Jakob 2 - Angami Naga CL (Re-edited) Bible (BSI)

Huomia Rhu Pekreita Hienukecü

¹ A kezeko, zayie kechü u Niepuu Jisu Khrista pelekelie nu nie huomia khrie pekreitaya me?

² Miapuonie suna dziekha nyü mu pfhemenei kevi se di nie kehou nu vor siro mhakejümia puo pfhemenei kesuo se di vor;

³ mu süki nie puo pfhenei kevi keseu si krei di sie, “N pezie rei theba hanu baliecie,” ita, siro mhakejüu ki, “Cüki thalie,” morei “A phi ki balie,” isita ro,

⁴ nie thuo nie donu themia kho kekrei mu nie nou puotou mo di capi chüta mo üme?

⁵ A khrieko, rünyüliecie. Ukepenuopfüe kijü hanu mhakejüko kedapie uko bu kepeletsa mhakenyimia mu puo khrieyakezhako la phrapie kezhü kedirüvieu kayiemia chülieta mo üme?

⁶ Derei nie kejümiako peseya. Kenyiko thuo nieko peseya mo üme? Nie merhashü ze dienyaki nu kevoko süko thuo mo üme?

⁷ Theza kevitho pie nie tsüwaketa zatho süu uko thuo pu pesuoya mo üme?

⁸ Kethodie nu thupie kezhü ngukelie kedi zho-u, “No n siezanuomia khriepie n thuo n kekhrie mhieliecie,” ikecüu dieze chü tseilie ro, no vi zo.

⁹ Derei nie huomia khrie pekreita ro, nie kephouma chüta zo mu thezho-u bu nieko pejopie thezho varhuokezhamia chü bate.

¹⁰ Siro kehoupuorei thezho-u pete zeya zorei ca puo nu tso mota ro, pete nu puoe jotaya.

¹¹ Siro “Pieü chü lho” idi pukeshü “Mia dukhri lho,” ikecü rei pu sashü zo. Tsiu no pieü chü mo zorei mia dukhriya üro, no thezho-u varhuoyakezhamia chüte.

¹² Süla u shüphrakeshü zho-u bu u capi chüketuo le di die pu mu mhachü zoliecie.

¹³ Derei mia ngumezhieya kemomia we ngumezhie mo di puo nyie kecütuo, sirei ngukemezhie-e dienya nu kuolietuo.

Kepele mu Mhatho

¹⁴ A kezeko, miapuonie puo kepele nyi rei puo mhatho jü liro kedipuo kemevi ba ga? Kepele puo kelashülie vi me?

¹⁵ Mhanuü nie siezedzürie morei nie üpfünuo huo methuo mu thiethie va rei jü tuo,

¹⁶ mu nie mia puoe sie puo ki, “Nie nou mene di tuolie; mi peguolie siro mhacü pevüliecie,” ishü, derei nie mhapuorei pie u mo va kemeteishü moliro, süu la kedipuo kemevi ba ga?

¹⁷ Sütuoi kepele rei puo mhatho jü liro kesia zo.

¹⁸ Derei huomia sie, “No n kepele nyi mu a we mhatho nyi,” isituo. N mhatho sa mo di n kepele balie vi ükecüu tha a pekiecie, siro a a mhatho geinu a kepele pekieshütuo.

¹⁹ No rei Ukepenuopfü puo ba zo ücü peleya; süu vi zo. Terhuokesuoko rei süu peleya mu michie di pe baya.

²⁰ Derei mhalekemo-u, kepele puo mhatho sa kemosie kemethuo zo ükecü no silietuo mo mo ga?

²¹ U puou Abraham puo nuo Isak pie ruosuoba gei keshü la puo mhatho geinu puo ü mezhülie üta mo me?

²² No rei si batuo, puo kepele tsiu puo mhatho kedziese tou di mhachü; mu puo mhatho geinu puo kepele chüpie vi tseikelie zo.

²³ Kethodie-e pukeshü, “Abraham Ukepenuopfü pelelie, mu süu la puo ü miatho üta,” ikeshü chü tseilie, sidi puo ü Ukepenuopfü zeu üta.

²⁴ No rei si batuo themia puoe puo kepele la rübei monyü puo mhatho rei sakecü la mezhülieya.

²⁵ Sütuoi Rahab thethenupfü zorei thiedzü mia lie chü kevornie pesolie di unie ketsepie cha kekreitsa shükewa mhatho-u la mezhülieta mo üme?

²⁶ Themo ha ruopfü sa moro kesia zocü la, sütuoi kepele rei mhatho sa moro kesia zo.