: Süu zha phi tsiu teikhrie bu hepie lutsahatsa va tuo zorei routhusei kecü yopuo se süu shü kewhipie u thuo u medora volieya.

⁵ Sütuoi umeüe u gei zatho kecü yopuo zorei se di kemelha sekecü die pulieya. Mi kecü yopuo zorei ketsa kedithede thewaya mu!

⁶ Tsiu umeüe mi puo zo. U gei zatho kekreikecüko donu khakeshü u meüe kephouma kijü zo; süu umo pete chü perhuwaya, sidi u kelhou zho theshüya, mu süue mizie miü nu thewaya.

⁷ Themiae nhachü mu pera, gou tuoyakezha khunuo siro dzükezha khunuo neiüko kekhalie vi mu kekhalieya,

⁸ derei miapuorei umeü ha kekhalie mo, süue bajülieya kemo mha kesuo puo, mia reikhriwalie kevipfü therei thuo tshu zo.

⁹ We süu se Niepuu mu u Puou thezieya tsiu we süu se Ukepenuopfü rhi nunu chükelie themia rei rüsetaya.

¹⁰ Tie puo nunu japie mia ketsü mu mia rüsekecü rei parya. A kezeko, hau hi zhü mo zo.

¹¹ Dzüluoki puo nunu dzü krie kevi rei mu kepfhü rei parlieya me?

¹² A kezenuoko, chiedebo geinu olivsi, morei khubebo geinu chiedesi vülieya me? Kezie dzüluo nunu dzü krie kevi parlieya mo zo.

Peso geinu Kevor Mhasiu

¹³ Nie donu supuonie mhasi mu mhalekelie ba ga? Puo bu puo kelhou zho kevi, siro puo mhathomhachü kevi, süu mhasi geinu kepar üse pekieshülie.

¹⁴ Derei mia ngu nie ro sekecü mu kengukemvü nie nou ba ro, nie mhasiu se kemelha di ketho-u se kecürü hie.

¹⁵ Sikecü mhasi we teigei nu vor mo, derei kijü hanu vie zo, süu chüüphou mu terhuokesuou kitsa nu zo.

¹⁶ Mia ngu u ro tsiu kengukemvü kebara, kebvükecü mu mha kesuo neiü bayacü la.

¹⁷ Derei peso geinu kevor mhasiu we therieu mesa, süsie kezekevi, u zho kevi, kediezelie kerüü, mia ngumezhie sekecü mu mhatho kevi kra phicü, u nei si krei kemo, morei kethera kemo.

¹⁸ Siro kezeviyakezhako kezevi di kemiatho siu leishüya.