Jakob 1 - Angami Naga CL (Re-edited) Bible (BSI)

Kelukeshü

¹ Ukepenuopfü mu Niepuu Jisu Khrista kituou Jakob kinu, Khapie Cüre tuoketa seyie kerekenieko kelushüya.

Kepele mu Mhasi

² A kezeko, dophi neiüko nie gei kephir ki nie la kevi zo ücü lelie,

³ mu nie kepele dojükeshü geinu shügeshühiekecü nyi parlieketuo siliecie;

⁴ tsiu shügeshühiekecüu bu nie chüpie vi tseiliecie, sitse nie lope mu tseiütso di mhakehoupuonurei tsopfhü molietuo.

⁵ Nie kehoupuorei mhasi jü ro, puo bu mephruomevuoi mu panya mo zo di pie mia tsüyakezhau Ukepenuopfü ki chaliecie.

⁶ Sirei pelekhru di chalie, kenoudo moto di, kekreilamonyü kenoudokezhau teikhrie bu hepie lutsahatsa vaketuo dzü rüpfhü mhie zocü la;

⁷ kenoudokecümia bu Niepuu kinu mhapuorei ngulieketuo le hiecie,

⁸ nou keniemia sü mhakehoupuo nu rei puo nou jü balieya mo.

Mhakenyi mu Mhakejü

⁹ Kepelemia mhakejüu zorei puo piesiekeshü la puo mhokuo chülie,

¹⁰ mu kenyimia zorei puo chü kerünuokewa ki puo neiliecie, kekreilamonyü kenyiu zowe lie nu nhapou kemhie jüta zotuo.

¹¹ Niaki puo teinia chü se sier nha phie pesiawaya; sidi puo pouko rürhotaya mu puo ziviko jütaya, süsütuoi mhakenyimia rei u rhiechü di pfhü ketuo nunu ra jütatuo.

Dojükecü mu Medokephi

¹² Dophi nu rei shügeshühie thalieyakezhamia thejakepfütho. Sikecümia u kedokecü nu thakelie la kerhei tsüre Niepuue pie puo khrieyakezhako tsütuo üdi phrapie kezhüu ngulietuo.

¹³ Kehoupuorei dophi sikecü puo gei kephir ki, “Ukepenuopfü a medophiya,” si hie; Kekreilamonyü mha kesuo se Ukepenuopfü kedolie kenjü mu puo thuo zorei miapuorei medophiya mo zo.

¹⁴ Derei kehoupuorei dophi puo gei phiryakezhau puo menguko bu puo meshülie di puo seketsilieyakezha zo;

¹⁵ süsie puo menguko nuonipfülie di kephouma penuoshüya, siro kephouma süu phichülie tse kesia penuoshüya.

¹⁶ A khrieko, mia bu u sewa hiecie.

¹⁷ Mephruomevuoi di khakeshü, mu vi tseikecü mhaphruoko pesogei kezieko Puou kinu ker phreya, puo zowe u khrü kemhiei rüdirüliya mo.

¹⁸ Puo thuo puo medo nunu ketho dieu se u chü u rhi parlie, sidi u bu puoe pelhoukeshü pete si kerieu chülie.

Kerünyü mu Chüüzekelie

¹⁹ A khrieko nieko hau siliecie. Themia kehoupuo bu rei rünyü rhürhülie, die pu mhamha hie, u nou meyie mhaita hiecie;

²⁰ nie nouyie geinu Ukepenuopfü miatho-u parlieya mocü la.

²¹ Süla nieko mha mesa kemo pete mu mha kesuo shüüko kha phrewa di nie nou mene di nie ruopfü kelalie kevi die leipie nie nou zhükewau lieliecie.

²² Derei kerünyü rübei zo di u thuo u se penya tuoyakezhamia chü hieü, chü mu zeyakezhamia chüliecie.

²³ Kekreilamonyü kehoupuorei dieu rünyülie, derei chüüzeya kemomia khrüva nunu u thuo u khrü nguyakezhamia mhie zo;

²⁴ süko u thuo u mehoshü di tuo rüdeiketa sie puo kimhiecü puo shi rükra mo mhaitayakezha mhie zo.

²⁵ Derei vi tseikecü zho-u, u shüphrakeshü zho-u, meho sei balieyakecümia, rünyüshü di rükra mo latakecüu monyü chüüzelieya, süko u mhatho nu rei thejapfütuo.

²⁶ Miapuonie puo thuo puo üse nanyü nu pecü üya, mu puo tie kekhalieya kemosie puo thuo puo nou se penya seketuo zo, mu puo nanyü rei kemethuo zo.

²⁷ Ukepenuopfü u Puou mhodzüki nanyü kemesa mu rhu mo bakelieu sü hau: Merünuomia siro samipfüko mezhie nu uko rükra mu khruohikelie tsiu kijüu bu puo perhuwa mo di balieyakezhamia zo.